Karisito: Na Rarama Sa Cilava na Butobuto
Kevaka ko vakila ni sa kataremoremo na bikeni ni nomu ivakadinadina ka sa via ubi iko mai na butobuto, mo yaloqaqa tiko. Maroroya nomu yalayala vua na Kalou.
Na noqu valenivolavola ena vale ni Soqosoqo ni Veivukei e qara vakavinaka toka yani ki na Valetabu e Salt Lake. Ena veibogi, e dei toka ga me vaka na liga ni kaloko, ena waqa mai na cina e tautuba ni valetabu ni sa karobo mai. Na valetabu e dua na bikeni veivakadeitaki ena tautuba ni noqu katubaleka.
Dua na bogi ena Feperueri sa qai oti ga oqo, a butobuto tu ga noqu valenivolavola ni sa dromu na siga. Niu rai yani ena katubaleka, e buto na valetabu. E sega ni waqa mai na cina. E vakasauri mai noqu vakila mai na rarawa. Au sa sega ni raica na doko ni valetabu au sa dau vakaraica tu ena veiyakavi ni vuqa na yabaki.
Na laurai ni butobuto ena vanua e namaka me laurai kina na rarama e vakananuma vei au ni dua na gagadre bibi e dodonu me tiko vei keda me rawa ni da tubu kina sai koya me da dau sema tiko ga ki na ivurevure ni rarama—o Jisu Karisito. Sai Koya na ivurevure ni noda kaukauwa, na Rarama kei na Vunibula kei vuravura. Ke sega nida sema dei tiko vei Koya e sa na tekivu meda mate yani vakayalo. Eda kila tu, e vakayagataka vakataucoko o Setani ena nona sasaga na icolacola vakavuravura eda sotava kece tiko. E cakacaka tiko o koya me vakamalumalumutaka na noda rarama, vakaleqa na kena isema, musuka na kaukauwa mai na kena ivurevure, ka biuti keda ena butobuto. Na icolacola eso oqori era tiki tu ni bula oqo, ia e dau saga vakaukauwa o Setani me vakatikitikitaki keda ka tukuna vei keda ni o keda ga eda sotava tiko.
Eso vei Keda eda Vesuki tu ena Yalorarawa.
Ni yacovi keda na leqa lelevu, ni mosi vakalevu na bula ka da sega ni cegu rawa, ni da mokulaki me vaka na tamata ena sala ki Jeriko ka biu tu me mate, ena lako mai ko Jisu me livia na iwali ni noda mavoa, ena laveti keda cake vakamalua, kauti keda ki na bure ni vulagi, ka vakatawani keda.1 Kivei keda eda yalorarawa voli e tukuna tu o Koya: “Au … na vakamamadataka na icolacola dou sa vakacolati kina, mo dou kakua ni vakila e dakumudou, … mo dou kena ivakadinadina ka lako yani mo dou kila, ni koi Au na Turaga na Kalou, au sa dau sikovi ira na noqu tamata ena nodra vakararawataki.”2 Ena vakamavotaka na mavoa o Karisito.
Eso vei Keda Eda Sa Oca Sara ga.
E kaya ko Elder Holland, “E sega ni gadrevi meda cici vakatotolo cake sara mai na noda kaukauwa. … Ia veitalia qori, au kila … ni vuqa vei kemuni ko ni cici totolo sara tiko, sa rui totolo sara ka vakayali kina na igu kei na yalo ni sasaga ka so na gauna e voleka ni lala vakadua sara ”3 Ni curumi keda na yalo ni nanamaki, e rawa ni da kalawa tale e muri ka kerea na Tamada Vakalomalagi se cava me da biuta. E tiki ni veika eda sotava ena noda bula koya meda vulica na veika meda kua ni cakava. Ia e vakakina, ena so na gauna sa rawa ni veivakaocai na icolacola ni bula. E vakadeitaka vei keda ko Jisu, “Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.”4
E loma soli ko Karisito me colata vata kei keda na noda ivua me mamada noda icolacola. Eda vakacegu vei Karisito.
Eso Vei Keda Eda Nanuma ni Sega ni Ganiti Keda na iTuvaki sa Vakotori tu.
E vuqa na vuna eda vakila kina nida sega ni ciqomi se meda ciqoma. E vakaraitaki ena Veiyalayalati Vou na sasaga levu e vakayacora ko Jisu me dolele yani vei ira kece na mataqali tamata: na vukavuka, dau kumuni vakacavacava, gonelalai, kai Kaleli, dau tagane, marama, kai Matanitu tani, ivalavala ca, kai Samaria, yada, Farisi, mataivalu ni Roma, kei ira na tawasavasava. E voleka ni italanoa kece e dolele tiko o Koya ki vua e dua ka sega ni ciqomi ena itikotiko.
