Era Vukei na Udolu ena Cakacaka ni Veivukei Raraba ni Kawatamata
E dua na nasi mai Idonisia e tucake tikiva tu e dua na tinani gone vou. O ira na nasi ena vale ni vakasucu era sa vakacavara na nodra vuli ni Helping Babies Breathe e ratou vakarautaka na LDS Charities.
E matadredredre e dua na cauravou mai Ghana ni vakavodoki ena wilijea ena veivuke ni dua na kenadau mai na LDS Charities.
Na liga ni veivukei raraba vakakawatamata ni Lotu, o ya na LDS Charities, a vakaitavi ena 2,885 na veivuke ena 141 na matanitu ena yabaki sa oti, ni cakacaka vata kei na 1,900 na isoqosoqo veitokoni ni veivukei vakakawatamata. Vakatekivu mai na 1985, sa solia oti na LDS Charities e sivia e $2.2 bilioni ni veivuke—oka kina na ilavoqaqa, iyaya, cau ni loloma ki na 197 na matanitu kei na veivanua, e kaya na ripote vakayabaki ni LDS Charities 2018 a vakaraitaki mai ena 19 ni Feperueri, 2019.
Na cakacaka ni veivukei vakakawatamata ni Lotu e veivakauqeti ena yalololoma kei na nodra lomani na luvena taucoko na Kalou ka vakamatatataki tiko kina e tolu na ivakavuvuli veidusimaki—na nodra kauwaitaki era leqa bibi, vakauqeti na bula-rawati koya, kei na kena vakauqeti na volodia kei na veiqaravi. Na ivakavuvuli oqo, e yavutaki ena vakabauti o Jisu Karisito, vakaukauwataki na tamata yadua kei na vuvale se kawatamata cava ga, lotu, se kai vanua cava.
E veivuke na Lotu ena veika e vinakati vakatotolo (oka kina na sasaga ni volodia) nodra qaravi na mataboko, qaravi ni vakasucu gone dramidrami, wainigunu savasava kei na tiko savasava, cula ni itatarovi, caka wilijea ka vakarautaki na titoko, vukei na tamata mera vakani ira vakai ira ena kena vakayagataki na iwali sa tu rawa kei na ivurevure, ka vukei o ira na senivalu nikua kei na veisiga ni mataka. Sa vakaitavi talega na Lotu ena veivakatorocaketaki ena itikotiko raraba ena 43 na vanua kei na yasana e Amerika kei Kenada mera vukei e sega tu nodra vale, vakatikori na senivalu, kei na gagadre tale eso.
“Eda sa vakavinavinaka vakalevu kei na veitokoni ki na tamata yadua era cau ki na kena gumatua na cakacaka ni veivukei vakakawatamata ena 2018,” e kaya o Sister Sharon Eubank, na peresitedi ni LDS Charities ka iMatai ni Daunivakasala ena Mataveiliutaki Raraba ni iSoqosoqo ni Veivukei. A kaya o koya ni ripote oqo sa tukuna tiko na nodra yalovinaka e tini vakaudolu na tamata.