Era Veiqaravi na iApositolo e Vuravura Raraba
Ena imatai ni gauna ena itukutuku ni Lotu vakalesuimai, era a soqoni kece vata yani na lewe ni Mataveiliutaki Taumada kei iratou na Kuoramu ni iApositolo Le Tinikarua ena dua na vanua ena taudaku kei Amerika, ena nodra a gole kece ki Itali ki na vakatabui ni Valetabu e Rome Italy ena Maji ni 2019. (Raica na italanoa ena tabana xx.)
Eso tale na ilesilesi ni veiqaravi ena loma ni ono na vula sa oti:
Ni sikovi oti na Vualiku kei na Ceva kei Carolina, Amerika, rau a vosa o Peresitedi Dallin H. Oaks kei Elder David A. Bednar kivei ira a vakacacani vakaca ena cagilaba kaukauwa ena dua na lotu ena yakavi mai Tallahassee, Florida, Amerika. A veivakananumi o Peresitedi Oaks vei ira era vakarorogo ni veika dredre kei na rarawa sa tiki tiko ni bula oqo, ia “Kevaka eda na yalodina tiko ka dau masumasu, ena vukei keda na Turaga meda bula curuma yani.”
Mai Chicago, Illinois, Amerika, a vakasala o Elder Oaks vei ira na lewe ni Lotu vakamau vou ni “Ni taumada na saumaki vua na Turaga qai muria na saumaki ki na Lotu. Na saumaki vua na Turaga ena yaco ga ena masumasu kei na vuli kei na veiqaravi.” Ena nona veitomani kei Peresitedi Russell M. Nelson mai Arizona a veivakananumi o Peresitedi Oaks vei ira na itabagone kei na itabagone qase cake ni “Keda ituvaki vinaka duadua meda vakaitovotaki keda kina o ya ni da sa luvena tagane se luvena yalewa na Kalou.”
Era a qarava talega na lewe ni Kuoramu ni iApositolo Le Tinikarua na ikuri ni ilesilesi e vuravura raraba:
Mai Igiladi, a vosa duadua ga o Elder Jeffrey R. Holland ena dua na parokaramu ni Siganisucu ena Valenilotu mai Pembroke College ena Oxford University, ka vakavulica kina ni ibalebale ni reki ni Siganisucu e sega walega ni kena usutu na sucu ni iVakabula ia na Nona bula talega, Nona mate, kei na “Nona solibula veisorovaki qaqa.”
Mai São Paulo kei Salvador, Brazil, a laki veiqaravi o Elder Dieter F. Uchtdorf ki na soqoni ni veilawalawa lelevu ka vakakina ki na veilawalawa lalai kei na tamata yadua, oka kina na veivakacegui ki na matavuvale se qai leqa oti ga na luvedratou a kaulotu tiko, ka tiko talega ena rua na soqoni ni sakaramede kei na Matawilivola ni Siga Tabu ni rua na tabanalevu, a tomani ira na daukaulotu eso mera sikovi na lewenilotu duadua ena vuvale, ka kidavaki koya e dua na lewenilotu vou ni vodo tiko ena gaunisala e ruku ni qele mai São Paulo. A kaya ni o Brazil e dua na “vanua e kunei ka bulataki kina ni vakasama ni oi keda kece eda luvena na Tamada Vakalomalagi.”
Mai na United Arab Emirates, a veiliutaki o Elder David A. Bednar ena dua na soqoni digitaki vata kei ira na itabagone kei na itabagone qase cake ena iTeki o Abu Dhabi. A sikova yani e dua na vale ni vuli baleti ira na senivalu mai Aferika e Ijipita kei na dua na vale baleti ira na vesuki tu ena nodra vanua mai Iraqi Kurdistan. “Eda sa luvena tagane luvena yalewa na Kalou,” a kaya o Elder Bednar ena nona sotavi ira na senivalu. Mai Isireli, a dabe vakatulewa ena dua na koniferedi ni Tikina o Jerusalemi kei na dua na lotu ena Brigham Young University Jerusalem Center. Ena gauna ni koniferedi ni tuva kawa ni RootsTech e Salt Lake City, Utah, Amerika, a solia o Elder Bednar e $2 milioni ena vuku ni Lotu ki na International African American Museum Center baleta na Tuva Kawa.
Mai Ukraine, Armenia, France, Hungary, Switzerland, Romania, kei Czechia, a vosa kina o Elder Quentin L. Cook ena ulutaga ni kena bulataki na kosipeli vakalesuimai i Jisu Karisito ena veisiga ka wasei yani ena ivakaraitaki vakakina na dodoliga yani vei ira na tamata. Mai New York City, Amerika, a vosa o Elder Cook baleta na veikilai tudei e tiko ena kedrau maliwa na Lotu i Jisu Karisito ni Yalododonu Edaidai kei ira na Jiu. “Eda duavata kei ira na Jiu ena nodra kauwaitaki na vakalolomataki kei ira era sotava tu na veibolebole bibi eso,” a kaya.
Mai Mexico City, Mérida, kei Cancún, Mexico, a laki veiqaravi o Elder Cook vei ira na iliuliu ni Lotu, lewenilotu, daukaulotu kei ira na iliuliu ni veimatalotu, matanitu, kei na bisinisi. Era a tiko e 800 na itabagone ena dua na lotu ni itabagone mai na walu na iteki e Mexico City ka ra kovuti tiko kina e 38,000 na itabagone e Mexico taucoko. A vosa o Elder Cook ena dua na soqoni ena olo ni Seneti e Mexico, ka a kacivi ira kina na tamata vakabauta mera tudei tu ka duavata ena kena tutaki na bula galala vakalotu.
