Na iTikotiko e Vakaicili Kina na Yalo ni Turaga
O na kunea na vu ni nomu reki levu sara ena nomu sasaga mo cakava nomu itikotiko me vanua ni vakabauta na Turaga ko Jisu Karisito ka dua talega na vanua e ukutaki tu ena loloma.
Kemuni na taciqu kei na ganequ lomani, au vakavinavinaka ni’u bau sureti tu me’u vosa vei kemuni enai ka 189 ni Koniferedi Raraba Vakayabaki ni Lotu i Jisu Karisito ni Yalododonu Edaidai. Ena tikinisiga oqo ena 1830, a tauyavutaka kina na Lotu o Josefa Simici ena veidusimaki ni Turaga. E a yaco ena nodratou itikotiko vakamatavuvale na Whitmer voleka e Fayette, New York. Eratou a tiko e lewe ono na lewenilotu kei na rauta ni 50 tale na tamata ena siga koya.
Dina ga niu a sega ni kila na ka a tukuna na Parofita ko Josefa se a vakacava tu na kena irairai ni a tu e matadratou na lewe vica oya, au kila na ka eratou vakila ena nodratou vakabauti Jisu Karisito. Era a vakila na Yalo Tabu, ka ra vakila ni ra sa tiko ena dua na vanua tabu. Era vakila vakaidina ni ra sa yalovata ka duabau.
Na mana ni veika e vakilai oya sai koya na ka eda vinakata kece tu ena noda itikotiko. Na ka e vakilai oqori e vu mai ena ka e vakamacalataka ko Paula, na “gadrevi ni tovo vakayalo.”1
Sa noqu inaki nikua me’u vakatavulica na ka au kila ena sala me rawa nida vakila tikoga na veika oqori ka sureta me dei toka ga ena noda matavuvale. Me vaka o sa kila mai na veika sa sotavi, ni sega ni rawarawa me caka oqori. Na veileti, dokadoka, kei na ivalavala ca e dodonu me vagalalataki. E dodonnu me curu e lomadra noda lewe ni matavuvale na loloma savasava i Karisito.
A raica mai o Atama kei Ivi, Liai kei Seraia, kei ira na itubutubu tale eso eda kila tu ena ivolanikalou ni dua na bolebole dredre oya. Ia era tu ena vei matavuvale kei na itikotiko na vei ivakaraitaki era veivakauqeti ka bucini vata vakamatau me vakadeitaki keda. Ia na vei ivakaraitaki oqori era vakavuna meda raica na sala e rawa ni yaco kina vei keda kei na noda matavuvale. O nanuma tiko na itukutuku enai ka 4 ni Nifai:
“Ka sa yaco ni sa sega na veileti ena vanua, ni sa tiko e lomadra na tamata na loloma ni Kalou.
“A sa sega na vuvu, se na veiqati, se na tiko yavavala, se na veibutakoci, se na lasu, se na laba, se na gagano ca; sa dina sara ni sa sega beka ni dua na matatamata mamarau cake ena kedra maliwa na tamata kecega sa bulia na liga ni Kalou.
“Sa sega na daubutako, se na daulaba, ka sega na Leimanaiti se dua na mataqali-aiti; ia era sa duavata ga, era sa luvei Karisito ka sa nodra na matanitu ni Kalou.
“Era sa kalougata dina! Ni sa vakalougatataki ira na Turaga ena nodra cakacaka kecega; io, era sa vakalougatataki ka tubu cake ena sautu me yacova ni sa oti yani e dua na drau katini na yabaki; era sa takali yani na imatai ni tabatamata mai na gauna i Karisito, a sa sega ni dua na veileti ena vanua taucoko.”2
Me vaka ni sa kila, a sega ni tu ga na gauna marautaki oya me tawamudu. E vakamacalataka na itukutuku enai ka 4 ni Nifai na ivakatakilakla a qai yaco e muri ni sa lutusobu na ituvaki ni bula vakayalo vei ira e dua na iwase ni tamata vinaka. E dua oqo na ivakarau sa mai basika tiko ena veigauna ki na tamata kecega, ena ivavakoso, ka, rarawataki sara, ni yaco ena matavuvale. Ni vulici na ivakarau oya, sa rawa ni da raica kina na sala meda taqomaka ka toroya cake me vakilai na loloma ena noda matavuvale.
