Mga Young Adult
Usa ka Kusog nga Impluwensya alang sa Kaayohan
Kitang tanan pwede nga mahimong impluwensya alang sa kaayohan sa kalibutan, bisan unsa pa ka dako o ka gamay sa atong maimpluwensyahan.
Usa kadto ka snowstorm sa tunga-tunga sa Abril nga nagsugod niining tanan. Dili gayud talagsaon nga panghitabo sa Utah, apan sa gihapon, naghunahuna ko nga ang mga tulip sa Temple Square nga natabunan sa snow kinahanglang madokumentohan. Mao nga mihimo ko og Instagram account—nga nagpakita og mga litrato dili sa akong iring (bisan kon nindot kaayo sila) apan sa mga litrato sa templo.
Sa ingon niana nagsugod ang usa ka tuig nga kada adlaw nga pag-post (ug pipila pa ka mga tuig nga dili inadlaw nga pag-post). Ang pagkuha og mga litrato sa templo ug pag-post niini uban sa mga kinutlo nga may kalabutan sa templo gikan sa mga lider sa Simbahan nahimong makalingaw nga paagi sa pagpalambo og mga talento ug mapadak-an ang akong pasalamat sa templo.
Apan sa nagkadaghan na ang mga tawo nga akong naabut, mas nakita nako ang oportunidad nga mahimong impluwensya alang sa kaayohan. Dili ko “tig-impluwensya” diha sa social media, apan gusto nakong hunahunaon nga ang akong mga paningkamot makahimo og kalainan diha sa usa ka tawo sa usa ka dapit.
Bisan pa sa atong busy, paspas nga kinabuhi, kitang tanan makagamit sa atong mga talento sa pagpanalangin sa uban ug mahimong impluwensya alang sa kaayohan. Tutal, “[kita] nagtuo … sa pagbuhat sa matarung” (Mga Artikulo sa Hugot nga Pagtuo 1:13).
Akong gisubay ang pipila ka mga young adult kinsa naningkamot nga mahimong impluwensya alang sa kaayohan. Mao kini ang ilang gibuhat aron makahimo og kalainan.
Motabang Uban sa Gugma
Si Graziely Moreira, 25, gipadako nga mobuhat og maayo. Kon ang mga tawo sa iyang lungsod nga natawhan sa Fortaleza, Ceará, Brazil, makakita og tawo nga nanginahanglan, motabang sila. “Komon kini sa among kultura,” mipasabut siya. Ug alang sa mga miyembro sa Simbahan, “tungod usab kini kay maghunahuna lang kita nga, sama sa gisulti ni Jesukristo, mohigugma sa uban sama sa imong paghigugma sa imong kaugalingon. Mao nga mobuhat ra dayon kami niini. Mobuhat kami niini tungod kay ganahan kaming mobuhat niini.”
Uban sa iyang hilum nga ehemplo sa pag-atiman ug sa kanunayng kaandam sa pagtabang niadtong nanginahanglan—sama niadtong nakakita siya og usa ka tigulang nga lalaki nga naglisud sa pag-alsa sa bug-at nga mga bag ug mitabok sa dalan aron sa pagtabang kaniya sa pagdala niini ngadto sa ilang panimalay—si Graziely usa ka impluwensya alang sa kaayohan. Nasayud usab siya nga makahimo kita sa labing maayo kon ang mga tawo nasayud nga nagserbisyo kita tungod sa gugma, dili tungod sa obligasyon. “Aduna koy nakat-unan gikan sa akong mama: Buhata ngadto sa uban ang unsay imong gusto nga buhaton sa mga tawo diha kanimo. Plano kini sa Langitnong Amahan—gusto Niya nga motabang kita sa mga tawo.”
