Ana Iteraniba te Aono
Ni Buoka te Komuniti—Te Mii ae Teimatoa ae e nang Koro bukina
“I kan riki bwa te taokita n te bong teuana,” e taku Lyalyn Otia Nebati ae 22 ana ririki ni maiu ngke I titirakinna bwa bukin tera ngkai e anaa ana kooti n te kemetituri n te aonraain: “Ai uana naba,” e reitia nako, “Au karo a reireinai bwa ngkana I tangiria bwa e na nakoraoi arou n taai aika a na roko I riai ni kamatebwai!”
E aki mwaninga taekan tamana Lyalyn are e motirawa n 2009. Tinana, are e tatangiria Lyalyn, bon te tina ae kakateke. E mwakuri ibukin auti ni kamaeka n te tautaeka ao ni kakatauraoi bwaai ibukin Lyalyn ao teniman tarina ma mwaanena—naake uoman a bon tei iaon waeia.
E tatangiriia aomata Lyalyn. E tibwaua nakoiu ana marooro ma te tia kouwi are e taku bwa e karako mwaitiia taan kouwi n Aban te Betebeke. E taku Lyalyn, “I kan riki bwa te taokita—ke te tia kouwi. Ni buoka au komiuniti bon miiu ae teimatoa ibukiu.”
I bungiaki n te aba ae uarereke ae Nauru, e maeka ngkai Lyalyn ma tinana ao tarina ma mwaanena iaon Tarawa, Kiribati ao e kamatebwai n te aonraain rinanon te Iunwetiri n te Betebeke Maiaki ao e kamanenai aoa aika a mwaiti—e aki tii kamatebwaia te keemetituri, ma te Ingiriti naba.
Ngkai bon ataein te reirei n te Moroni High School mai imwaina, e reiakina ao ni kukurei ni katan ni kanuaaki ni katoa bong are e tauraoi man kamatebwaian te euangkerio. Ma tetekeraoi, e tangiria Lyalyn n reiakinaki, ao ngke e karaoa ana mitinare ae bwanin taina i Biribin e tibwaua rabakauna n te euangkerio.
Lyalyn bon ataein te intitute naba ae e teimatoa—aia tii tabeua riki ana bwi ae e na karekea imwain ae e angabeebwa. “I tangira te intitute,” e taku “. . . bon te taneiai ae korakora ibukin te kamatebwai nakon te Tieminari. E kamwaita au atatai ibukin reirein te Ekaretia.”
Ma tiaki tii anne! E reiakinna Lyalyn bwa e na kanga n riki bwa te tia tarai aro inanon te mweenga. Ni katoa ingabong koraki e kaitiaki te auti ao ni karaoi tabena imwain ae e na nako n reirei n te kuura ae e ataia bwa ana mwakuri e kakabwaiaia ana utu ae bwanin.
E tangiria ni wareki booki aika tabu ao ni karaoia ni katoa bong. “I namakina ana tangira Tamau are i Karawa Ngkana I wareware ni booki aika tabu—ma rongorongon te onimaki e riinga nanou.”
Ngkana tao te rabakau ni bwain aonaaba ke n te maiu n tamnei, iai ana kakaitau ae korakora Rumetati ibukin te kamatebwai. Iai ana kantaninga ae e na nakoraoi ao ni kakukurei ibukin taai aika a na roko ngkai e reireiniia tabeman ni karekean tibwangana ni kamatebwai.