Ang Labing Impluwensyal nga mga Tawo

Nakabasa na ba kamo og mga artikulo nga adunay mga ulohan sama sa “30 ka Impluwensyal nga mga Tawo Kinsa ubos sa 30” ug naghunahuna, “Unsaon nako nga maapil niana nga lista?” Sigurado nga naghunahuna ko kon sa unsang paagi nga mas maapil ko, mas makatabang, ug oo, mas importante (nga tingali nagpasabut usab nga nagkinahanglan ko nga mahimong mas mapaubsanon). Samtang ang atong mga kontribusyon mahimong ilhon sa kalibutan, usahay mas pribado kini nga katumanan sa atong mga pakigsaad uban sa Dios.

Ang atong impluwensya wala magkinahanglan nga mobiyahe ngadto sa laing nasud aron sa pagtabang og tawo sa layong dapit. Magsugod kini diha gayud sa atong mga panimalay, uban sa atong pamilya o mga kauban sa kwarto, ug sa atong mga silingan. Magsugod kini diha sa atong mga komunidad. Samtang mosugod kita sa pag-usab ug pagkahimo, ang “Panahon sa Pagserbisyo” (pahina 44) nagtanyag og pipila ka praktikal nga mga lakang sa pagserbisyo sa komunidad. Ang paggahin og panahon sa pagtabang sa uban tingali nagpasabut nga kinahanglan kitang mohimo og mga kausaban—tingali usa ka kausaban sa kasingkasing o usa ka kausaban kon asa igahin ang atong panahon ug kusog.

Diha sa “Usa ka Kusog nga Impluwensya alang sa Kaayohan” (pahina 46), ang pipila ka mga young adult mipaambit sa ilang kasinatian sa pagpalambo og Kristohanong gugma alang sa uban. Kini nga mga istorya nagpakita kon sa unsang paagi ang inspirasyon ug pagtuo makagiya sa mga young adult nga mahimong impluwensya alang sa kaayohan.

Si Elder Gavarret mipahinumdom kanato nga kita mga bayani na (tan-awa sa pahina 49). Sa premortal nga kinabuhi, atong gipili nga moanhi sa yuta, ug karon makahimo kita sa pagpili kon unsa nga matang sa kalainan ang gusto natong mahimo. Ang pagkakaplag sa atong personal nga misyon mogiya kanato sa pagserbisyo sa atong Amahan ug sa Iyang Anak, si Jesukristo.

Sa akong kasinatian, adunay mas daghan pa sa “30 ka impluwensyal nga mga tawo nga ubos sa 30” taliwala sa mga young adult sa Simbahan. Ang labing impluwensyal nga mga tawo nga akong nakita mao kadtong kinsa “[motuman sa] pulong, ug dili kay magpaminaw ra … niini” (Santiago 1:22). Sila kadtong mga tigtuman sa pakigsaad. Kamong tanan pwede nga mahimong labing impluwensyal nga mga tawo.

Nagpaabut nga makita ang kalainan nga inyong mahimo,

Liz Stitt

Labing Maayo nga Tambag …

Ang mga young adult mipaambit sa labing maayong tambag nga ilang nadawat sukad mahitungod sa paghimo og kalainan:

“Ipakita kon si kinsa ka! Ang matag usa kanato adunay kahayag nga mapaambit nga kita lamang ang makahimo. Kon andam kita nga mosuporta, moawhag, ug mopahayag sa kinabuhi sa uban sa atong kaugalingong talagsaon nga paagi, ang atong kahayag mosanag ug mogiya sa uban sa paghimaya sa Dios. Ayaw kahadlok sa pagsanag!”

—Whitney Henderson, Colorado, USA

“Sunda ang ebanghelyo ni Jesukristo aron ang mga tawo mangutana kaninyo nganong lahi kamo.”

—Pamela Castillo, San Marcos, Guatemala

“Kon makahigugma kita sa atong kaugalingon ug sa atong mga silingan bisan tipik lamang sa paghigugma sa Dios kanato, niana makaangkon kita og pagsalig ug pagtuo nga mabuhat gayud ang unsay gikinahanglan kanato.”

—Samuel Ward, Idaho, USA

“Imbis nga tutokan ang pag-usab sa tibuok kalibutan, tutoki ang pag-usab sa imong gamay nga luna niini.”

—Quincy Haisley, Utah, USA

Unsa man ang pinakamaayong tambag nga imong nadawat kabahin sa pagpakig-date og tawo nga kanhi nanlimbasug sa pornograpiya? Isumiter ang imong tubag sa liahona.lds.org hangtud Pebrero 28, 2019.