Hello gikan sa Mexico!

Ako si Margo. Ug ako si Paolo. Mobiyahe kami ngadto sa laing nasud matag bulan aron makat-on mahitungod sa mga anak sa Dios sa tibuok kalibutan. Apil kanamo samtang mobisita kami sa Mexico!

Ang Mexico anaa sa Amihanang America. Kini adunay kapin sa 120 ka milyon ka mga tawo. Mga miyembro sa Simbahan ang mga 1.5 ka milyon kanila.

Ang nag-unang pinulongan sa Mexico mao ang Spanish. Ania ang Basahon ni Mormon sa Spanish. Tag-ana kon unsa? Sa Spanish, ang ngalan ni propeta Alma nagpasabut og kalag.

Ang pamilya importante kaayo sa mga tawo sa Mexico. Ang mga pamilya sa kasagaran magpundok alang sa mga holiday ug aron maglingaw-lingaw. Kini nga mga bata mihapak og piñata nga puno sa mga prutas ug mga kendi!

Nahibalo ba ka nga ang tsokolate naimbento sa Mexico? Ang tsokolate maoy usa sa mga sagol sa usa ka pagkaon nga gitawag og mole poblano. Kini nga sarsa naglakip usab og mga sili, mani, prutas, ug mga lamas. ¡Delicioso!

Ganahan ka og fútbol? Mao kini ang labing sikat nga dula sa Mexico!

Adunay 13 ka mga templo sa Mexico. Aniay litrato sa maanindot nga mga templo sa Siyudad sa Mexico ug sa Tijuana.

Himamata ang uban sa atong mga higala gikan sa Mexico!

“Usa ka adlaw aduna akoy dako nga problema, ug naguol kaayo ko. Miadto ko sa simbahan ug naminaw sa mga pagpamatuod mahitungod ni Jesus. Gibati nako ang Espiritu Santo, ug nakapalipay kini kanako. Nasayud ko nga ang Langitnong Amahan mitabang kanako nga mobati og kalipay.” Abby D., edad 7, Puebla, Mexico

“Nasayud ko nga niining panahuna ang Langitnong Amahan mamulong ngadto sa propeta sama sa Iyang gibuhat kaniadto. Kon maminaw ko ug mosunod sa propeta, mapanalanginan ko, ug makatabang kini nako nga mas mahisama ni Jesukristo.” Benjamin D., edad 9, Puebla, Mexico

Salamat sa pagsuhid sa Mexico uban kanamo. Magkita kita sa sunod higayon!