Na Qaqarauni kei na Vakawelewele
Me vaka ni sa tubu cake tikoga na veivakayarayarataki ni tevoro e vuravura, e dodonu meda tudei tiko ena noda sasaga yalodina ka na muataki keda bula yani ki Vua na iVakabula.
Au raica ena dua na gauna na tikidua ena dua na katuba leka ni dua na sitoa ka vakatoka oqo: “Marau, $15.00.” Au vinakata saraga meu kila sa na vakacava na levu ni marau au na rawa ni volia ena $15.00, ka’u mani curu yani ki loma. Au kunea ni levu na taube sau rawarawa kei na suvania—e sega ni dua na ka au raica ena rawa ni kauta mai vei au na mataqali marau ka vakaibalebaletaka tiko na tikidua! Ena veiyabaki sa oti, au sa dau vakananuma vakalevu na tikidua oya kei na kena rawarawa ni noda dau vakasaqara na marau ena veika e sau rawarawa ka sega ni tudei. Me vaka ni da lewe ni Lotu i Jisu Karisito ni Yalododonu Edaidai, eda sa kalougata ni da kila na sala kei na vanua meda kunea kina na marau dina. E kune ena kena bulataki vakamatata na kosipeli e tauyavutaka na Turaga ka iVakabula, o Jisu Karisito, kei na sasaga meda vakataki Koya.
E dua na neirau itokani lomani e idinia. Dua na siga ni draiva tiko yani ena sitima ni vanua ena veivanua me goleva, e raica o koya e dua na motoka ni kele tu mai na sala e liu. E raica totolo sara o koya ni sa tao tu na motoka ka sega ni takosova rawa na gaunisala. E biuta totolo sara yani o koya na qia ni sitima ki na kena ni leqa tubukoso, ka qai yavalata na bereki ki na iwasewase yadua ni sitima ka yacova yani nai ka tolu ni ikava ni maile (1.2 km) mai daku ni idini, ka toka kina e rauta ni 6,500 na tani na bibi ni veika e tawa tu kina. E sega na kaukauwa vakatamata me rawa ni tarova na sitima ni bera ni coqa na motoka, ka yaco vakakina. Eratou kalougata na tiko ena motoka ni ratou rogoca na sici dauveivakaroti ni sitima ka ratou dro ni se bera ni yaco na coqa. Ni veitalanoa tiko o idinia kei na ovisa ka cakava tiko na veivaqaqai, e lako yani vei rau e dua na marama ka cudru tu. E kaila vaka yani ko koya ni a raica kece na veika e yaco ka vakadinadinataka ni sega ni saga o idinia me leve mai na sala me rawa ni calata na motoka!
E matata saraga, kevaka e saga o idinia me a levea na vakacalaka oya ena nona biuta na gaunisala, ke a yali ni sa lutu tani o koya kei na nona sitima ka sega ni rawa ni toso ki liu ka na kele saraga vakasauri. E kalougata sara o koya, ni sala ni qiqi e cici kina na nona sitima e vesuka tiko na qiqi ni sitima me toso tikoga yani vakavinaka ki na vanua e gole tiko kina veitalia na veika e vakatao ena nona sala. Eda kalougata, ni o keda talega eda tiko ena dua na sala, e dua na salatu ni veiyalayalati eda yalayala kina ena gauna eda papitaiso kina meda lewe ni Lotu i Jisu Karisito ni Yalododonu Edaidai. E dina ga ni da na sotava tiko na vakatatao ena noda sala, na salatu oqo ena vukei keda meda toso tikoga ki na noda icavacava tawamudu talei kevaka eda muria dei tikoga.