Oqo na ivakarau ni sa lutusobu na ituvaki ni bula vakayalo e basika ni oti na 200 na yabaki ni taucoko tu na bula vakacegu e kauta mai na kosipeli:
Sa sasala mai na dokadoka.
Era sa sega ni wasea na tamata na ka e tiko vei ira tale eso.
Era sa tekivu raici ira cake eso ka raici ira sobu eso tale.
Era sa tekivu luluqa ena nodra vakabauti Jisu Karisito.
Era sa tekivu veicacati.
Era sa tekivu vakayacora na veimataqali ivalavala ca.
Era na kidava tiko na itubutubu yalomatua ka siqema na ivakatakilakila eso ni ra basika vei ira na lewe ni nodra matavuvale. Era na kauwai vakaidina sara. Ia era na kila na wakatu ni ka e vakavuna tiko oya na veivakayarayarataki nei Setani ni saga tu me muataki ira sobu na tamata vinaka ena salatu ni valavala ca ka calata kina na veivakayarayarataki ni Yalo Tabu. E sa na raica na itubutubu yalomatua ni koto na madigi oya ena muataki ni gone yadua, kei ira, mera ciqoma vakavinaka sara na veisureti ni Turaga mera lako mai Vua.
Ena sega beka ni taucoko na nomu tukuna vua e dua na gone me veivutuni, me kena ivakaraitaki, na dokadoka. O na rairai saga mo kerei ira na gone mera wasea vakalevu yani na ka e tu vei ira. E rawa ni o kerei ira mera kauta laivi na vakasama ni ra vinaka cake vua e dua tale na lewe ni matavuvale. Ia qori na ivakatakilakila au vakamacalataka taumada ni “Era sa tekivu luluqa ena nodra vakabauti Jisu Karisito.”
Oqori na idola me muataka nomu matavuvale me talave ki na vanua vakayalo o vinakata vei ira—ka mo tiko vata kei ira ekea. Ni ko vukei ira mera tubu ena vakabauta ni sa nodra Dauveivueti lomani ko Jisu Karisito, era na vakila ni ra gadreva mera veivutuni. Ni ra cakava oqori, sa na tekivu na yalomalumalumu me sosomitaka na dokadoka. Ni ra sa tekivu vakila na ka sa solia vei ira na Turaga, era sa na vinakata mera wasea vakalevu yani. Na veiqatitaki ni tutu se irogorogo ena yali yani. Na veisevaki ena takali ga yani ni tiko na veilomani. Kena itinitini, me vaka e yaco vei ira na tamata e vakavuna na Tui o Penijamini na nodra saumaki, na gagadre ni caka vinaka ena vaqaqacotaki ira mai na veitemaki ni ivalavala ca. Era a vakadinadinataka na tamata ni Tui o Penijamini “ni ra sa sega tale ni gadreva ni kitaka na ka ca.”3
Ia na taraicake ni vakabauti Jisu Karisito sa itekivu ni vakalesui tale mai na ituvaki ni bula vakayalo sa lutu sobu ena nomu matavuvale kei na itikotiko. Na vakabauta oya ena rawa ni kauta mai na veivutuni mai na nomu vunautaka tiko mo saqata na ivakatakilakila ni lutusobu ni ituvaki ni bula vakayalo.