Dili usab kita makatugot nga ang mga butang sama sa teknolohiya (AKA atong mga smartphone) makababag sa atong pagtabang sa uban gawas sa atong kaugalingon sa pagbuhat og maayo, miingon si Graziely. “Kana ang importanting ikonsiderar—kinahanglan kitang makaila sa usag usa, kinahanglan kitang makasabut sa mga panginahanglan sa uban tungod kay ang atong kinabuhi wala gibase sa mga apps. Ang atong kinabuhi gibase diha sa mga tawo. Gibase kini sa unsay kinahanglan natong buhaton aron mahimong mas maayo ug mosunod ni Jesukristo.” Ug ang usa ka dakong bahin sa pagsunod kang Jesus nagpasabut sa pagbuhat og maayo.
Magmaisugon
Si Normandie Luscher, 29, usa ka estudyante sa Master of Fine Arts sa Maryland, USA, migamit sa iyang hinimo nga arte [artwork] alang sa kaayohan. “Nakatutok ko og maayo sulod sa katapusang duha ka mga tuig diha sa labing importante nga sugo, sa paghigugma sa Dios ug sa paghigugma sa atong silingan,” mipasabut siya. “Diha sa akong hinimo nga mga arte nakatutok ko sa pagsaysay og mga istorya. Makakat-on gayud kita unsaon sa pagkahimong mas maloloy-on ug mohigugma sa atong mga silingan pinaagi sa pagpaminaw kanila ug pagkadungog sa ilang mga istorya.”
Mitawag sa iyang kaugalingon nga “tawo nga daghan og maayong ideya,” makatapok si Normandie og mga tawo alang sa kaayohan sa daghang paagi. Ang usa ka proyekto sa eskwelahan migiya kaniya sa pag-organisar og fundraiser alang sa dangpanan sa lokal nga kababayen-an: usa ka pasundayag sa arte [gallery show] nga nagpakita og mga painting nga iyang gihimo nga nagsaysay sa sugilanon ni Job pinaagi sa panglantaw sa usa ka babaye. “Ang ubang mga babaye miabut ug mipaambit sa ilang mga istorya ug sa ilang mga kasinatian,” mipasabut siya. “Ug naghunahuna ko nga gamhanan kadto nga butang.”
Laing ideya nga gihunahuna ni Normandie mao ang usa ka gitambayayongan nga magasin (magasin nga gimantala sa kaugalingon o diha sa internet). Gikontak niya ang ubang mga artist, ug naghiusa silang misaysay sa mga istorya sa Basahon ni Mormon gamit ang kontemporaryo nga art.
Sa iyang kaugalingon, nakita ni Normandie nga pwede siyang mahimong impluwensya alang sa kaayohan pinaagi sa matinuoron nga pakig-istorya sa uban. “Naningkamot ko nga makapalambo og kaisug nga mahimong andam sa pag-angkon sa akong mga sayop ug sa pagpaambit sa akong kaugalingong mga kasinatian ug mga panglantaw. Ang arte mao ang mahitungod sa pagkamatinuoron ug pagpaambit og mga ideya. Busa kalabut sa pagkahimong impluwensya alang sa kaayohan, naningkamot lang ko sa paghangup niadto nga mga ideya sa pagkamatinuoron ug pagkamaisugon ug sa pagtabang sa ubang mga tawo ug sa pagpadangat og mga ideya pinaagi sa makita nga arte [visual art].”
Miawhag siya sa ubang mga young adult sa pagpalambo og kaisug sa pagbuhat usab og maayo. “Ayaw kahadlok nga dili paigo ang inyong gihimo,” miingon siya. “Naghunahuna ko nga daghang mga tawo ang nabug-atan sa, ‘Wala na akoy mahimo,’ ug ang pagtuo nianang sayop nga ideya makapugong sa daghang kaayohan nga mahimo. Ayaw kahadlok. Pagmaisugon nga mopadayon ug molihok.”