EnaLuke 19 e talanoataki Sakiusa na iliuliu ni dau kumuni vakacavacava mai Jeriko. E a kabata e dua na vunikau me rawa ni raici Jisu ni takoso e kea. E vakacakacakataki koya na matanitu ko Roma, ka raici tu me dau veivakaisini ka ivalavala ca. E raici koya cake ko Jisu ena vunikau ka kaci yani, ka kaya, “Sakiusa, kusarawa, mo kevu sobu mai; niu na tiko ena nomu vale edaidai.”5 Ni sa raica ko Jisu na yalovinaka nei Sakiusa kei na veika e cakava vei ira na tani, sa ciqoma kina o Koya nona vakatutusa, ka kaya, “Sa yaco edaidai na bula ki na vale oqo, [baleta] ni sa luvei Eparaama ko koya talega oqo.”6
E tukuna vakamalua ga ko Karisito vei ira na Nifaiti, “Ia ko ni sa raica niu a sega ni vakatala tani e dua vei kemuni.”7 E veivakanumi vakaukauwa kina ko Pita ena Cakacaka 10 ni a kaya, “Ia sa vakatakila vei au na Kalou meu kakua ni vakatoka e dua na tamata me tawa savasava.”8 Me tautauvata tikoga na kena gadrevi vei ira na tisaipeli nei Karisito kei ira na Yalododonu Edaidai mera vakaraitaka na loloma dina vei ira yadua na tamata.9 E sureti keda tale tu ga ko Jisu ena veisureti vata ga e solia vei Sakiusa: “Raica, kau sa tu ena mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua, ka vakayakavi vata kaya ka na vakayakavi vata talega kei au ko koya.”10 E raici keda ena noda vunikau ko Karisito.
Eso vei Keda Eda Veinanuyaka tu e Vuqa na Taro.
Ena vica na yabaki sa oti e a bikai au tu ka vakasosataki au tiko eso na taro au a sega ni kunea rawa na kena isau. Dua na matakalailai ni Vakarauwai a yaco vei au e dua na tadra lailai. Au a raica ena tadra e dua na valeniwere lailai kau siqema rawa ni dodonu meu laki tucake e loma. E wavokita e lima na kena duru ka loveci sobu, ia na katubaleka e caka ena vatu. Au vosa kudrukudru, niu sega ni via curu e loma baleta ni sa rui curuoso. Sa qai curuma vakamalua noqu vakasama ni taci Jereti e a vakawaicalataka ena yalo vosota na vatu me cakava kina na iloilo makare. Na iloilo oya na vatu ka sa lako curuma e vica na ivakatagedegede ni veisau. Ena gauna e tara kina na Turaga na vatu nei taci Jereti, era qai serau ka rarama na loma ni waqa butobuto.11 Vakasauri ga sa curumi au na gagadre meu tiko e loma ni valeniwere lailai oqo ka sega tale ni dua na vanua au gadreva vakalevu cake. Sai koya sara ga na vanua—na vanua duadua ga—meu laki “raica” dina. Na taro era vakasosataki au tu e sega ni se lako tani, ia niu sa yadra mai e matata vinaka tikoga e noqu vakasama na taro: “Ena rawa vakacava ni o vakalevutaka cake na nomu vakabauta, me vakataka na taci Jereti, me rawa ni vuki na nomu vatu me rarama?”12
E buli noda vakasama vakayago me vakasaqara na kila-ka kei na kena ibalebale ena ivakarau e maucokona. Au sega ni kila kece na vuna sa rui vavaku kina na ilati ni bula oqo. E sega ni tu ena ivakatagedegede oqo na isau ni taro kece ni noda tubu tawamudu. Sai koya oqo na ivakatagedegede ga meda rawa kina ni mai vakadeitaka (se so na gauna na inuinui) ena ivakadinadina ni veika e sega ni rairai. E yaco mai na veivakadeitaki ena veisala eso e sega ni rawarawa na kena dikevi, ia e tiko na rarama ena noda butobuto. E kaya ko Jisu, “Koi au na rarama, kei na bula, kei na dina kei vuravura.”13 Kivei ira na vakasaqara na dina, taumada e rawa ni veivakalialiai ni vanua curu oso ni katubaleka caka ena vatu. Ia ena yalo dau vosota vakadede kei na taro yalodina, e rawa ni veisautaka na noda katubaleka caka ena iloilo o Jisu ki na rarama. Ko Karisito na rarama me laurai.
Eso Vei Keda Eda Nanuma tu ni na Sega ni Rawa ni da Vinaka Cake.
Na iboro damudamu ni Veiyalayalati Makawa e sega walega ni totoka ka raiyawa ia e iboro kata sara, kena ibalebale ni sa takava na kena roka na vutika ni sipi e na sega ni seyawa yani se vakacava sara na levu ni gauna e savati kina.14 E boletaka o Setani na vakasama oqo me vaka na iwau: ni sa takavi kulakula na vutika ni sipi vulavula ena sega ni rawa ni vulavula tale. Ia e cauraka ko Jisu Karisito, “Sa cecere cake kina na noqu ivalavala mai na nomudou ivalavala,”15 kei na mana ni Nona yalo loloma koya ni gauna ga eda veivutunitaka kina noda ivalavala ca, ena vakalesui keda tale Nona dra kulakula meda savasava sara. E vereverea beka na kena vakasama, ia e sega tale na kena veiba ni dina.
