Elder John A. McCune
Vakaitutu Raraba ni Vitusagavulu
Ni se qai tekivu cakacaka vakabisinisi, a veivosaki o Elder John A. McCune kei nona boso ena gauna sa kilai totolo kina ni o nona boso e sega soti ni kila na veika e baleta na Lotu i Jisu Karisito ni Yalododonu Edaidai. A tarogi Elder McCune o nona boso na vuna era sega kina ni danisi se kana bisikete kamica o ira na Yalododonu Edaidai.
“O au au dau kana bisikete kamica,” a kaya o Elder McCune vei nona boso ena matadredredre, ka masia na ketena. “Au vakabauta ni ko nanumi keimami cala tiko kei na dua tale.”
Ni rau sa veivosaki, a vakamatatataka o Elder McCune na vakasama cala baleta na Lotu. Sa laki mua na nodrau veivosaki ki na veika tale eso baleta na kosipeli i Jisu Karisito ka vakadeitaki vei Elder McCune na bibi ni tu vakarau me dau wasei na kosipeli.
“Eda sa tisaipeli ni iVakabula o Jisu Karisito, ena vanua cava ga eda tu kina, ena ituvaki cava ga, kei na madigi kece,” e kaya o Elder McCune. “Sa tu na noda itavi kei na cakacaka, ia era sa veitokoni ki na noda vuvale ka biuti keda ki na madigi meda wasea na kosipeli. Sai koya o ya na noda ilesilesi taumada vaka tisaipeli i Jisu Karisito.”
A sucu o John Allen McCune mai Santa Cruz, California, Amerika, enai ka 20 ni June, 1963, kivei Clifford kei Joan Schulthies McCune. A susu cake taumada mai Nyssa, Oregon, Amerika.
Ni oti nona kaulotu tudei mai Fukuoka, Japani, a vakamau o Elder McCune vata kei Debbra Ellen Kingsbury ena Valetabu e Salt Lake ena 1984. Erau nodratou itubutubu e va na gone ka ratou vakaitikotiko mai Midway, Utah, Amerika.
A taura o Elder McCune na nona diqiri ni bejala ni sainisi ena veika vakailavo mai Brigham Young University ka qai taura e muri na nona koroi cecere ni veiliutaki ena bisinisi ena veika vakailavo mai na University of California, Los Angeles (UCLA). A cakacaka vaka-ivukevuke liu ni peresitedi ka manidia dairekita ni Capital Investment Advisors mai na 1997 ki na 2012. E muri a qai laki peresitedi ni Tabana ni Kaulotu e Utah ni bera ni dauveivakarautaki ni cau ni isolisoli taumada kei na LDS Philanthropies.
A veiqaravi tiko o Elder McCune vaka-Vitusagavulu ni iWasewase ena gauna a kacivi kina. A veiqaravi talega vaka-peresitedi ni iteki, bisopi, daunivakasala ena matabisopi kei na mataveiliutaki ni tabana, ka peresitedi ni kuoramu ni italatala qase.