Pangitaa ang Inyong Kawsa
Si Matt James, 26, sa Utah, USA, mibati nga usa ka bahin sa iyang misyon sa kinabuhi mao ang pagtabang niadtong wala matawo nga dunay mga pribilehiyo nga iyang natagamtam. Resulta kini sa usa ka bahin sa pagpadako kaniya sa mga ginikanan nga nalambigit sa mga paningkamot sa pagtabang sa uban, ug sa usa ka bahin tungod sa pagbati sa responsibilidad nga labing gipahayag diha sa mga pulong sa “Because I Have Been Given Much [Kay Gihatagan Ko og Daghan” (Hymns, nu. 219). Human makaserbisyo si Matt og full-time nga misyon sa Ireland ug sa Scotland, mibati siya og kalooy sa mga refugee nga taga-Africa nga iyang natudloan ug gibunyagan didto, mao nga sa dihang adunay kahigayunan nga makaadto sa Uganda, miadto siya.
Bisan tuod nakabiyahe na siya sa Ethiopia, Peru, ug India, “ang Uganda miusab sa akong kinabuhi,” miingon si Matt. “Nasayud ko nga ang Dios migiya kanako ngadto nianang piho nga bahin sa kalibutan alang sa maalamon kaayo nga katuyoan.” Usa ka bahin niana nga katuyoan mao ang pakighigala ug sa katapusan pagbunyag sa usa ka babaye nga ginganlan og Carolyn. Ug ang usa ka bahin mao ang pagkatandog sa iyang kasingkasing sa mga ilo nga iyang gikatrabaho. Sa dihang panahon na nga mobiya, dili gusto ni Matt nga mahunong ang komunikasyon ngadto niini nga mga tawo nga nakat-unan na niyang mahalon. Busa nakigsulti siya sa iyang mga ginikanan, kinsa mitanyag nga motabang kaniya sa kwarta aron sa pagtukod og usa ka orphanage uban ni Carolyn sa gamayng lungsod nga gitawag og Mbale.
Si Carolyn, kinsa nagtubo mismo isip usa ka ilo, mipadayon sa pagdumala sa pagpadagan sa orphanage. Si Matt mibalik sa Uganda matag ting-init ug nakigtambayayong sa uban aron sa pagtukod og mas dakong orphanage, nga makahatag og kapasilungan ug edukasyon sa sobra sa 200 ka mga bata. Ug karon nagdumala siya og negosyo nga manghimo og alahas nga mitabang sa pagsuporta sa orphanage.
Sama sa gisulti ni Matt, kitang tanan adunay piho nga mga butang sa kinabuhi nga gipanalangin kanato sa Dios aron atimanon. “Hugtanon akong nagtuo nga kon ang tanan matinud-anong mosunod sa ilang mga tinguha ug mohimo sa gikinahanglang lihok, mosunod sa dalan nga giandam sa ilang atubangan ug modawat sa mga oportunidad nga gihatag kanila, nga ang tanan makakaplag sa ilang kawsa. Ug kon ang tanan makakaplag sa ilang kawsa ug magmakugihon, ang kalibutan mahimong maayo kaayo nga dapit.”
Ang pagkakaplag sa inyong “kawsa” dili kinahanglan nga komplikado. “Pag-ampo sa Dios ug paningkamot sa pagpangita sa inyong mga hilig,” misugyot si Matt. “Pag-ampo aron masayud unsa nga mga butang ang imong ganahan, nga mahimo nimong maimpluwensyahan, ug buhata kini.”
Pag-ampo alang sa Gugmang Putli
Kaveria ei jätetä. Sa Finnish, kini nagpasabut og “walay usa nga biyaan,” usa ka pagpahayag nga gigamit panahon sa gubat apan gituohan gihapon sa mga Finn karon. Alang ni Rolle Rantaniemi, 23, sa Uusimaa, Finland, nagdasig kini kaniya sa pagbuhat og maayo.
“Duna koy lagda alang sa akong kaugalingon: kon makakita ako og usa ka tawo nga nag-inusara, moadto dayon ako kanila, bisan unsa pa ang sitwasyon. Kinahanglang walay usa nga mag-inusara. Sa batan-on pa ko, nag-inusara gayud ako sa eskwelahan ug sa simbahan—wala koy mga higala, ug nasayud ko unsa ka dili maayo bation nga mag-inusara. Mao kana ang akong nakat-unan gikan sa Finnish nga panghunahuna nga walay usa nga biyaan.”