Na itaba mai na iStock.com/iinwibisono
“Ke sa vaka na ka kulakula na nomudou ivalavala ca, sa na vulavula me vaka na uca vulavula; ke sa damu vakula sa na vaka na vuti ka ni sipi.”16 E tukuna ena veivakadeitaki na Turaga: “koya sa veivutunitaka na … nona ivalavala ca, e na vosoti; ia koi au na Turaga, au na sega ni nanuma tale na nona ivalavala ca.”17 Na kena matailalai: Dou mada mai, me tou veivosaki vata.18 Eda sa ivalavala ca; kece ga.19 Lako mai vei ka veivutuni.20 Au na sega ni nanuma na ivalavala ca.21 Ena rawa ni o vakataucokotaki.22 Au na solia vei iko e dua na cakacaka.23 Sa vutika ni sipi vulavula ko Karisito.
Ia na ikalawa cava me cakacakataki? Na ki cava e rawa ni semati keda tale ki na kaukauwa nei Jisu Karisito ni da sa waqa boko tiko? E tukuna sara vakamatata o Peresitedi Nelson: “Sai usutu na caka kei na maroroi ni veiyalayalati tabu. … E sa sega ni dua na ka e buli vakatamata.”24 Me iusutu ni nomu bula ko Karisito.25
Kevaka ko vakila ni sa kataremoremo na bikeni ni nomu ivakadinadina ka sa via ubi iko mai na butobuto, mo yaloqaqa tiko. Maroroya nomu yalayala vua na Kalou. Taroga nomu taro. Vakawaicalataka ena yalo dau vosota na vatu me iloilo. Vuki yani vei Jisu Karisito, ka na lomani iko tikoga.
Sa kaya ko Jisu, “Koi Au na rarama sa cilava na butobuto, ia na butobuto sa sega ni kunea.”26 E kena ibalebale se mani vakacava na kaukauwa ni sasaga, ena sega ni rawa vua na butobuto me bokoca na rarama koya. Sega vakadua. E rawa ni ko nuitaka ni na tiko ga kei iko na Nona rarama.
E rawa ni o keda, se o ira noda daulomani, meda yali vakalailai ena butobuto. Me vaka e yaco ena Valetabu e Salt Lake, sa qai qiriti ko manidia ni yauqaqa, o Brother Val White. Era sa raica na tamata. Na cava e leqa ena cina ni valetabu? Taumada, era lako sara ga yani na tamata cakacaka ki na vei kisi yadua ni livaliva ka waqaca tale mai na cina. Sa qai veisautaki na batiri ki na ivurevure ni kaukauwa waqa vakataki koya ka ra qai vakaraica se cava e leqa kina.
E dredre sara nida waqaca vakataki keda ga na cina. Eda gadrevi ira na itokani. E gadrevi meda veivukei vakai keda. Me vakai ira ga na tamata cakacaka ena valetabu, e rawa ni da veivukei kevaka eda vakaraitaki keda yani, me vakaukauwataki tale noda batiri vakayalo, ka vakavinakataki na veika e leqa.
Na noda cina yadudua sa rawa ni vaka e dua ga na matanicina ena vunikau. Ia eda vakawaqara tiko na noda rarama lailai, me vaka ena Rara ni Valetabu ena Gauna ni Siganisucu, eda kauta vata mai e milioni vakamilioni na tamata ki na vale. E uasivi duadua, me vaka e veivakauqeti kina ko Peresitedi Nelson, eda rawa ni kauta mai na rarama ni Vakabula vei keda kei ira na tamata era bibi vei keda ena cakacaka rawarawa ni kena maroroi noda veiyalayalati. Ena sala e vuqa, e vakalougatataka na Turaga na cakacaka yalodina oqo ena kaukauwa kei na reki.27
Au vakadinadinataka ni ko sa lomani. E kila vinaka na Turaga na kaukauwa ni nomu sasaga. Ko sa toso tiko ki liu. Toso Tikoga. E raica o Koya nomu igu kece ni solibula ka okata mo vinaka kina kei na nodra vinaka o ira nomu daulomani. E sega ni vakawaleni tu ga nomu cakacaka. Ko sega ni tiko duadua. Na yacana sara mada ga, ko Imanueli, e kena ibalebale “Sa tiko kei keda na Kalou.”28 E tiko dina kei iko o Koya.
Kalawa tale mada vakavica ena salatu ni veiyalayalati, kevaka mada ga e sa rui buto ka sega ni rawa mo rai vakayawa. Ena rarama tale mai na cina. Au vakadinadinataka na dina ni vosa i Jisu, era vakasinaiti tu ena rarama: “Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou na kerekere ka na soli vei kemudou; dou tukituki ka na dolavi vei kemudou.”29 Ena yacai Jisu Karisito, emeni.