Usa ka Saad nga Maningkamot
Ang tagsulat nagpuyo sa Utah, USA.
“Ang pagpabunyag sama ni Jesus … Mao gayud ang gusto nakong buhaton” (Children’s Songbook, 104).
Hapit na mosalop ang adlaw samtang nagbisikleta si Tatsuki padulong sa ilang panimalay. Ganahan siyang mopakusog og dulhog sa gamay nga bungtod duol sa iyang balay, apan kinahanglan siyang mopauli sa dili pa mongitngit.
Sa dihang gipahunong ni Tatsuki ang iyang bisikleta, nakita niya ang iyang magtutudlo sa Primary, si Sister Yamada, nga naglakaw padulong sa bilding sa iyang apartment.
“Hi, Tatsuki,” miingon si Sister Yamada nga nagpahiyom. “Ania ko karon aron hisgutan ang imong bunyag.”
Ang pamilya ni Tatsuki bag-o lang nga mibalik sa pagsimba. Ganahan siyang makig-uban sa iyang mga higala sa Primary, ug naghinam-hinam siya pag-ayo nga magpabunyag! Si Sister Yamada ug Tatsuki nagkuyog og sakay sa elevator ug giubanan si Mama diha sa apartment.
“Tatsuki, nalipay kaayo ko nga mipili ka nga mosunod ni Jesukristo pinaagi sa pagpabunyag,” miingon si Sister Yamada. “Kon kita bunyagan, mohimo kita og mga pakigsaad uban sa Langitnong Amahan. Nakahibalo ka ba kon unsa ang pakigsaad?”
Wala kahibalo si Tatsuki nga daghan og ipangutana si Sister Yamada kaniya. Misugod siya sa pagkakulbaan og gamay. Apan mipahiyom si Mama sa pagdasig.
“Mga saad?” maulawon siyang nangutana.
“Sakto kana!” Miingon si Sister Yamada. “Ang Langitnong Amahan misaad kanato nga kanunay kitang makabaton sa Espiritu Santo uban kanato. Nakahibalo ka kon unsa ang atong gisaad sa Langitnong Amahan?”
Gilingo-lingo ni Tatsuki ang iyang ulo. “Wala ko kahibalo.”
“Hatagan ko ikaw og timailhan—ang mga saad anaa sa mga pag-ampo nga atong madungog sa dili pa kita moambit sa sakrament,” miingon si Sister Yamada. “Misaad kita sa Langitnong Amahan nga andam kita mga modala diha kanato sa ngalan ni Jesukristo, sa kanunay mohinumdom Kaniya, ug mosunod sa Iyang mga sugo. Nahibalo ka kon unsay gipasabut sa pagdala ngari kanato sa ngalan ni Jesus?”
Gilingo-lingo na usab ni Tatsuki ang iyang ulo. Gitabangan siya ni Mama. “Nagpasabut kini nga malipay kitang mosulti nga kita mga miyembro sa Ang Simbahan ni Jesukristo sa mga Santos sa Ulahing mga Adlaw,” miingon siya. “Nagpasabut kini nga atong buhaton ang unsay buhaton ni Jesus kon anaa Siya dinhi.”
Unsa nga matang sa mga butang ang buhaton ni Jesus?” Nangutana si Tatsuki.
“Si Jesus magmabination sa mga tawo. Motabang Siya sa mga tawo nga magul-anon o nasakit,” miingon si Sister Yamada. “Ug Iyang tudloan ang mga tawo unsaon sa pagsunod sa mga sugo.”
Adunay gibati nga dili maayo si Tatsuki sa iyang tiyan. Misugod siya sa pagkusmod ug miingon, “Dili siguro ko pwede nga mabunyagan.”
“Ngano man?” Nangutana si Mama.
“Daghan kaayo og mga saad! Morag dili ko mahimong sama kang Jesus kada adlaw!”
Gigakos ni Mama si Tatsuki. “Nakahinumdom ka nga gitabangan nimo si Yuna sa dihang mihilak siya gahapon?”
Mitando si Tatsuki. Naguol ang iyang igsoong babaye, busa gihimo niyang kataw-anan ang iyang nawong ug nakigdula niya hangtud nga nalipay siya pag-usab.
“Ug nakahinumdom ka kon giunsa nimo pagtabang ang imong mga ig-agaw nga dili magdinalo ug magbinuotan sa usag usa sa miaging semana? Sa dihang gibuhat nimo kana, nagsunod ka kang Jesus.”
Wala masayud si Tatsuki nga mao diay kana ang gipasabut sa pagsunod kang Jesus. Miarang-arang ang iyang gibati. Makahimo siya niadtong mga butanga!
Miingon si Sister Yamada, “Ug kon makahimo kita og sayop, mahimo kitang maghinulsol. Nagpasabut kana nga mahimo kitang mangayo og pasaylo ug maningkamot sa pagbuhat og mas maayo. Kon maghinulsol kita, ang Langitnong Amahan mopasaylo kanato. Mahimo kitang maningkamot kanunay!”
Wala na kaayo mabalaka si Tatsuki. Mibati siya og kalipay.
“Gusto ko nga magpabunyag!” miingon siya.
Mipahiyom si Mama ug si Sister Yamada. Gihatagan ni Sister Yamada si Tatsuki og Basahon ni Mormon nga ang iyang ngalan nakasulat diha niini. Mibati si Tatsuki og kalipay nga makahimo siya sa pagpaningkamot matag adlaw nga mahisama kang Jesus. Karon dili na siya kahulat nga magpabunyag!