Ang Akong mga Buluhaton sumala sa Komperensya
“Usa ka higala misulti kanako nga samtang magbasa siya sa mga mensahe sa kinatibuk-ang komperensya, mohimo siya og lista sa unsay gipabuhat kanato sa atong mga lider sa Simbahan. Dayon gamiton niya ang lista sa paghimo og mga tumong nga makatabang kaniya sa pagsunod sa ilang tambag. Nakahukom ko nga mosugod og akong kaugalingong lista. Ang pagbuhat niini positibong nakaapekto kanako samtang namalandong ko sa mga mensahe ug mikonsiderar kon unsay kinahanglan nakong buhaton. Nakatabang gayud kini kanako sa pagtutok sa unsay labing importante.”
—Edna Washburn, Utah, USA
Unsay imong gibuhat nga lahi tungod sa imong nakat-unan sa kinatibuk-ang komperensya? Isumiter ang imong istorya sa liahona.lds.org o ipaambit kini sa facebook.com/liahona.
Ania ang pipila ka mga pagdapit nga atong nadunggan gikan sa kinatibuk-ang komperensya. Ikonsiderar ang pagribyu sa mga pakigpulong aron makadugang niini nga lista sa mga pagdapit.
“Paghunahuna [og] unsay atong mahimo aron mas mahangupon kita, madawaton, ug matinabangon [sa bag-ong mga higala], sugod gayud sa sunod Dominggo” (Ulisses Soares, “Usa ra Diha kang Kristo Liahona, Nob. 2018, 39).
“Mobasa sa hingpit ug mahunahunaong paagi niini nga pinadayag [sa panan-awon sa katubsanan sa mga patay, nga makita sa Doktrina ug mga Pakigsaad 138 ]” (M. Russell Ballard, “Ang Panan-awon sa Katubsanan sa mga Patay Liahona, Nob. 2018, 73).
“Balik ngadto sa balay sa Ginoo dala ang inyong samaran nga kasingkasing ug mga ngalan sa pamilya kutob sa mahimo” (Neil L. Andersen, “Nasamdan Liahona, Nob. 2018, 85).
Mga Tubag sa mga Pangutana
Aduna koy pagpamatuod kaniadto, apan niining bag-o lang mas lisud na ang pagtuo nga anaa ang Dios. Mahimo pa kaha nga sama kalig-on kaniadto ang akong pagtuo?
“Alang sa uban, ang pagtuo malisud. Usahay ang atong garbo nag-ali sa agianan. Tingali kay naghunahuna kita nga kita intelihente, edukado, o sinati, simple lang nga kita dili motuo sa Dios. Ug magsugod kita sa pagtan-aw sa mga relihiyon nga isip binuang nga tradisyon.
“Sa akong nasinati, ang pagtuo dili sama sa painting nga atong gitan-aw ug gidayeg ug hisgutan ug hunahunaon. Mas nahisama kini sa daro [plow] nga atong dad-on sa daruhan ug, pinaagi sa paghago, makamugna og tudling nga katamnan sa mga liso ug kini magsugod sa pagbunga og maayong resulta ug molampos.
“Paduol sa Dios, ug Siya mopaduol kaninyo. Mao kini ang saad ngadto sa tanang magtinguha sa pagtuo.”
Elder Dieter F. Uchtdorf sa Korum sa Napulog Duha ka mga Apostoles, “Motuo, Mohigugma, Mobuhat Liahona, Nob. 2018, 47.
Unsa ang imong mga pangutana nga natubag sa komperensya? Ipaambit ang imong kasinatian sa facebook.com/liahona .
Ang labing maayong mga butang niini nga kinabuhi nakasentro ni Jesukristo ug sa pagsabut sa mahangturong mga kamatuoran kon kinsa Siya ug kinsa kita sa atong relasyon uban Kaniya.”
Palawuman Pa ang Pagtuon
Pagdala sa Iyang Ngalan
Si Presidente Russell M. Nelson mipahinumdom kanato sa kaimportante sa pagdala sa ngalan sa Manluluwas nganha sa atong kaugalingon—isip mga disipulo ni Kristo ug isip mga miyembro sa Iyang Simbahan. “Kon kuhaon nato ang Iyang ngalan gikan sa Iyang Simbahan, wala nato tuyoa ang pagkuha Kaniya nga mao ang sentro nga gitutukan sa atong kinabuhi,” miingon siya.
“Ang pagdala sa ngalan sa Manluluwas diha kanato naglakip sa pagpahayag ug pagsaksi ngadto sa uban—pinaagi sa atong mga lihok ug sa atong mga pulong—nga si Jesus mao ang Kristo” (“Ang Sakto nga Ngalan sa Simbahan Liahona, Nob. 2018, 88). Daghan pa nga mga lider ang midapit usab kanato sa pagpamalandong kon sa unsang paagi nga mas maayo natong madala ang Iyang ngalan diha sa atong kaugalingon.
Si Presidente Henry B. Eyring midapit kanato sa pagpangutana sa atong kaugalingon sa duha ka mga pangutana: “Unsay angay nakong buhaton aron madala ang Iyang ngalan ngari kanako?” ug “Unsaon nako sa pagkahibalo nga ako naglambo?” (“Sulayi, Sulayi, Sulayi Liahona, Nob. 2018, 91).
Si Elder Robert C. Gay mitanyag og tulo ka mga paagi nga atong madala diha sa atong kaugalingon ang ngalan sa Manluluwas (tan-awa sa “Pagdala ngari Kanato sa Ngalan ni Jesukristo Liahona, Nob. 2018, 97–99).
Si Elder Paul B. Pieper mitudlo kon unsay gipasabut sa tinud-anay nga pagdala sa ngalan ni Jesukristo (tan-awa sa “Tanan Kinahanglan Gayud Modala diha Kanila sa Ngalan nga Gihatag sa Amahan Liahona, Nob. 2018, 43–45).
Ikonsiderar ang pagrekord sa imong mga hunahuna ug mga pagbati diha sa imong journal samtang nagtuon kon unsay gipasabut sa pagdala sa ngalan sa Ginoo diha kanimo.