Usa sa nakadasig kaniya mao ang kahibalo nga ang mga relasyon magpadayon lapas pa niining kinabuhia. “Mao kana nga naghunahuna ko nga ang labing importante nga atong tutokan mao ang pagpalambo sa atong kaugalingon. Pakita og maayo nga ehemplo, pagtinarung, pagmakugihon ug tanan niadtong Kristohanon nga mga hiyas. Ang laing butang mao ang pag-ugmad og mga relasyon, pagkahimong higala sa mga tawo, pagbaton og gugma ug pagserbisyo sa ubang tawo.”
Nagtuo si Rolle nga ang pagpalambo og Kristohanong gugmang putli mao ang atong labing mahinungdanong himan sa pagbuhat og maayo. “Giingon diha sa Moroni 7:48 nga kinahanglan kitang mag-ampo alang sa gugmang putli. Ug akong nakita samtang nagbuhat ako niana matag adlaw, ug mihangyo ko sa Langitnong Amahan sa paghatag kanako og mga sitwasyon diin makaserbisyo ko, mas nakabantay ako niini. Kon maningkamot kitang makabantay sa mga butang libut kanato, adunay mga oportunidad sa pagserbisyo nga wala nato mahunahunai.”
“Bisan ang gagmay nga mga butang importante,” miingon si Rolle. “Kon ang gagmay lang nga mga butang ang imong pangitaon ug buhaton kini, makahimo gihapon ka og dakong kalainan.”
Dasiga ang Uban sa Paghimo og Tag-as nga mga Tumong
Si Daniel Godoy, 23, nagpakita og kahayag ug kamaayo, ug tungod gayud kini sa mga pagpili nga iyang gihimo. Usa siya ka impluwensya alang sa maayo pinaagi lang sa iyang ehemplo.
Isip bugtong nga anak nga gikan sa gamayng lungsod gawas sa Santiago, Chile, nagdako siya nga nakakita sa kamapahinunguron sa iyang mga ginikanan ngadto sa pagserbisyo ug sa ebanghelyo. Si Daniel mao ang labing una sa iyang stake nga miserbisyo og misyon sa edad nga 18 human gipaubos ang misyonaryo nga edad, nga nakadasig sa daghang batan-ong mga lalaki nga mangandam nga moserbisyo usab og sayo. Human sa iyang misyon sa Colombia, siya usab ang labing una sa iyang yutang natawhan nga mobiya sa nasud aron magtinguha og mas taas nga edukasyon. Ang iyang ambisyon midasig sa uban sa pag-eskwela. “Sa bisan unsang paagi midasig ako kanila sa paghimo og taas nga tumong,” miingon siya. “Nindot kaayo nga masayud nga ang gamay nga lakang nga akong gihimo nakatabang sa pagdasig sa ubang tawo.”
Ang pagkaangkon og edukasyon sa U.S. usa usab ka importanting bahin sa mga plano ni Daniel sa pagtabang sa uban ug sa pagbuhat og maayo sa umaabut. “Ang akong malungtaron nga tumong mao ang pagbalik ngadto sa Chile ug sa pagtabang sa mga tawo didto—sa pagserbisyo kanila. Mianhi ko tungod kay nasayud ko nga makaangkon ko og mga oportunidad nga mogiya nako sa pagtabang sa mga tawo sa Chile.”
Bisan pa man, miangkon si Daniel: “Dili ko perpekto. Apan naningkamot ko sa akong pinakamaayo, ug akong gibati nga makadasig kana sa uban ug mohatag kanila og kadasig sa pagpadayon usab.”