Ena vinaka me ivakaraitaki nomu veiliutaki. Mera raica na lewe ni vuvale kei ira na tani ni tubu tiko nomu vakabauti Jisu Karisito kei na Nona kosipeli. E se qai vakarautaki wale toka ga oqo vei iko na veivuke levu. Era kalougata na itubutubu ena Lotu ena veivakauqeti ni lewenivuli me baleta na matavuvale kei na tamata yadua. Ni ko vakayagataka, ko na taracake nomu vakabauta kei na nodra vakabauta na luvemu vua na Turaga ko Jisu Karisito.
Tubucake ena Vakabauta
E sa na tubu nomu vakabauta na iVakabula ni ko muria na vakatutu nei Peresitedi Russell M. Nelson mo wilika tale na iVola i Momani. Mo makataka na vei malanivosa kei na vei vosa era dusia tiko na iVakabula. E sa tubu tiko nomu vakabauti Jisu Karisito. Ia me vaka e dua na itei vou, ena vuca yani na vakabauti Jisu Karisito vakavo kevaka o kunea tikoga na iwali mo vakasamataka ka masulaka me vakalevutaki.
Na ivakaraitaki ni nomu tubu ena vakabauta era na sega ni muria beka oqo na lewe kece ni nomu matavuvale. Ia mo dei ena veika a sotava ko Alama Lailai. E mositi koya ni a gadreva me veivutuni ka vosoti, a qai nanuma o koya na vakabauta nei tamana vei Jisu Karisito. Era na qai laki nanuma na luvemu nomu vakabauta na iVakabula ena gauna era sa na gadreva dina sara ga kina na veivutuni. A kaya o Alama ena vuku ni gauna vakaoya:
“Ka sa yaco ni’u sa kuretaki tu ena rarawa, ena noqu sa cukiraki tu ena vakasamataki ni levu ni noqu ivalavala ca, raica, au sa nanuma talega ni’u sa rogoci tamaqu ni sa parofisaitaka vei ira na tamata me baleta na nona lako mai e dua ka yacana ko Jisu Karisito, e dua na Luve ni Kalou, me mai sorovaka na ivalavala ca ni vuravura.
“Ia ni’u sa nanuma rawa na ka oqo, au sa tagi e yaloqu: Oi kemuni Jisu, na Luve ni Kalou, ni yalololoma vei au, koi au ka’u sa tu ena ka sa gaga sara ni yaluma, ka sa vakavolivoliti au na sinucodo tawavakaiyalayala ni mate.
“Ia oqo, raica, ni’u sa vakasamataka na ka oqo, au sa sega ni nanuma tale na noqu mosi; io, sa oti vakadua na noqu cukiraka na noqu vakasama baleta na noqu ivalavala ca.”4
Masulaka ena Loloma
Me ikuri ni ivakaraitaki ni sa tubu nomu vakabauta, sa rawa ni vakavotukana sara na nomudou masumasu vakamatavuvale me rokovi kina na itikotiko. Sa dau digitaki e dua me gusu ni masu ni matavuvale. Ni sa cabori na masu vua na Kalou ena vukudra na sa tekiduru ka vakarorogo, sa na tubu na vakabauta vei ira kece. Sa rawa ni ra vakila na ivakaraitaki ni loloma vua na Tamada Vakalomalagi kei na iVakabula. Ena gauna e cavuti ira kina na lewe ni vuvale era tekiduru wavoki tiko, o ira e tiko nodra gagadre, sa rawa ni ra vakila na loloma mai vei ira kece na lewe ni vuvale yadua.
Kevaka e sega madaga ni ra tiko e vale na lewe ni vuvale, na masu e rawa ni taracake na ivau ni loloma. Na masu ni matavuvale e rawa ni yaco ki na veiyasai vuravura. Sa vakavuqa au vulica ni a masulaka tiko e dua na lewe ni vuvale e tiko mai vakayawa na ka vata ga au masulaka tiko ena gauna vata oya. Vei au, na ivosavosa makawa “Na matavuvale e masu vata era duavata” sa rawa ni kuri me “Na matavuvale e masu vata era duavata dina ga, dina ni ra tu veiyawaki.”
