Milton Camargo

Matai ni Daunivakasala ena Mataveiliutaki Raraba ni Matawilivola ni Sigatabu

A taura e voleka ni dua na yabaki vei Helio da Rocha Camargo, e dua na italatala ni dua tale na lotu, me lewa me sa papitaiso ki na Lotu i Jisu Karisito ni Yalododonu Edaidai. Ni oti ga vakalailai, sa lewa talega o watina, o Nair Belmira da Rocha Camargo, me sa muria na ivakaraitaki nei watina me papitaiso talega.

Ena gauna o ya, sa buketetaka tiko o Nair na luvedrau tagane, ka rau na vakayacana me o Milton. Na nodratou lewa vata na Camargo me ratou lewena na Lotu ena vakalougatataka na veitabatamata mai muri ni nodratou matavuvale.

A sucu o Brother Milton da Rocha Camargo enai ka 10 ni Maji, 1958, mai São Paulo, Brazil. A tokoni o Brother Camargo enai ka 6 ni Epereli, 2019, me iMatai ni Daunivakasala ena Mataveiliutaki Raraba ni Matawilivola ni Siga Tabu, ka kaya kina ni sa vakalougatataki ni a tubu cake tiko vakalewe ni Lotu.

“Sa kilai keda vakayadudua na Turaga,” a kaya. “Na Nona ituvatuva kivei keda yadudua sa cecere cake sara mai na kena eda vakasamataka rawa.”

A sotava o Brother Camargo na watina, o Patricia, ena gauna e vakatulewa tiko kina o tamana ena Tabana ni Kaulotu e Brazil Rio de Janeiro ena mua ni veiyabaki 1970. Rau a qai vakamau na veitau enai ka 4 ni Janueri, 1980, ni oti toka e dua na yabaki nona kaulotu oti mai o Brother Camargo mai na Tabana ni Kaulotu e Portugal Lisbon. E tolu na luvedrau.

Ena tekivu ni veiyabaki ni nodrau vakamau, rau a laki vakaitikotiko na Camargo mai Rio de Janeiro, na vanua a vakacavara kina o Brother Camargo na nona koroi raraba ni idinia mai na Instituto Militar de Engenharia. E muri a qai taura talega na nona master ni liutaki bisinisi mai na Univesiti ni Brigham Young.

Ena gauna ni nona cakacaka, a solia o Brother Camargo na nona gauna kei na igu me vakavulici ira na tamata. Sa cakacaka oti ena vica na univesiti, oka kina na Laureate Brazil Online Education, Universidad Tecnológica de México, ka walega oqo ena BYU-Pathway Worldwide me kena peresitedi ivukevuke ni lewenivuli.

Sa veiqaravi talega o Brother Carmargo vaka Vitusagavulu ni iWasewase, peresitedi ni Tabana ni Kaulotu ni Brazil Porto Alegre South (1997–2000), daunivakasala ena mataveiliutaki ni Koronivuli ni Kaulotu e Brazil (2002–5), bisopi, peresitedi ni kaulotu ena iteki, ka peresitedi ni kuoramu ni italatala qase.