“Pabalik-balik ko nga matintal sa samang mga tintasyon. Unsaon nako sa pagbuntog niadto nga mga sala?”
Litrato sa batang lalaki gikan sa Getty Images
Palayo sa Tinubdan sa mga Tintasyon
Kon ang imong telepono ang nakapaadik nimo, sulayi sa pagwagtang niini o pabutangi sa imong mga ginikanan og mga limitasyon sa paggamit niini. O kon ang imong mga higala ang nagtintal kanimo, pangita og buotan nga mga higala ug paningkamot nga malibutan og maayong mga tawo nga makatabang nimo nga mobati kanunay sa Espiritu. Kon uban kanimo ang Espiritu ug gipalibutan ka og buotan nga mga higala, niana mas sayon nga makahimo sa pagsukol sa mga tintasyon. Ang mga tintasyon moabut sa tanan, apan kon mosukol lang kita niini, niana mamaayo ra ta.
Kolten B., edad 17, Alberta, Canada
Pag-ampo Kanunay
Usa ko ka kinabig, ug ang mga tintasyon kusog kaayo alang kanako tungod kay lahi ko og mga kustombre kay sa mga tawo nga anaa sa Simbahan. Sa hinay-hinay, misugod ko sa pagsabut nga ang akong komunikasyon ngadto sa akong Langitnong Amahan mipalig-on kanako ug mipasayon kanako sa pagbuntog sa tanang butang.
Pamela S., edad 19, Llanquihue Province, Chile
Kontrolaha ang Imong mga Hunahuna
Ang atong mga hunahuna mao ang ganghaan sa atong mga lihok. Ang mga tintasyon, sama sa tuno sa kanta nga imong mahinumduman, makasulod sa atong mga hunahuna. Kon moabut kini sa imong hunahuna, paningkamot sa pagpalayo gikan niini nga mga hunahuna pinaagi sa pagtudlo sa imong kaugalingon sa unsay imong lihukon ug hunahunaon. Aduna kay gahum sa pagbuhat niini!
Taynara S., edad 19, São Paulo, Brazil
Pagkuha og Suporta sa Uban
Pakig-uban kanunay sa tawo nga imong gihigugma, sama sa imong pamilya ug suod nga mga higala, kinsa adunay mga sumbanan nga sama kanimo. Makatabang kini nimo sa pagpalayo sa tintasyon. Ilakip ang imong kaugalingon sa mga kalihokan sa pamilya ug sa Simbahan, ilabi na sa misyonaryo ug family history nga buhat. Ayaw kasagmuyo; nakatuyhad kanunay ang kamot sa Ginoo ngadto niadtong adunay tinguha sa paghinulsol.
Elder Tucay, edad 20, Ghana Cape Coast Mission
Pangita og Kahupayan pinaagi sa Pag-ampo
Usa ka butang nga akong irekomendar nga buhaton mao ang pag-ampo bahin niini. Nasayud ko nga ang mga tubag dili dayon moabut, apan ang kahupayan mahimong moabut dayon. Makakaplag ka usab og kahupayan pinaagi sa pagwagtang sa imong hunahuna sa mga butang nga nakasamok kanimo ug sa paghunahuna og butang nga makapalipay kanimo. Bisan unsa nga paagi nga makakaplag ka og kahupayan, nasayud ko nga makakaplag ka niini pinaagi ni Jesukristo.
Anna P., edad 12, Utah, USA