Rongorongo ni Kairiiri man te Aono
Atakin, kamataatakin, ao kawakinan ana tua te Atua
Bon te bwai teuana atakin taian tua. Ao te bwai teuana naba kamataatakin taian tua. Ao riki bon teuana, te anga nano ni kawakinan te tua.
Ngke I a tibwa kaina te Ekaretia, ngke tebwi ma teniua au ririki, I a moana n atai tuua. Ma e ngae n anne, I aki raoi mataata bwa teraa bukin ana tua te Uea, ao I aki naba norii kakabwaia man kawakinan tuua. Te katootoo, inanon au tai ni kakaonimaki ni kawakina Tuan te Mauri, korakorau ao teimanin marurungiu inanon au takakaro e bon aki tamaroa, ao n tarakina teuana, e a rang buakaka, riki ni kabotauaki ma kaain au tiim ake aki ongotaeka nakon Tuan te Mauri n arona ni kabane. A taraa n ae bon ngaiia ae ana, biri ao n aki kua 1, tiaki ngai, ma e ngae n anne, n te onimaki ao I reitanako au ongeaba.
Irarikina, kanga I noria bwa tuua a tuatua ao a tuka rikiraken au kawai. Ngkai, n tarakina, tao 48 te ririki n nako I norii tuua bwa anga te inaomata, a aki kairoroira. Teraa ae e bitaki? Ni koauana tiaki taian tua. Bon aron mataatau ao aroarou ae a bitaki.
Ngkai I a tarai tuua n aron are I taraa te kaetieti ae “uaua ti i nukan taian buraeki” are e tei n te bike, ma te kakaitau. N uaua ni kukurei i taari: n te tabo are e a tia ni katauaki bwa e mano, I a rineia n uaua imarenan taian buraeki. Eti, bwa I bon konaa n rineia n uaua n te tabo riki teuana, ma ngkana I karaoa anne n a bon kariaia te bwai are e na reke imwin te rinerine anne.
Ngkai I a rineia bwa na kawakin tuua ibukina bwa I karekea te rau ao te kawakinaki ae korakora ni karaoakina, ao inanon waakin te tai, I a tia n noori kakabwaia man te ongeaba nako iai.
Unimwaane Dale G. Renlund man te Kooram n Abotoro n te Tengaun ma Uoman e taetae iaon tuua ao n taku, “Ana babaire te Atua a kairaki ma kaetieti ibukira, are a taekinaki ni koroboki aika tabu bwa tuua. Tuua aikai bon tiaki bwaai aika karioaki ke tuua aika a bobotaki bwa tina rinerinea are ti tangiria ake a katukai bwa ana reireinira te ongotaeka. A bon irekereke nakon karikirakean arora n atua, n oki rikaki nakon Tamara are i Karawa, ao ni karekea te kimwareirei ae reitinako. E ngae ngke e tangiria te Atua bwa ti na mena iaon kawain te berita, E anganiira karineara bwa ti na bon rinerine.”2
N aron Nibwaai, i bon ibukiu, I ataia ae “N na bon ongotaeka”. 3
Te kimwareirei, te kukurei, te raunnano ae nene, namakinan te kakawakin ao te kantaninga ae akea tokina, a roko, n taina, nakoia nake a mataata ao ni kawakinii tuua. Ni koauana, bon ti man te onimaki ngkana ti kawakin tuua, ae ti na roko ao ni mataata iai. Ioane e taekina ana taeka te Uea, “Ngkana e kan toua mwin ana taeka Teuarei te aomata, ao e na ata te reirei, ba tao mai-iroun te Atua, ke tao I taetae mai Irou.” 4
Edgar A. Guest e korei taeka aikai n rawea tamaroan karaoan te mwakuri ni kaitaraa ae ti taekinaki.
I tangira riki noran te kabwarabwara nakon ae n a ongo n te bongina,
I tangira temanna ae e na nakonako ma ngai nakon ae e na tuangai te kawai.
Te mata bon te ataei ae nakoraoi, e ongotaeka riki nakon te taninga
Reirei aika a raraoi a kamangaongao, ma te katooto bon te kawai ae itiaki
Ao te kabanea n tamaroa n tia kabwarabwara bon mwaane ake a maiuakina aia taeka
Bwa noorakin te tamaroa bwa e na mwakuriaki bon te bwai ae a kainanoia aomata nako.
I bon konaa n reiakina aron karaoana ngkana ko kariaia bwa n a nora karaoana
I konaa n taratara baim ae e mwakuri, ma newem a birimwaaka ni kan biri.
Ao te taeka n reirei ake ko anga tao ana rang wanawana ma ni koaua,
Ma I bon tangira reken reiakinau man tarataraan te bwai are ko karaoia.
Bwa tao e na bure mataatau mai iroum ao reirei ake a ririeta ake ko anga,
Ma bon akea te aki mataataa n aron am mwakuri ao aron maium. 5
Te riki bwa te tia irira Iesu bon tiaki man ataakin tuua n te aro ni wanawana ao n aki maiuakinii. Te riki bwa te tia irira Iesu bon tiaki ibukin kawakinan tuua n te aro ni matakii. Te riki bwa te tia irira Iesu ni koaua bon te roko ni mataata n tuua ao n tauraoi ma nanom ni kawakin, ibukina bwa ti a tia n ataia ae bon kakabwaia mai iroun Tamara are i Karawa.