Elder Peter M. Johnson

Vakaitutu Raraba ni Vitusagavulu

Ni oti nona ciqoma o Peter M. Johnson, na luvena e dua na supavaisa ni iyauqaqa ka draiva ni tekisi, na sikolasivi me laki qito basketball ena Brigham Young University–Hawaii, sa mai tu oqo e mata ni qasenivuli ni inisitute.

“Mo sa na lewena ga oqo na Lotu, se o na wawa tale vakalailai,” a vakatusa o qasenivuli.

A dina sara o qasenivuli. Ni oti toka e dua na yabaki, a “lolo ka masumasu o Pita ka ciqoma na kena isau.” E a papitaiso ena 16 ni Okosita, 1986.

O Peter Matthew Johnson, e a ikava ni lima na gone, a sucu kivei McKinley Johnson kei Geneva Paris Long enai ka 29 ni Noveba, 1966, e Queens, New York, Amerika.

Rau a sere na nona itubutubu ni se qai yabaki 11 tiko kina, ka a gole o tinana ki Hawaii. Ni oti e dua na yabaki, a lewena o Peter na Matanitu Vaka-Islam ka yaco me Musulimi. Na vakaisoqosoqo vakaoqo a vakarautaka na veidusimaki kei na veitokoni me vakarautaki koya me ciqoma na kosipeli i Jisu Karisito.

Ni sa yabaki 15, a laki vakaitikotiko ki Hawaii o Peter vei tinana. E kea, a kila kina na qito—vakabibi na basketball—ka tekivu me sa mua yani ki na sala ni vuli ena univesiti, lewena na Lotu i Jisu Karisito ni Yalododonu Edaidai, laki kaulotu ena Tabana ni Kaulotu e Alabama Birmingham, ka vakamau e valetabu vata kei Stephanie Lyn Chadwick ena 1990. Rau a sota na veiwatini oqo ni rau qito basketball tiko ena Southern Utah University, ka sa va na luvedrau.

“Au tu oqo meu qarava na Turaga,” a kaya o Elder Johnson baleta na nona veikacivi ni Vitusagavulu. “Seu kawatamata cava se itovo cava se vanua cava au lako mai kina, sa noqu ilesilesi ga meu qarava na Turaga ena yaloqu, vakasama, kei na kaukauwa taucoko ka matataka na Turaga kivei ira na Nona tamata. Sa lomani keda kece na iVakabula. Eda sa luvena tagane kei na yalewa na Kalou.”

A taura o Elder Johnson na nona diqiri ni bejala kei na koroi cecere ena akaude mai na Southern Utah University kei na PhD ena akaude mai na Arizona State University. A cakacaka oti o koya vaka-parofesa veitokani e BYU–Hawaii, ivukevuke ni parofesa ena Brigham Young University, ka parofesa veitokani ena University ni Alabama. Sa veiqaravi oti vaka-Vitusagavulu ni iWasewase, peresitedi ni iteki, vunivola ni ilavo ena iteki, ka iliuliu ni kaulotu ena tabanalevu.