Ipaambit ang Gugma sa Dios
Human makaangkon og degree sa social work, si Katelyn Rae, 27, gikan sa California, USA, dili sigurado kon unsa ang sudlan nga panarbaho apan ganahan siya sa makatawhanong tabang [humanitarian aid]. Nakita niya ang impluwensya sa Dios nga naggiya kaniya “sa tanang higayon”, nga misangput sa pagkahimo niya nga direktor sa programa sa usa ka dili pangnegosyong organisasyon nga nakatutok sa pakigbugno sa kakabus sa tibuok kalibutan.
Si Katelyn nakatrabaho sa mga refugee sa Greece ug sa mga biktima sa pag-abuso sa Nepal, kinsa, mipasabut siya, “nagsinati sa pinakalisud nga mga panahon sa ilang kinabuhi. Maanaa lang uban kanila, wala kaayo koy daghang mahimo. Dili ko makausab sa mga gobyerno o mga pamaagi, apan ang usa ka butang nga akong mahimo mao ang paghigugma kanila.” Ug bisan kinsa ang iyang kauban, nakita niya kon unsa ka importante kini alang sa uban nga mobati sa gugma sa Dios. “Kon makatabang ko nga mahitabo kana, mobati ko nga nindot kaayo ang akong nahimo, nga ang Dios nalipay kanako.”
Ang iyang mga kasinatian mitabang kaniya nga makita ang mga problema sa ubang mga tawo gamit ang mas lapad nga panglantaw. “Isip mga young adult, sayon ra nga makatutok sa atong kaugalingong mga problema,” miingon siya. “Nakatutok kaayo kita sa, ‘Unsa ang akong trabaho?’ ug ‘Unsay akong gibuhat sa pag-eskwela?’ ug ‘Unsaon nako sa pagkakaplag sa akong mahangturong kompanyon?’ Kadtong tanan maayo nga mga butang, apan kon makahunahuna lang kita sa mga panginahanglan sa ubang mga tawo, nagtuo ko nga atong makaplagan kon unsa gayud ang atong gipangita.”
“Kon magpabilin lang kita nga duol sa Espiritu, ang Dios mogiya ug motudlo kanato, ug dayon makahimo kita sa pagbuhat sa tanang kaayohan nga gusto natong buhaton,” miingon si Katelyn. “Nagtuo ko nga ang tanan gustong mobuhat og maayo, bisan kon diha lang sa imong komunidad o sa imong pamilya. Matag gagmay nga butang, kon nagdasig ba sa usa ka higala o nakig-uban sa usa ka sakop sa pamilya, ang pagkaangkon lang niadtong gagmay nga mga higayon nga nahibalo nga nagbuhat ka sa unsay gusto sa Dios nga imong buhaton niana nga higayon mohimo og gamhanang epekto sa imong kinabuhi ug sa uban.”
Ang Imong Impluwensya
Dili kinahanglang mogawas ka ug magsugod sa pagtukod og mga orphanage aron makabuhat og kaayohan sa kalibutan. Dili kinahanglang magsugod ka og Instagram account sa mga litrato sa templo o mahimong direktor sa usa ka dili pangnegosyo nga organisasyon. Apan makahimo ka sa paghunahuna og pipila ka paagi sa paggamit sa imong talagsaong mga talento aron mahimong impluwensya alang sa maayo.
Nagtuo gyud ko nga kini nga mga pulong ni Presidente Thomas S. Monson (1927–2018), nga gitumong ngadto sa kababayen-an sa Simbahan, hingpit usab nga magamit ngadto sa mga young adult: “Kamo ang dakong gahum alang sa maayo, usa sa labing gamhanan sa tibuok kalibutan. Ang inyong impluwensya moabut lapas pa sa inyong kaugalingon ug sa inyong panimalay ug motandog sa uban sa tibuok kalibutan” (“Tulo ka mga Tumong nga Mogiya Kaninyo,” Liahona, Nob. 2007, 120). Busa padayon sa pagbuhat og maayo—ang tanang maayo nga imong mahimo. Ang imong impluwensya mokaylap lapas pa sa imong mahibaloan. Ug mag-uban nga mamahimo kitang kusog nga impluwensya alang sa kaayohan.