Vakavulici ni Veivutuni Totolo
Ena vuku ni sega sara ni dua vei keda e vinaka sara ka dau mavoa rawarawa na yalo, sa rawa ni yaco na matavuvale me vanua ni vakacegu kevaka eda yalodina ka veivutuni vakatotolo. E rawa ni ra biuta na itubutubu e dua na ivakaraitaki. Na vosa kaukauwa se vakasama tawadodonu sa rawa ni veivutunitaki vakatotolo ena yalodina. Na rawarawa ni vosa na “vosoti au” sa rawa ni walia na mavoa ka sureta ruarua na veivosoti kei na veilomani.
Sa ivakaraitaki vei keda na Parofita ko Josefa Simici ni sotava tu na veivakacacani kei ira na dauveivakaisini ka vakakina na veileti ena nona matavuvale. E totolo nona veivosoti dina ga ni kila tu nira na vakacaca tale na dauveivakacacani. A kere veivosoti o koya, ka solia ena yalo galala.5
Vakarautaki na Yalo ni Kaulotu
Ratou a sasaga vagumatua na luvei Mosaia me kau na kosipeli ki na tamata kecega. E vu na gagadre oqo ena ka eratou a dui sotava ni ratou sa veivutuni. Eratou sega ni ciqoma rawa na vakasama me na sotava e dua tale na tamata na revurevu ni ivalavala ca me vakataki ratou. O koya eratou biliraki kina me vica vata na yabaki, sotava na dredre, kei na veika rerevaki me kau ga na kosipeli i Jisu Karisito vei ira nodratou meca. Ni vaka tu oya, eratou sa qai kune reki vei ira na lewevuqa era sa veivutuni ka vakila na marau nira sa vosoti ena vuku ni Veisorovaki nei Jisu Karisito.
Era na tubu na lewe ni noda vuvale ena nodra gadreva mera wasea na kosipeli ni ra vakila na reki nira sa vosoti. E rawa talega ni yaco oya ni ra vakavouia nodra veiyalayalati ena vakayagataki ni sakaramede. Ena tubu na yalo ni kaulotu ena noda itikotiko ni ra sa na vakila na gone kei ira na itubutubu na reki ni veivosoti ena soqoni ni sakaramede. Ena nodra ivakaraitaki ni veidokai, e rawa nira veivukei vakai ira na itubutubu kei na gone mera vakila na reki. Ena rawa ni dede sara yani na rekitaki ni kena vuki noda itikotiko me vanua ni veivakarautaki ni daukaulotu. E sega nira na kaulotu kece, ia era na vakila kece na gagadre mera wasea na kosipeli, ka sa vakavuna mera vakila kina na veivosoti kei na vakacegu. Se ra veiqaravi tudei tu oqo se sega, eda rawa ni vakila kece na reki ni kau yani kosipeli vei ira na tani.
Sikovi ni Valetabu
Vei ira na itubutubu kei ira na gone, sa madigi vinaka sara na valetabu me rawa ni ra vakila ka taleitaka na veivanua eso vakalomalagi. Sa dina sara oya ni ra se lalai na gone. Era sa sucu na gone ena Rarama nei Karisito. E dua mada ga na gonelailai ena rawa ni vakila ni vanua tabu na valetabu. Ena vuku nira lomani ira na luvedra lalai na itubutubu, na valetabu e matataka vei ira na inuinui ni sa rawa mera lomana na luvedra ena nodra vuvale tawamudu—me tawamudu.
Eso vei kemuni e tiko na itaba ni valetabu ena nomuni itikotiko. Ni vakuri tiko na levu ni valetabu e vuravura taucoko, sa rawa kina vei ira e vuqa na itubutubu mera sikova vakamatavuvale na lomanibai ni valetabu. E so ena rairai tiko ena dola ni vale ena gauna era tara oti kina na valetabu. E rawa ni ra tarogi na gone se cava era vakila ni ra voleka yani se tiko e loma ni valetabu.