Na raivotu ena vunikau ni bula e vakaraitaka vei keda na revurevu ni vakawelewele e rawa ni kauti keda tani mai na salatu ni veiyalayalati. Vakasamataka mada ni titoko kaukamea kei na salatu qiqo ka raba lailai, se na salatu ni veiyalayalati, e gole vakadodonu ki na vunikau ni bula, na vanua e vakarautaki tu vei ira na yalodina na veivakalougatataki ni noda iVakabula kei na Nona Veisorovaki. E laurai talega ena raivotu e dua na uciwai ka matataka tiko na dukadukali ni vuravura. E vakamacalataka na ivolanikalou ni uciwai oqo “e drodro voli” yani “volekata” na vunikau, ka sega ni yaco kina. E vakasinaiti tu na vuravura ena veika e vakauti keda tani ka veivakacalai sara madaga vei ira na digitaki, ka vakavuna me ra vakaweleweletaka na nodra veiyalayalati—ia, e muataki ira volekata na vunikau, ka sega ni yaco sara kina. Kevaka eda sega ni qaqarauni meda bulataka vakadodonu na noda veiyalayalati, na noda vakawelewele ena rawa ni liutaki keda ki na salatu cala se meda tomani ira era sa curuma yani ki na vale levu ka vakaitamera. Kevaka eda sega ni qaqarauni ena rawa ni da luvu ena uciwai dukadukali.1
E tiko e dua na sala ni qaqarauni ka dua na sala ni vakawelewele meda vakayacora kina na veika kecega, ka oka kina na bulataki ni kosipeli. Ni da vakasamataka na noda yalayala vua na iVakabula, eda sa qaqarauni tiko beka se vakawelewele? Ena noda ituvaki vakayago, eda sega beka ni dau vakadonuya eso noda ivalavala, ni da vakatoka na noda ivukivuki me tiko ena vanua buwawa, se wakia vata tu na vinaka kei na so na ka e sega so ni vinaka? Ena veigauna eda kaya kina na, “kevaka,” “vakavo ga,” se “ia” ena vakamuri ni nodra ivakasala na noda iliuliu vakaparofita se bulataki ena qaqarauni na kosipeli, eda sa kaya tiko, “E sega ni’u okati ena ivakasala oqori.” E rawa ni da vakadonui keda tiko ena kena levu eda vinakata, ia sai koya oqo na dina, e sega ni dua na sala dodonu me vakayacori kina na veika e cala!
Na iulutaga ni tabagone ni 2019 e tauri mai ena Joni 14:15, ni veidusimaki tiko na Turaga: “Kevaka, ko sa lomani au, mo talairawarawa ki na noqu ivunau.” Kevaka eda lomani Koya me vaka ni da tukuna tiko, ena sega beka ni rawa ni da vakaraitaka na loloma oqori ena noda bulataka ena qaqarauni na Nona ivunau?
Na noda qaqarauni ena bulataki ni kosipeli e sega sara ni kena ibalebale meda rakorako se osooso. E kena ibalebale me matau na noda vakanananu kei na ivakarau me vaka ni da tisaipeli i Jisu Karisito. Ni da vakasamataka na duidui e tiko ena qaqarauni kei na vakawelewele ena bulataki ni kosipeli, e toka oqo eso na vakasama meda nanuma:
Eda dau qaqarauni tiko ena noda vakavakarau ni sokalou ena Siga ni Vakacecegu kei na noda mai vakaivotavota ena sakaramede e veimacawa?
Ena rawa beka ni da qarauna na noda masumasu kei na vuli ivolanikalou se meda vakaitavi vakavinaka cake ena Lako Mai, Mo Muri Au—Me Baleta na Tamata Yadua kei na Matavuvale?
Eda sa qaqarauni tiko beka ena noda sokalou e valetabu, eda sa qaqarauni tiko beka ka nakita tiko meda bulataka na veiyalayalati eda vakayacora ena papitaiso kei na valetabu? Eda sa qarauna tiko beka na keda irairai ka rakorako na noda isulusulu, vakabibi ena ituvaki kei na veivanua tabu? Eda sa qaqarauni tiko beka ena kena daramaki na qameni tabu ni valetabu? Se sa vakaweweletaki ena vuku ni isulusulu ni gauna oqo ka sa taka levu e vuravura?
Eda sa qaqarauni tiko beka ena noda veiqaravi vei ira na tani kei na ivakarau ni noda qarava na noda itavi ena Lotu, se eda sega ni kauwai se vakawelewele ena veikacivi meda veiqaravi?
Eda sa qaqarauni tiko beka se vakawelewele ena veika eda wilika se sarava ena TV kei na noda yaya vakalivaliva veikauyaki? Eda sa qaqarauni tiko beka ena noda ivosavosa? Se eda sa vakamatautaka tiko na vosa sakasaka se vosa ca?
