iTukutuku ni Daukaulotu

Veitaratara e vale Sa vakadonui me ra veitaratara kei na nodra matavuvale na daukaulotu ena veimacawa ena siga ni vakavakarau ena itukutuku vakau ena talevoni, tukutuku vakau ena initaneti, veiqiriti ena talevoni, kei na veitalanoa ena vidio, ka kena ikuri nai vola e volai kei na imeli.

Yaragi ni ituvatuva me baleti ira na vakarau kaulotu. E dua na yaragi vou ena onolaini ni ituvatuva ni kaulotu mai na Tabana ni Daukaulotu ni Lotu ena rawa me vukei ira na vakarau laki kaulotu me yalodra ka yalomatuataka na gauna vinaka mera vakarau vinaka mera qarava kina na Turaga vaka-daukaulotu.

Daukaulotu veiqaravi. Vakatekivu ena Janueri 2019, era sa na vakatokai na itabagone daukaulotu veiqaravi ni Lotu mera “daukaulotu veiqaravi.” O ira kece na itabagone qase cake era kerea mera daukaulotu era na cakava ena sala vata ga, na kena ena onolaini, kei na veikacivi kece ni kaulotu—na veivakalotutaki ena kaulotu se na kaulotu veiqaravi—e veikacivi ga na parofita. O ira na itabagone qase cake ena vuku ni lewa eso era na sega ni veiqaravi ena kaulotu veivakalotutaki ia sa rawa mera kacivi mera kaulotu veiqaravi.

Sa rawa mera dara na goneyalewa daukaulotu na tarausese balavu. Sa rawa vei ira na yalewa daukaulotu me dara na tarausese balavu ena gauna ni nodra cakacaka vakaitaviqaravi e veisiga, ka mera tomana tiko nodra daramaka na liku se vinivo ni lako ki na valetabu kei na sokalou ena Sigatabu, koniferedi ni veiliutaki kei na iwasewase lailai, lotu ni papitaiso, kei na lotu ni vuli vakaulotu. Na kedra daramaki na tarausese ena vukea mera taqomaki na yalewa daukaulotu mai na mate e vakavuna na namu, mera katakata tiko kina na yalewa ena draki batabata, ka me rawa ni ra vodoka na basikeli.

Tauyavu ni tabana ni kaulotu, ka tuvai vou na iyalayala ni vanua. Sa mai tauyavutaki e va na tabana vou ni kaulotu, ka cokoti e tinikarua na tabana ni kaulotu ki na veitabana ni kaulotu era sa cici rawa tiko. Na veisau vakaoqo sa dau yaco tiko ena veigauna eso me rawa ni veiraurau ki na iwiliwili ni daukaulotu era veiqaravi tiko. Na tabana ni kaulotu vou o ya na Democratic Republic kei Congo Kinshasa East, Guatemala Antigua, Peru Limatambo, kei Philippines Antipolo. O ira na nodra itubutubu na daukaulotu tiko ena veitabana ni kaulotu era sa vakamacalataki tiko—na kena era tauyavutaki se sogo—era na ciqoma na ikuri ni itukutuku mai vei ira nodra peresitedi ni kaulotu.

Sa veisau na iwiliwili ni koronivuli ni kaulotu. Ena kena gadrevi mera vakayagataki vakavinaka na koronivuli ni kaulotu e vuravura raraba, era sa sogo kina na koronivuli ni kaulotu mai Argentina, Spain, Chile, kei na Dominican Republic. Ena kena sa sogo oqori, sa na vakayagataka kina na Lotu e 11 na koronivuli ni kaulotu, mai Brazil; Colombia; Igiladi; Ghana; Guatemala; Mexico; Niu Siladi; Peru; Filipaini; Provo, Utah, Amerika; kei Sauca Aferika.

Vidio ni veitaqomaki. Na vidio e wase tiko vaka 12 na The Safety Zone e tuvanaki me toroya cake na nodra taqomaki na 65,000 era daukaulotu tudei tiko ena gauna oqo vakakina o ira mera na mai kaulotu. Na imatai ni vidio e tuvanaki mera sarava o ira mera vakarau mai kaulotu kei na nodra itubutubu ni sa tauri oti na veikacivi ni kaulotu ka vakarau curuma na koronivuli ni kaulotu. Ena KNK, sa itavi nei daukaulotu me sarava tale na imatai ni vidio vakakina na vo ni 11. Ena dau yaco tiko na veivakananumi veitaqomaki kivei ira na daukaulotu ena nodra kaulotu tiko.