Ana Iteraniba te Aono
Tangiran te Kamatebwai—Tangiran te Reirei
N te karinrin n te aonraain ibukin karekean tibwanga n reirei i BYU-Hawaii, Rumetati Taarie ae 24-ana ririki—ni ni maiu e mwakuriia ngkai ibukin kabwaninan ana kooti iaon ana Boki Moomon.
E a tia ni karaoa ana mwakuri ni mitinare ae bwanin taina i Australia Sydney North Mition n 2014. E “moangare” Rumetati ngke e uringnga bwa e rangin kaangaanga irouna bwa e na oota n te bwai ae a taekinna aomata—tiaki n tii aron een aia taetae ma aron kamanenaan aia taetae ni karariki bon te taetae n ianena—ma, e kan reiakina taekan taian katei aika a kakaokoro man aki mwaninga aron te bobotaki ae kakukurei ni menana ikekei.
Ma—e a tia Rumetati n rinanon riki ae kaangaanga imwain nakona ni mitinare. A mate mwaanena aika a Bwebwe ngke a uarereke ao a raure ana karo. E mwananga nako New Zealand ma tamana ngke waniua ana ririki ni maiu bwa a na motirawa ao ni katekeraoa ana ka ruaiwa n ririki n te aba anne. Imwina n te tai are a kaitibo iai ma mitinare ao a bwabetitoia nakon te Ekaretia. Te kananokawaki, bwa e motirawa tamana n 2003 ao e kaikawaaki iroun ai tinana.
E bua ana reitaki Rumetati ma tinana ao e aki kona n uringnga naba teutana, ni karokoa are n te bong teuana ao e a oki nako Kiribati ibukin ana mwakuri ni mitinare, inanon menana n te titooa, tabeman aomata a ongo ana taeka tinana n titiraki ngkana iai ae e kinaa Rumetati—n tokin te tai, bon te manga ikotaki!
E mwakuri Rumetati bwa te tia kanakobwana n te rerio imwain ae e ibuobuoki n te JSSTUC1 n te reirei ibukin Kauarinan i Kiribati; te mwakuri ae babane nanona iai.
Ana tangira ibukiia ataei e buoka Rumetati ni karaoa ana babaire bwa e na waakina ana kamatebwai ae teniua ririkina iaon te reirei ibukin kauarinan.
E taku: “I tangiria n tia reirei n te reirei ibukin kauarinan ao n te bong teuana n taai aika a na roko, N na bon reireiniia oin natiu.” E uruaki ana laptop Rumetati n taai aika a nako—raoraona ae akoi e anganna ana kombiuta bwa e na kabongana bwa e aonga ni kona ni kamatebwai n te Titeiki Tienta i Teaoraereke. N te mwaiti ae katauaki e kamatebwai imarenan 4-6 te aoa ni katoa bong bwa e aonga ni kona ni kanakoi ana bwai ake e karaoi iaon taina.
E ngae ngke e kamatebwai Rumetati e kaan onoua te aoa ni katoa bong, e kakaitau ibukin te kakabwaia ao te tibwanga ni karikirakea ana reirei ibukina bwa e oota n te bwai are a reiakinna ngkai a na kabwaia iai ana utu ae akea tokina.