Elder Rubén V. Alliaud
Vakaitutu Raraba ni Vitusagavulu
Ni se yabaki 14 tiko o Rubén Alliaud a biuta mai na nodratou itikotiko mai Argentina me laki tiko vata kei nona momo me dua na yabaki e Amerika. Na tamana, o Rubén Reynaldo Alliaud, sa mate oti ka sa tekivu me yaco vei Rubén na “yalo veisaqasaqa.”
Sa lomaleqa sara na tinana, o Maria, ka sa vakauti Ruben ki Houston, Texas, me laki tiko vata kei tacina, o Manuel Buston, kei na nona vuvale. Sa qai kerea e dua na ka o Maria ki na vuvale nei ganena: “Kakua ni wasea na nomudou vakabauta ni Yalododonu Edaidai vei luvequ.”
Ia, na yalo ni kosipeli, a qai vosa vei cauravou sa bula dredre tiko. A raica o koya na sala a vakaduavatataka kina na Lotu na vuvale nei Bustos ena masumasu kei na veiqaravi, ia sa sega ni cakava rawa e dua na ka ni sa raica e levu na iVola i Momani ena tavata ni nona rumu.
A loma tarotaro, ka taura mai e dua na ilavelave ka raica na yalayala nei Moronai ni rawa ni kila ena masumasu ni sa dina na iVola i Momani.
“A tarai au na yalayala o ya,” a kaya na Vakaitutu Raraba ni Vitusagavulu kacivi vou. “Au sa vinakata meu wilika na ivola.”
A taura ki yalona na yalayala nei Moronai, ciqoma na kena veivakadeitaki, ka kaya vei nona Momo a kurabui kina ni sa vinakata me papitaiso. Sa qai vakauti Rubén sara o Momo Manuel ki Argentina me kerea na veivakadonui nei tinana. Sa qai mani papitaiso sara. Tekivu mai na gauna o ya, sa yaco na kosipeli vakalesuimai me iyaqa ni bula nei Alliaud.
A sucu o Rubén Vicente Alliaud enai ka 8 ni Janueri, 1966, mai Buenos Aires. A vakamau kei Fabiana Bennett Lamas ena Valetabu e Buenos Aires Argentina enai ka 17 ni Tiseba, 1992. E ono na luvedrau.
A rawata o Elder Alliaud na nona diqiri ni lawa mai na Univesiti ni Belgrano, mai Buenos Aires, ka marautaka e vica vata na cakacaka vakalawa, ka nona ilesilesi na lawa ni cakacala. Vakatekivu mai na 1998 a cakacaka vaka-manidia taukei kei Alliaud & Asociados.
Sa veiqaravi oti vaka-Vitusagavulu ni iWasewase, peresitedi ni Tabana ni Kaulotu e Argentina Córdoba, peresitedi ni iteki, lewe ni matabose e cake, bisopi, peresitedi ni kuoramu ni italatala qase, ka daukaulotu ena Tabana ni Kaulotu e Uruguay Montevideo. Ena gauna a kacivi kina, a veiqaravi tiko vaka-qasenivuli ni inisitute, imatai ni daunivakasala ena mataveiliutaki ni Koronivuli ni Kaulotu e Argentina, ka dairekita ni veika raraba.