Elder Ricardo P. Giménez

Vakaitutu Raraba ni Vitusagavulu

Era na dau nanuma tikoga na lewe ni Lotu mai Antofagasta, Chile, na koniferedi raraba ni Epereli 2019 ena kena a kacivaki kina na nodra valetabu vata kei na veikacivi ni dua na luvedra, o Elder Ricardo P. Giménez, me Vakaitutu Raraba ni Vitusagavulu.

Ni vakasamataka tiko na ilesilesi ni nona veikacivi vou, sa kunea o Elder Giménez na vakabauta kei na yaloqaqa ena qaqanivosa “Vei koya sa kaciva na Turaga, sa vakadeitaka na Turaga” (Thomas S. Monson, “Duty Calls,” Ensign, May 1996, 44).

“Au sa vakavulica vakavuqa na qaqanivosa o ya ena veigauna sa oti, ia oqo au sa saga meu na bulataka vakai au,” a kaya. “Sa kacivi iko na Tamada Vakalomalagi. E kilai iko o Koya. O koya gona mo lako ka cakava na ka e vinakata o Koya, ka na vinaka na veika kece.”

A sucu o Ricardo Patricio Giménez Salazar enai ka 28 ni Noveba, 1971, e ulumatua ni rua na gone a sucu vei Ricardo Benjamín Giménez Gimeno kei Myrto Lucisca Amalia Salazar Signorini. A lewena na Lotu ni se yabaki 11 ka toki vata kei tinana kei ganena ki Santiago, Chile, ni rau sere oti na nona itubutubu.

Ena 1995, a sotavi Catherine Ivonne Carrazana Zúñiga mai Santiago ni tekivu gole tiko mai ki na tabanalevu nei Ricardo ka tiko ena gauna o ya o Catherine ena vale nei nona momo. Rau a vauci ena Valetabu e Santiago Chile Temple enai ka 12 ni Sepiteba, 1997, ka rau sa itubutubu ni rua na gone.

A taura o Elder Giménez na nona diqiri ena akaude kei na dikevi fika ena Univesiti ni Santiago ena 1997 kei na koroi cecere ni liutaki ni bisinisi ena Univesiti ni Chile ena 2003. A tekivuna na nona cakacaka ena kabani ni keli vatu talei, ka tomana sara ena tekinolaji ni itukutuku me laki kena dairekita ni veika vakailavo ena Computer Sciences Corporation mai Latin America. A lesu tale ki na keli vatu talei ena 2012, tekivu e Sierra Gorda Mining ka toso sara ki Robinson Nevada Mining Company.

Ena gauna a kacivi kina, a veiqaravi tiko o Elder Giménez vaka-daunivakasala ena dua na mataveiliutaki ni iteki. A veiqaravi talega vaka-Vitusagavulu ni iWasewase ena iWasewase South America South, peresitedi ni iteki, lewe ni matabose e cake, bisopi, daunivakasala ena matabisopi vakakina ena mataveiliutaki ni Cauravou, ka daukaulotu tudei ena Tabana ni Kaulotu e Chile Concepción.