Mga Panalangin sa Pagpaningkamot sa Kaugalingon
Gikan sa usa ka Pagpamatuod sa Ikapulo ngadto sa mga Pakigsaad sa Templo
Alang ni Ted ug Carol Hyatt, ang espiritwal nga mga aspeto sa inisyatibo sa Simbahan sa pagpaningkamot sa kaugalingon nakahimo og mahangturon nga kalainan sa ilang kinabuhi.
Dili gayud makalimtan ni Carol Hyatt ang adlaw nga gihangyo siya sa iyang bishop sa pagdumala og klase sa pagpaningkamot sa kaugalingon kalabut sa personal nga panalapi. Siya ug ang iyang bana, si Ted, bag-o lang mibalik sa pagkaaktibo sa Simbahan human sa 42 ka tuig nga pagkawala, ug maulawon siya og kinaiya.
Si Carol nakaila sa iyang bishop, si Todd A. Josi, sukad sa bata pa kini. Mga dekada na ang milabay, si Todd mitambong sa iyang klase sa Sunday School.
“Karon, Bishop,” direkta niyang gisultihan si Bishop Josi human siya ug si Ted misugod na usab sa pagtambong sa simbahan, “dili ko gustong mohatag og pakigpulong. Dili ko gusto nga adunay calling. Gusto lang ko nga mosimba.”
Apan paglabay sa duha ka tuig, si Bishop Josi naglingkod diha sa balay sa mga Hyatt naghisgut kabahin sa inisyatibo sa Self-Reliance Services sa Simbahan—usa ka butang nga wala pa gayud madunggi ni Sister Hyatt. Human kini mapaila, ang bishop mihangyo kaniya sa pagdumala sa 12 ka semana nga klase sa mga baruganan sa malampusong pinansyal nga pagkatinugyanan. Dayon ang bishop mihatag kaniya og kopya sa manwal sa Personal nga Panalapi alang sa Self-Reliance.
“Wala ko masayud nganong mitando ko,” mihinumdom si Sister Hyatt. “Mahadlok kaayo ko nga matipon sa mga tawo nga dili nako kaila—ug ilabi na gyud nga kinahanglan kong maanaa usa ka gabii matag semana sulod sa 12 ka semana uban sa mga miyembro sa Simbahan nga siguradong mas aktibo sa ebanghelyo kay kanako. Wala gani ko kahibalo kon makatabang ba ko nila.”
“Kusog Kaayo ang Inspirasyon nga Akong Gibati”
Wala matingala si Bishop Josi nga gidawat ni Sister Hyatt ang buluhaton bisan pa sa iyang mga pagduha-duha. Miingon siya nga atol sa usa ka miting sa stake self-reliance committee sa Forest Grove, Oregon, USA, sa wala pa kini mahitabo, “Misulod sa akong hunahuna nga gikinahanglan ni Sister Hyatt ang panalangin sa pagdumala sa grupo sa personal nga panalapi. Kusog kaayo ang inspirasyon nga akong gibati.”
Naglaum si Bishop Josi nga pinaagi sa pagdumala sa klase, mabuntog ni Sister Hyatt ang usa ka dakong babag sa iyang espiritwal nga pag-uswag: ang pagbayad og ikapulo. “Samtang mipauli ko nianang gabhiona,” siya miingon, “duna koy kusog nga espirituhanong impresyon nga samtang si Sister Hyatt motambong niini nga klase, makasabut siya sa kaimportante sa pagbayad sa ikapulo.”
Mibati og kakuyaw ug ka dili andam, si Sister Hyatt misugod sa pagdumala sa iyang klase niadtong Oktubre 2017. Samtang gipangulohan niya ang mga diskusyon kalabut sa pinansyal nga pagdumala, paghimo ug pagsunod og budget, pagpangandam alang sa kalisdanan, paglikay sa utang, pagdumala sa pinansyal nga krisis, ug sa pagpamuhunan alang sa umaabut, mahimong komportable si Sister Hyatt isip usa ka facilitator apan dili komportable sa iyang personal nga ehemplo.