Na ivola lalai ni Me iSakisaki ni Tabagone e tiko kina na ivakatagedegede, ena kauta mai na veivakalougatataki momona kevaka eda vakamuria ena qaqarauni ka vukei keda meda tikoga ena salatu ni veiyalayalati. E dina ni volai me yaga vei ira na itabagone, e sega ni yalani na kena ivakatagedegede ni da sa biuta na parokaramu ni soqosoqo ni Cauravou kei na Goneyalewa. Ena dau yaga tikoga vei keda, ena veigauna kece sara. Na talevi ni veivakatagedegede oqo ena rawa ni vakavuna eso tale na sala ena rawa ni da qaqarauni kina vakalevu cake ena noda bulataka na kosipeli.
Eda sega ni vakalolovirataka na noda drotini me rawa ni da vakabau se me vakaloma vinakataka e dua. Eda tisaipeli i Jisu Karisito, ni sa vakaoqo esa noda inaki meda laveti ira na tani, meda laveti ira ki na vanua cecere, vanua tabu me rawa ni ra tamusuka na veivakalougatataki cecere.
Au sa sureti keda yadua meda vakasaqara na veidusimaki ni Yalo Tabu meda kila na veika e gadrevi meda moica ena noda bula me rawa ni veidonui vakamatau ki na noda veiyalayalati. Au kerea talega vei kemuni mo ni kua ni vakalewai ira era lakova tiko na ilakolako vata oqo. “Sa noqu na lewa, sa kaya na Turaga.”2 Eda sa lako curuma tiko na iwalewale ni tubu kei na veisau.
Na italanoa ena iVola i Momani me baleti ira na Amelekaiti sa vuki tani e taleitaki vei au. E dua na sala era sa vakaraitaka vei ira na tani ni ra sa sega ni via wilivata kei Jisu Karisito kei na Nona Lotu, era biuta e dua na ivakatakilakila damudamu ena yadredra me raica na tamata kece.3 Ena sala e veibasai, me vaka ni da tisaipeli i Jisu Karisito, eda vakatakilakilataki keda vakacava? E rawarawa beka mera raica na tani na Kena iserau vei keda ka kila se ocei eda matataka tiko ena sala eda qarauna tiko ena noda bula?
Me vaka ni da tamata ni veiyalayalati, e sega ni veiganiti meda tautauvata kei vuravura. Eda sa vakatokai me tamata duatani4sa dua dina na veivakamenemenei! Me vaka ni sa tubu cake tikoga na veivakayarayarataki ni tevoro e vuravura, e dodonu meda tudei tiko ena noda sasaga yalodina ka na muataki keda yani ki Vua, ka na veiyawakitaka sara na noda bula ni veiyalayalati mai na veivakayarayarataki ni vuravura.
Niu vakasamataka vakatitobu na rawati ni marau tawamudu, au raica kina ni so na gauna eda kunei keda ena vanua buwawa. Na kabu ni butobuto ena ilakolako ena salatu ni veiyalayalati e sega ni na levei rawa. Na veitemaki kei na vakawelewele ena rawa ni vakavuna meda mua cala ki na butobuto e vuravura ka yawaka sara na salatu ni veiyalayalati. Ena veigauna sa yaco kina na veika oqo, e sa vakauqeti keda na noda parofita lomani, o Peresitedi Russell M. Nelson, meda kusa lesu mai ki na salatu ni veiyalayalati. Au vakavinavinakataka vakalevu na isolisoli ni veivutuni kei na kaukauwa ni Veisorovaki ni noda iVakabula.
E sega ni rawa ni taucoko sara na noda bula. E dua ga na tamata ea rawata na bula vinaka sara ena nona bula ena vuravura vakatelesitieli oqo. Oya o Jisu Karisito. E dina ga ni sega ni rawa ni da taucoko, kemuni na taciqu kei na ganequ, e rawa ni da bula kilikili: kilikili kaya meda vakaivotavota ena sakaramede, ki na veivakalougatataki ni valetabu, kei na ciqomi ni ivakatakila yadua.
E vakadinadinataka na Tui o Penijamini na veivakalougatataki kei na marau e lako mai vei ira era muria na iVakabula ena qaqarauni: “Ka dua tale, au gadreva mo ni vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo; ka kevaka era sa yalodina tiko me yacova na ivakataotioti era na curu ki lomalagi, me ra tiko marau kina vata kei na Kalou me tawamudu.”5
Ena rawa beka ni voli na marau ena $15.00? E sega, ni rawa. Na marau e titobu ka tawamudu e yaco mai ni bulataki ena qaqarauni kei na vakatulewa matau na kosipeli i Jisu Karisito. Ena yacai Jisu Karisito, emeni.