Mai Puerto Rico kei na Dominican Republic, a laki raica rawa o Elder D. Todd Christofferson ni dina ga sa mai yaco na vakacaca ni cagilaba, era sa vakacokotaki ira na lewenilotu. A kaya ni vanua o ya sa “vakaukauwataki,” ka kila ni sega ni dede sa na tolu na valetabu ena Caribbean (mai Haiti, Puerto Rico, kei na Dominican Republic). A vosa talega o koya ena dua na koniferedi ni tuvatuva vakabisinisi kei na dua na koniferedi ni bula galala vakalotu. Ena dua na bose ni itukutuku mai Washington, D.C., Amerika, a vosa o Elder Christofferson baleta na bibi ni dina kei na dodonu. Ena dua na ilesilesi ki Guatemala kei El Salvador, me ikuri ni soqoni tale eso, a vakaitavi o Elder Christofferson ena kakaburaki eso ka raici raraba ena vanua taucoko o Central America, ka vakabibitaki kina na vulici ni kosipeli mai vale.
Mai Sauca Aferika kei Zimbabwe, a vakasalataki ira na lewenilotu o Elder Neil L. Andersen mera dau nanuma na iVakabula ka ciqoma na vakasama ni vuli e kena usutu na vuvale, ka tokona na Lotu. Mai Igiladi, Welesi, Varanise, kei Austria, a raica kina na kaukauwa ena gauna sa vica vata kina na itabatamata ena veimatavuvale era Lotu ka kaya ni o ira na lewenilotu mai Iurope era sa vakaitavi vakabibi sara tiko ena kena tubu ka tudei na Lotu. A kaya, ni ra sa dau taqomaka tiko na vakabauta.
E taura vakabibi tiko na Lotu na nodra kukuna na itabagone, a vakamatatataka oqo o Elder Ronald A. Rasband ni vosa tiko vei ira na qasenivuli ni semineri kei na inisitute mai Salt Lake City, Utah. Sa rawa mera veivuke na qasenivuli ni semineri kei na inisitute vei ira era rivarivabitaki tiko ena kena vakayagataki e vuqa na ivurevure ni itatarovi ni kukuna e vakarautaka tu na Lotu ka veivakananumi vei ira na gonevuli ni veivuke vakalou kei na veiqaravi e kune ga vua na iVakabula.
Mai Rwanda, a laki sikova o Elder Gary E. Stevenson e dua na ivakananumi ni veivakamatei levu, ka kaya kina ni dina ga ni sa yaco oti na veileqa lelevu, nikua era sa vakasinaiti tu na lewenivanua o Rwanda ena “yalovinaka, yalomalua, veivinakati, kei na veivosoti” sa vakaraitaka tiko na uasivi ni kawatamata. A solia kina ena vuku ni Lotu e dua na cau ki na ivakananumi. A veisiko talega o Elder Stevenson ki Uganda, Ethiopia, Tanzania, kei Madagascar, ka veiliutaki ena koniferedi ni veiliutaki ni matabete, ka vosa vei ira na lewenilotu kei ira na daukaulotu, ka vakaitavi ena dua na lotu ni itabagone kei na itabagone qase cake, sikovi ira na vakailesilesi ni matanitu, ka saumi taro ni soli itukutuku.
A sikova o Elder Dale G. Renlund na veivanua vakayawa ena nona ilesilesi mai Argentina kei Chile, me vakataki Antofagasta ena vanua dravuisiga ni vualiku kei Chile; dua na koniferedi ni Tabana ni Kaulotu e Argentina Comodoro Rivadavia; na Tabana o El Calafate mai Argentina, ka ra vakasinaiti ena tamata e namaki mera tiko kina e lewe 30-40 ena kena valenilotu lailai; kei na dua na soqoni mai Ushuaia, Argentina, era a tiko kina e 600 na lewenilotu era sa tudei tiko vakalotu mai na yasana taucoko ni vanua o Tierra del Fuego. Ena veivanua me vakataki Rio Gallegos, Argentina, a vosa o Elder Renlund baleta na veivakalougatataki ni lewenivuli e kena usutu na vuvale ka tokona na Lotu kei na sala mera vakalougatataki kina na vuvale ni ra rokova tiko na Siga ni Vakacecegu.
Mai Paraguay, Uruguay, Chile, kei Argentina, a wasea kina o Elder Gerrit W. Gong na ivakavuvuli mai na ivolanikalou kei na veivakavulici nei Peresitedi Nelson—oka kina na ulutaga ni veiqaravi, tudei tikoga ena sala ni veiyalayalati, ivakatakila ki na tamata yadua, vakayagataki vakadodonu na yaca ni Lotu, kei na vakayagataki ni kosipeli me kunei na isau ni taro ka uabaleti na ibolebole kei na veivakataotaki.
Ena koronivuli ni kaulotu mai Guatemala, a wasea kina o Elder Ulisses Soares na lesoni a vulica mai na nodrau a saumaki kina na nona itubutubu. A vakayagataka na lesoni oqori me vakayaloqaqataki ira kina na daukaulotu mera yalodina ka kaukauwa tikoga. A veisiko talega ki Costa Rica kei Panama ka kaya ni o ira na lewenilotu ena Ceva kei Amerika era “vinakata mera qarava na Turaga. Era vinakata mera cakava na veika e kerea o Koya mera cakava.” Ena dua na veisiko e muri ka oka kina o Dominican Republic kei Trinidad kei Tobago, a kaya ni tiko ena Caribbean, “o ira na tamata era sa marautaka tiko na kosipeli i Jisu Karisito ki na nodra bula.” A vakatabuya talega na yanuyanu ni vanua o Curaçao me vunautaki kina na kosipeli. “Sa tiko na veimataka vinaka ni Lotu mai Curaçao,” a tomana. “Era yalodina na tamata ka tuvakarau mera ciqoma na kosipeli.”