Sa dihang gibasa niya ang manwal agig pagpangandam alang sa iyang ikatulo nga klase, iyang nakat-unan nga ang “self-reliant nga pamaagi sa pinansyal nga pagkatinugyanan” naglakip sa pagbayad og ikapulo ug mga halad.1 Nakat-unan usab niya nga ang sukaranang baruganan niana nga pamaagi mao ang paghinulsol ug pagkamasulundon.2
“Atol sa usa sa ulahing mga leksyon, akong giangkon ngadto sa tanan nga tingali ako ra ang bugtong tawo sa tibuok nga grupo nga wala mobayad sa ikapulo,” mihinumdom siya. Kana nga pag-angkon nakaaghat og suporta gikan sa iyang 13 ka mga sakop sa klase ug mga diskusyon ug pagpamatuod mahitungod sa mga panalangin sa balaod sa ikapulo.
“Wala ko masayud nganong nabalaka kaayo ko sa ikapulo kaniadto, apan akong naamguhan nga kinahanglang seryuso ko nga makaangkon og pagpamatuod niini,” miingon si Sister Hyatt. “Samtang naminaw ko sa pagdasig sa akong grupo ug sa akong bana, ang Espiritu miingon, ‘Makahimo ka niini!’ Nakaangkon ko nianang gamayng dugang nga pagtuo nga akong gikinahanglan, ug nakaamgo ko nga mahimo ko nga mas maayo nga facilitator kon nagbuhat ko sa unsay akong gihangyo nga buhaton sa akong klase.”
Ang mga Tamboanan sa Langit
Pipila ka adlaw human sa iyang ika-11 nga klase, si Sister Hyatt miduol kang Bishop Josi sa simbahan, migunit sa iyang kamot, ug misulti kaniya nga andam na siya sa pagsunod sa balaod sa ikapulo. “Nalipay kaayo siya,” miingon siya.
Si Brother Hyatt, kinsa magtambongan sa klase sa iyang asawa, nalipay usab. Samtang mibayad siya sa iyang kaugalingong ikapulo sa miaging tuig, kanunay niyang awhagon si Sister Hyatt pinaagi sa pagpahinumdom kaniya sa usa ka panalangin nga iyang gipangandoy. “Dili kita makaadto sa templo gawas kon mobayad ka sa imong ikapulo,” miingon siya.
Niadtong Mayo 26, 2018, ang mga tamboanan sa langit naabli ug mibubu og panalangin kang Ted ug Carol Hyatt nga wala nila damha nga mahitabo sa dihang misugod si Sister Hyatt sa pagdumala sa iyang klase mga bulan ang milabay. Nianang adlawa, usa ka adlaw sa dili pa ang ilang ika-58 nga anibersaryo, mihimo sila og mga pakigsaad ug gi-seal diha sa Portland Oregon Temple.
Ang mga Hyatt mihulagway niana nga kasinatian isip “usa ka nindot nga adlaw ug usa ka talagsaon nga panalangin” nga kanunay silang mapasalamaton. Midugang si Sister Hyatt nga kanunay usab siyang mapasalamaton tungod sa usa ka maawhagon nga bana, usa ka dinasig nga bishop, ug usa ka klase sa mga estudyante nga, iyang gibati, mitabang kaniya labaw pa kay sa iyang pagtabang kanila. Aron sa pagpakita sa ilang gugma ug suporta, hapit ang tanang sakop sa iyang klase mitambong sa sealing sa mga Hyatt.
“Ang mga tawo daghan kaayo og makuha gikan sa inisyatibo sa Simbahan kalabut sa pagpaningkamot sa kaugalingon, ilabi na sa espiritwal nga bahin niini,” miingon si Sister Hyatt. “Ang espiritwal nga bahin niini ang nakahimo niini nga bililhon kaayo. Alang sa akong bana ug kanako, nakahimo kini og mahangturong kalainan.”