Ginagabayan ba Ako ng Diyos?

Ang ating buhay ay puno ng mahahalagang pagpili: ano ang kukuning karera, sino ang pakakasalan, saang paaralan mag-aaral, atbp. Ang ating mga buhay ay puno rin ng mga pang-araw-araw na alalahanin: pagpili sa pinakamainam na paraan ng paggamit ang oras, pagsikap na maunawaan ang doktrina, at paghanap ng kapayapaan sa gitna ng mga pagsubok. Sa kabuuan, kailangan natin ng personal na paghahayag. Pero minsan ay mahirap malaman kung paano ito matatanggap at kung paano ito malalaman kapag natatanggap na natin ito. Kapag hindi tayo nakakakuha o nalalaman ang mga sagot, maaaring maitanong natin, “Ang Espiritu ba iyon o ideya ko lang ito?” “Bakit ako nagkaroon ng inspirasyon na gawin iyon at pagkatapos ay nabigo?” “Bakit nararamdaman ko na hindi sinasagot ng Diyos ang aking mga panalangin?”

Sa kabutihang-palad, sa “Paggawa ng mga Desisyon: Kalayaang Pumili vs. Paghahayag” (pahina 44), ibinahagi ni Erin ang kanyang kuwento tungkol sa personal na paghahayag noong kailangan niyang gumawa ng isang desisyon na makapagpapabago ng kanyang buhay. Kahit na gusto ng Diyos na gabayan tayo, gusto Niya rin na tulungan tayo na matutuhang gamitin ang ating kalayaang pumili at gumawa ng mabubuting pasya.

Ang matutuhan kung paano nagsasalita sa atin nang personal ang Espiritu Santo ay isa pang mahalagang bahagi ng pagtanggap at pagkilala ng paghahayag. Maaaring nangyayari ito sa iba’t ibang paraan sa bawat isa sa atin. Sa pahina 48, maraming young adult ang nagbahagi kung paano sila nakatatanggap ng paghahayag.

Sa isang digital lamang na artikulo, ipinaliwanag ni Aspen na ang personal na paghahayag ay nangangailangan ng “Paggamit ng Iyong Espirituwal na Lakas.”

Ang pag-iisip sa hinaharap ay maaaring nakapanghihina ng loob, at maaaring nakakatakot pa nga. Lalo na bilang isang young adult. Pero kapag naaalala ko kung paano ginabayan ng Diyos ang aking buhay noon, binibigyan ako nito ng lakas ng loob na sumulong at kumilos, nagtitiwala na patuloy Niyang ibibigay ang paggabay na kailangan ko sa pana-panahon.

Tapat na sumasainyo,

Katie Sue Embley

Pinakamainam na Payo …

Ibinahagi ng mga young adult ang pinakamainam na payo na natanggap nila tungkol sa pagtanggap ng personal na paghahayag:

“Sinabi minsan ng EFY counselor ko, ‘Linangin ang iyong ugnayan sa Diyos bilang literal na Ama ng iyong espiritu. Kung mas palalakasin mo ang ugnayan mo sa Kanya, mas makauunawa at magagabayan ka.’ Nakagawa iyon ng malaking kaibhan sa mga panalangin ko.”

—Grant Goolsby, California, USA

“Pinakabisado sa lahat ng aming stake patriarch ang isang linya: ‘para makatanggap ng paghahayag, magbasa ng paghahayag.’ Natulungan talaga ako nito habang binabasa ko ang mga banal na kasulatan.”

—Shellby Tippetts, Missouri, USA

“Maglaan ng oras para magnilay-nilay. Pinagnilayan ni Joseph Smith ang Santiago 1:5 bago siya nagpasyang kumilos. Kung minsan, gusto ng Ama sa Langit na maglaan tayo ng oras sa panalangin at pag-aaral bago Niya ibigay sa atin ang mga sagot. Natututo tayo nang husto sa ganitong paraan.”

—Natasha Herbst, Utah, USA

“Makinig gamit ang iyong puso, hindi ang iyong mga tainga.”

—Sai Tua, American Samoa

Ano ang pinakamainam na payong natanggap mo tungkol sa pagsisisi? Ipadala sa amin ang iyong sagot sa liahona.lds.org bago sumapit ang Abril 30, 2019.