Pagtabang kang Ken
Ang tagsulat nagpuyo sa Taiwan.
Ang impluwensya sa Ginoo migiya sa akong mga paningkamot sa pagpangalagad.
Paghulagway pinaagi ni Lisk Feng
Sa nag-edad ko og 16, mibalhin ko sa usa ka ward sa Taiwan nga Mandarin ang pinulongan. Si Ken, usa ka 13 anyos, bag-o pa lang nga nabunyagan. Apan wala madugay human sa iyang bunyag, si Ken hapit wala na mosimba. Dako ang akong tinguha nga motabang ni Ken nga mobalik sa simbahan. Gidapit nako siya sa pagtambong sa pipila ka kalihokan sa Simbahan. Midula si Ken og basketball sa Mutual ug miapil sa choir sa kabatan-onan. Siya ug ang iyang igsoong babaye, si Linda, misugod usab sa pagtambong og libre nga klase sa English nga gitudlo sa akong pamilya ug sa mga misyonaryo. Wala madugay si Linda misugod usab sa pagtambong sa mga kalihokan sa kabatan-onan. Akong makita ang impluwensya sa Dios nga nagtabang kanamo.
Ang pamilya ni Ken naghunahuna nganong ang akong pamilya naningkamot sa pagtabang ni Ken ug Linda. Gisultihan namo sila nga ang ebanghelyo nakahatag kanamo og dakong kalipay, ug gusto gayud namo nga ang uban makakaplag sa samang kalipay ug kalinaw gikan sa Manluluwas. Wala madugay, gidawat ni Linda ug Ken ang among pagdapit nga motambong sa simbahan. Miabut si Linda ug nakaangkon og talagsaon nga kasinatian. Hinoon, nasakit si Ken, ug sa dihang nag-ampo ko kon unsay akong mahimo aron sa pagtabang kaniya, nadasig ko nga dad-on namo kaniya ang sakrament. Uban sa pagtugot sa bishop, miadto ang among pamilya sa iyang balay, ug ang akong igsoong lalaki ug ako mitabang sa pagpahigayon sa sakrament ngadto kaniya. Nakig-istorya usab kami sa iyang pamilya. Mibati ko og kalinaw.
Ang among pamilya nag-ampo alang kang Ken, ug kaming tanan mibati og gugma alang kang Ken ug sa iyang pamilya. Ang mga batan-on ug mga hamtong sa ward ug stake mipadayon sa pagpakigdait kang Ken ug Linda. Ang hiniusang mga paningkamot sa mga miyembro sa pagpangalagad mitabang ni Ken ug Linda nga mobati sa gugma sa Manluluwas. Kini nga kasinatian sa pagpaningkamot sa pagpangalagad nga sama sa Manluluwas nakahatag og dakong kalipay sa akong kinabuhi. Ang pagpangalagad mao ang buhat sa Ginoo, ug tungod kay kini Iyang buhat, ang Iyang impluwensya mogiya sa atong mga paningkamot sa pagpangalagad.