Elder Jorge M. Alvarado

Vakaitutu Raraba ni Vitusagavulu

Rau a lewena na Lotu o Miguel kei Iris Alvarado mai Puerto Rico ena 1977 ni se qai yabaki ono tiko kina o luvedrau tagane o Jorge. A papitaiso na cauravou o Jorge ni oti e rua na yabaki ka sega vakadua ni bau calata na veisoqoni ni Siga ni Vakacecegu.

“Ia na noqu saumaki vakai au a qai yaco niu sa yabaki 16,” a kaya na Vakaitutu Raraba ni Vitusagavulu kacivi vou.

Ena koronivuli torocake, a tekivu me peresitedi ni nona kalasi ni semineri ena nona taoni mai Ponce. Era a vulica tiko na kalasi na iVola i Momani ena yabaki o ya. Na nona ilesilesi vou a veivakauqeti me vakadikeva na yalona.

“Au a tarogi au kina, ‘Au sa kila dina beka ni sa dina na iVola i Momani?’ Meu peresitedi vakacava ni noqu kalasi ni semineri keu sega tu mada ga ni kila ni dina na ivola oqo?”

A tomika cake na nona iVola i Momani ka tekivu ena imatai ni gauna me wilika ena yalona dina.

“Au a tekiduru ka masu, kau sa kila kina e kea ni sa dina sara,” a kaya.

Sa mai yaco tiko na iVola i Momani me veivakauqeti savasava ki na bula nei Elder Alvarado.

Ni kaulotu tudei tiko ena Tabana ni Kaulotu e Florida Tampa, a wasea na iVola i Momani kivei ira kece a vakavulica. E muri, a vulica na ivola oqo vata kei watina kei iratou na luvedrau. Ni peresitedi tiko ena Tabana ni Kaulotu e Puerto Rico San Juan, a bolei ira nona daukaulotu mera taleitaka ka wasea yani na iVola i Momani.

Ia oqo, ni sa mai Vakaitutu Raraba ni Vitusagavulu, sa dau guta tikoga o Elder Alvarado me sureti ira na tamata mera raica na dina e veisautaka na bula mai na iVola i Momani.

A sucu o Jorge Miguel Alvarado Pazo enai ka 21 ni Noveba, 1970. Enai ka 19 ni Tiseba, 1992, a vakamau kei Cari Lu Rios ena Valetabu e Washington D.C.

Ni oti nona vuli veiliutaki ni bisinisi ena Univesiti ni Puerto Rico, a laki cakacaka ena vica na veiliutaki ni bisinisi mai Puerto Rico vakakina ena vanua o Amerika. Dua na gauna lekaleka sa oti, a cakacaka ena itikotiko liu ni Lotu mai Salt Lake City me manidia raraba ni Veiqaravi ni Bula-Rawati Koya.

Sa veiqaravi oti o Elder Alvarado vaka Vitusagavulu ni iWasewase, peresitedi ni iteki, lewe ni matabose e cake, peresitedi ni tabana, ka iliuliu ni kaulotu ena tabanalevu.