Usa ka Pag-ampo nga Modala Kanato sa Templo
Isaac Ututu
Lagos, Nigeria
Paghulagway pinaagi ni Martin Sanders
Pipila ka adlaw sa wala pa ang iskedyul nga mobiyahe ang among ward ngadto sa Aba Nigeria Temple, ang bishop mitawag ug mihangyo kanako sa pagpangulo sa among grupo. Miuyon ko, ug sa buntag sa among pagbiyahe, mihalad kami og pag-ampo ug misakay og bus aron sugdan ang among panaw.
Sa among pagbiyahe, nanganta kami og mga himno. Hilabihan ang among kalipay samtang nanganta kami. Maayo ang among dagan sa among 10 ka oras nga biyahe, apan sa hapit na mag-udto, dunay nahitabong problema sa among bus nga walay usa kanamo nga makaayo.
Midagan ko ngadto sa duol nga gasolinahan ug nakakita og attendant. Nangutana ko kon duna ba siyay nailhan nga mekaniko.
Sa walay paglangay, mitawag siya og duha ka mekaniko. Dali silang miabut ug mitrabaho. Ilang nadiskobrihan nga ang fan belt depektuso. Mitrabaho sila sulod sa daghang mga oras hangtud nga wala na sila makahibalo unsa pa ang buhaton. Dayon mitawag sila og laing mekaniko.
Daw masaligon siya sa iyang pag-abut ug misulti nga pinabugal-bugal, “Unsay problema sa fan belt nga dili ninyo maayo?”
Mitrabaho siya sa makadiyot ug dayon miingon, “Ang nahitabo dinhi dili ordinaryo.” Gihipos niya ang iyang mga himan ug mibiya. Ang ubang mekaniko mipadayon sa pagpangita og solusyon, apan daw wala nay paglaum ang among sitwasyon.
Milingi ko sa akong isigka mga Santos ug nakita nga hapit naguol ang tanang nawong. Samtang naghunahuna ko kon unsay sunod buhaton, dunay misulod sa akong hunahuna: “Nag-ampo ba mo mahitungod sa problema?”
Diha-diha dayon, gipundok nako ang grupo. Mibarug kami sa usa ka sirkulo ug nag-ampo sa atong Langitnong Amahan nga hatagan ang mga mekaniko sa kahibalo nga ilang gikinahanglan. Wala lang kaabut og lima ka minuto, ang usa sa mga mekaniko miduol kanako.
“Naayo na namo!” miingon siya, malipayong nagpahiyom.
Naglipay kami ug mipasalamat sa Ginoo. Wala madugay akong namatikdan nga ang laing mekaniko morag naguol. Gisulayan nako sa pagpahalipay kaniya, apan miingon siya, “Imo kong pahalipayan sa unom ka oras nako nga pag-ayo sa usa ka fan belt? Miayo ko og duha ka fan belt sa wala pa ko moanhi dinhi. Dili masabut ang nahitabo dinhi.”
Giingnan nako siya nga ang Dios mitabang pagkahuman sa among pag-ampo.
“Nag-ampo kamo mahitungod niini?” nangutana siya.
“Oo, mga lima ka minuto ang milabay.”
“Oy, kamaayo gud ninyo!” miingon siya.
Akong gibayaran ang mga mekaniko ug mibiya sila. Nanulod kaming tanan sa bus ug mipadayon sa among biyahe. Sa katapusan miabut kami sa templo paglabay sa pipila ka oras, mapasalamaton nga ang Langitnong Amahan naminaw ug mitubag sa among mga pag-ampo.