E rawa ni ra vakadinadinataka na itubutubu na bibi ni valetabu ki na nodra bula. E dau tukuna wasoma o Peresitedi Ezra Taft Benson, e dua ka taleitaka vakalevu na valetabu, ni dau saravi tinana ni yania vakamatau sara nona isulu ni valetabu.6 E talanoataka ni nanuma lesu ni se gonetagane voli ni dau raica me ratou gole yani vakamatavuvale me ratou laki tiko ena valetabu.
Ni sa mai Peresitedi ni Lotu, e dau tiko ena valetabu okoya ena vei siga vata ga ena veimacawa. Ena dau cakava na cakacaka ni valetabu vua e dua na tubuna. A vakavu oya ena nodrau ivakaraitaki nona itubutubu.
Noqu iVakadinadina
O na kunea eso na vu ni nomu reki vakalevu sara ena nomu sasaga mo cakava nomu itikotiko me vanua ni vakabauta na Turaga ko Jisu Karisito ka dua talega na vanua e ukutaki tu ena loloma, na loloma uasivi i Karisito. A tekivutaki na Vakalesui tale mai ni kosipeli ena dua na taro malumalumu e vakasamataki mai ena dua na itikotiko malumalumu, ena rawa ni tomani tikoga oqori ena noda dui itikotiko ni da tauyavutaka ka vakatovotovotaka ekea na ivakavuvuli ni kosipeli. Oqo e sa noqu inuinui ka gagadre titobu ni lomaqu ni’u se gonetagane lailai. O ni sa raica taucoko na veitikotiko vakaoya. E vuqa vei kemuni, ena veivuke ni Turaga, ko ni a bulia kina.
Eso era tovolea ena nodra igu taucoko na veivakalougatataki oya, ia a sega ni vakadonui. Na noqu yalayala vei kemuni oya e dua ka a cakava talega vei au e dua na lewe ni Kuoramu ni iApositolo Le Tinikarua. Au a kaya vua mai na digidigi era sa cakava eso ena lewe ni neitou vuvale sema, au vakatitiqataka ni keimami na laki tiko vata tale ena vuravura sa bera mai. E tukuna tale kau se nanuma tu ga, “O sa leqataka tu na veika cala. Mo bulataka ga na bula e kilikili ena matanitu vakasilesitieli, ena totoka cake sara na veivakarautaki ni matavuvale ka sega ni vaka ko se bau vakasamataka rawa vakadua”
Au vakabauta ni na solia mai o koya vei keda ena bula oqo na inuinui marautaki oya ni da sa cakava na ka kece sara meda rawata kina na bula tawamudu, o keda kei na noda matavuvale. Au kila ni sa ituvatuva ni bula marau na ituvatuva ni Tamada Vakalomalagi. Au vakadinadinataka ni Nona ituvatuva ena vakarawarawataka vei keda yadua eda sa solia oti noda igu meda laki vauci tawamudu vakamatavuvale.
Au kila na idola ni matabete eso ka vakalesui tale mai vei Josefa Simici e sa vakadewataki tiko mai ka se sega tale ni mai yali me yacovi Peresitedi Russell M. Nelson. Sa ra vakadeitaka na vei idola oqori na vauci ni matavuvale edaidai. Au kila ni lomani keda na Tamada Vakalomalagi, na Luvena vakayalo, ena loloma e taucoko sara. Au kila ena vuku ni Veisorovaki nei Jisu Karisito, sa rawa ni da veivutuni, vakasavasavataki, ka yaco meda bula kilikili ka laki bula tawamudu vakavuvale kei na Tamada Vakalomalagi kei na Luvena Lomani, ko Jisu Karisito. Au sa vakadinadinataka oqo ena yaca i Jisu Karisito, emeni.