Fiefia ʻi he Momeniti ko iá

Lealofa Folotisī

Kuó u tui maʻu pē ki he founga ʻo e ʻaukaí. ʻi heʻeku tupu haké, naʻe akoʻi kiate au ʻoku hangē ʻa e ʻaukaí ko ha lotu ka ʻoku tānaki atu ki ai ha feilaulau. ʻi heʻetau ngāue ʻi he tuí, ʻoku tau taʻofi ai haʻatau maʻu meʻatokoni pe vai, ko ha feilaulau siʻisiʻi ke maʻu ha ngaahi tali ki heʻetau ngaahi fehuʻí pe ki he tokoni te tau ala fie maʻu.

ʻOku faʻa fie maʻu ke ʻaukai ha kau mahaki kimuʻa pea fakahoko honau tafá. ʻOku tau fakamaʻa ʻakitautolu ʻi he founga tatau ʻi he ʻao ʻo e ʻEikí, kae lava ke Ne ngāue mo fakamoʻui kitautolu.

Naʻá ku ʻiloʻi naʻá ku fie maʻu ʻa e ʻaukai ʻaho ʻe 10 ko ʻení ʻi he taimi pē ne fanongonongo ai ia ʻe Palesiteni Lāsolo M. Nalesoní. Naʻá ku fie maʻu ia ke u fakahaaʻi ai te u lava ʻo siʻaki ʻeku ngaahi uʻa mo e ngaahi holi fakaemāmaní. Naʻe fie maʻu ʻe hoku laumālié ha kiʻi mālōlō mei he ngaahi kovi ʻoku ala ʻomi ʻi he sosaieti ʻo e mītia fakasōsialé.

Naʻe fakaʻau ʻo faingofua ʻeku fakafepakiʻi ʻeku feinga ke mamata ki ha news feed pe ko e vakaiʻi e ngaahi post foʻoú, hili ha kiʻi vahaʻa taimi. ʻi he taimi ne kakato ai ʻa e ʻaukaí, naʻe ʻikai ngata pē ʻi heʻeku ʻiloʻi ʻa e mafuli e ngaahi meʻa ne u fakamuʻomuʻá, ka naʻe ʻi ai moʻoni hoku taimi lahi ange maʻanautolu naʻe mahuʻinga taha kiate aú.

ʻI he ngaahi ʻaho kotoa ko ia ʻe 10, naʻá ku ʻiloʻi kau atu ki ha ngaahi ʻekitivitī fakalukufua lahi ange mo ʻeku tamá kae ʻikai ke ʻoange pē ki ai haʻane taimi tokotaha ʻi he tekinolosiá. Naʻá fiefia ʻi he taimi ne ma fakataha ai ʻo fafanga e fanga manupuná, luelue ʻo ʻeveʻeva pe vaʻinga ʻi he paaká. Neongo ʻe lava ke ʻaonga ʻa e taimi fakataautaha ʻi he tekinolosiá, ka kuo fakangatangata ia mo taimiʻi koeʻuhi ke ʻoua naʻa faʻu ai ha ngaahi ʻulungaanga kovi.

Kuo fakamānako moʻoni ke nonga ʻi he momeniti pē ko iá, ʻo ʻikai fie maʻu ke hiki e meʻa kotoa pē ʻo fakafou ʻi ha laʻi tā pe ʻi ha post ʻoku houa ʻe 24 pē hono ʻaongá. ʻOku mahuʻinga ange ʻetau ngaahi momenití ʻi he taimi ʻoku ʻikai ke toe fuatautau ai ki he ngaahi views mo e likes.

Hili e ʻaukai ʻaho ʻe 10, kuó u fakatokangaʻi ʻoku ʻikai ke u sio maʻu pē ki he telefoní pea ʻoku ʻikai ke u vave ki he muimui ki he ngaahi notifications ʻoku ʻasi haké pe tali ʻi he taimi pē ko iá ki he ngaahi messages. Kuo lahi ange ʻeku tokangá ki he anga ʻo ʻeku fakaʻaongaʻi hoku taimí mo e feituʻu ʻoku ʻi ai ʻeku tokangá. ʻOku ʻikai ke u loto ke mole ʻeku ngaahi momeniti pelepelengesi ko ʻeni mo hoku husepānití mo hoku ʻofefiné, koeʻuhi pē ʻoku ou fuʻu moʻumoʻua ʻi he feinga ke ʻohake ia ʻi he ʻinitanetí.

Ko ia ai, ʻoku maʻu ʻe kinautolu ʻoku ou ʻofa aí, ʻa hoku taimí: Ko hoku Fakamoʻuí mo hoku fāmilí.