Nalipay Ko nga Naminaw Ko

Alan B. Sanderson

Utah, USA

Paghulagway pinaagi ni Allen Garns

Sa tunga-tunga sa busy nga adlaw sa akong neurology clinic, naulahi na ko sa akong iskedyul. Swerte lang, ang usa ka konsulta dali rang nahuman. Nahuwasan ko samtang mibarug aron mobiya, apan ang akong pasyente misugod sa pagsulti kanako og usa ka butang nga walay labut sa among giistoryahan. Bisan sa akong kawalay pailub, mibati ko nga angay kong molingkod og balik ug maminaw.

Gisultihan ko niya nga bag-ohay lang ang iyang asawa misugod pagkasakit. “Nasayud siya kon unsay nahitabo,” miingon siya, “apan wala siya mosulti kanako tungod kay nahadlok siya nga moadto sa ospital.”

Sulod sa pipila ka adlaw, nagsige na lang siya og higda. Naglibug siya ug dili kaayo masabtan ang iyang gisulti. Ang akong pasyente mismo adunay seryosong problema sa panglawas, ug wala madugay ang ilang pisikal nga kahimtang misamot. Dili na sila makaatiman sa usag usa. Sa dihang ang bayaw nga babaye sa akong pasyente mibisita kanila, naalarma siya. Mitawag siya og duha ka ambulansiya aron dad-on sila sa ospital. Nadiskubrihan dayon sa mga doktor nga ang iyang asawa adunay grabe nga kanser sa totoy.

“Wala na ko makaistorya pag-usab sa akong asawa,” miingon ang lalaki.

Giataki sa kasingkasing ang iyang asawa ug gitauran og mga ekipo nga makasuporta og kinabuhi. Ang akong pasyente mihulagway nga giduso siya gikan sa iyang kaugalingong kwarto sa ospital ngadto sa intensive care unit aron makita ang iyang asawa sa katapusang higayon. Dayon iyang gisugo ang mga doktor nga tangtangon ang mga ekipo nga nagsuporta sa kinabuhi.

Mihunong sa pagsulti ang lalaki. Klarong nasulti na niya ang tanan nga gusto niyang isulti. Gisultihan nako siya nga nasubo ko sa panghitabo. Milamano siya kanako ug mibiya. Nalipay ko nga milingkod ko og balik aron maminaw. Nalipay ko nga wala ko mobiya sa dihang gusto na nako! Unsa kaha ang iyang bation kon nagdali-dali ko sa paggawas sa kwarto sa dihang mosulti na siya sa iyang alantuson?

Wala ko masayud nganong gipaambit sa akong pasyente kanako nianang adlawa ang iyang istorya, apan nasayud ko nganong naminaw ko. Si Alma mitudlo nga kadtong nagtinguha nga mabunyagan ug mosunod ni Jesukristo kinahanglang “andam sa pagtambayayong sa usag usa nga mga alantuson, … pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:8–9).

Ang akong pasyente dunay gidala nga alantuson, ug sa gamayng paagi, mitabang ko niya sa pagsakwat niini. Nagbangutan siya, ug nagbangutan ko uban kaniya. Nagkinahanglan siya og kahupayan, busa ako siyang gihupay. Niining yano nga paagi, naningkamot ko sa pagtuman sa akong saad nga mas mahimong sama sa akong Manluluwas.