Sydney, Australia

Subay sa kabaybayunan sa maanindot nga natural nga dunggoanan sa Sydney nagbarug ang usa ka chapel diin ang 4 sa 309 ka mga kongregasyon sa mga Santos sa Ulahing mga Adlaw sa Australia mag-abut alang sa pagsimba: usa sa matag pinulongan sa English, Tongan, Spanish, ug Mandarin Chinese. Ang ingon ka mga panaglahi normal ra sa Sydney, usa ka dapit nga adunay daghang mga impluwensya sa kultura gikan sa tibuok kalibutan.

Ang Simbahan gipaila diha sa Australia niadtong 1840 sa usa ka 17 anyos nga gikan sa Great Britain, si William James Barratt. Gibunyagan niya ang labing unang kinabig nga taga-Australia, si Robert Beauchamp, kinsa sa kaulahian nahimong presidente sa misyon.

Ang unang mga miyembro sa Australia misagubang og mapintas nga mga pag-atake gikan sa mga pamantalaan, ug daghang mga miyembro ang milalin ngadto sa Utah, USA. Hinoon, ang mga Santos sa Ulahing mga Adlaw nga taga-Australia mipadayon, ug paglabay sa katuigan ang Simbahan misugod sa paglambo. Karon, ang Australia maoy pinuy-anan sa sobra sa 151,000 ka mga miyembro, ug ang mga Santos sa Ulahing mga Adlaw nakadawat og pagdayeg gikan sa mga tigpamalita tungod sa paghatag og pang-emerhensya nga makatawhanong panabang human sa natural nga mga katalagman sama sa mga sunog sa kakahoyan ug kusog nga mga bagyo.

Ang unang misyon sa Australia giablihan niadtong 1851, ug karon aduna nay unom ka mga misyon.
Ang unang LDS nga meetinghouse sa Australia gitukod sa Brisbane niadtong 1904.
Ang Sydney Australia Temple gipahinungod niadtong 1984, nga gisundan sa mga templo sa Adelaide (2000), Melbourne (2000), Perth (2001), ug Brisbane (2003).