Lawatu, iWalewale, kei na iVurevure Vou

iTabagone

Era na toro cake na gone kei ira na itabagone mai na dua na kalasi se kuoramu ki na kena e tarava vakayabaki vata ena Janueri ka sega ena nodra siganisucu.

iTukutuku baleta na valetabu. A vakaraitaka vakatikina na Mataveiliutaki Taumada e dua na itukutuku enai ka 2 ni Janueri 2019: “Ena vuqa na veisenitiuri sa oti oqo, na veika kece e baleta na cakacaka ni valetabu sa veisautaki tiko ena veigauna eso, oka kina na vosa, ivakarau ni kedra tara, veitaratara, kei na maroroi ni kena itukutuku. Era sa vakavulica tiko na parofita ni na sega ni oti na mataqali veisau vakaoqo ni sa dusimaka tiko mai na Turaga kivei ira na Nona italai.”

Na nodra toro cake na gone kei ira na itabagone. O ira na gone era sa vakacavara na Lalai kei ira na itabagone era sa toso mai na dua na kalasi se kuoramu ki na kena e tarava vakayabaki vata ena Janueri ka sega ena nodra dui siganisucu. Sa kena ibalebale talega ni sa rawa vei ira na itabagone mera ciqoma na nodra ivolatara vakaiyalayala ena imatai ni gauna ena Janueri ni yabaki era sa yabaki 12 kina, ka sa rawa vei ira na cauravou mera tabaki ki na Matabete i Eroni ena Janueri ni yabaki era na yabaki 12 kina.

Vuqa tale na madigi ni veiqaravi. Sa vakaraitaka na LDS Charities ni sa mai sema ki na JustServe.org me tavoci kina na parokaramu ni #YouCanDoSomething, mera sureti na tamata mera veiqaravi ena nodra vanua ka cau ki na veinaki vinaka e vuravura raraba me vukea me veisautaki o vuravura. Me tekivu, sikova na tabana “How to Help” ena LDSCharities.org.

iVurevure vou ni veiqaravi vakalotu. Na mataveilawa Oqo na Veiqaravi Vakalotu (ministering.ChurchofJesusChrist.org) sa vakavoutaki ena ikuri eso ni itukutuku kei na vidio. Ena rawa ni veivuke na ivurevure ena mataveilawa vei ira na wilika mera dodoliga yani ena yalololoma, tarai cake nodra veimaliwai e vakaibalebale cake, vakatorocaketaki nodra kila na vakarorogo, kei na vuqa tale. Na lewena vou e oka kina na itukutuku ni iVakavuvuli ni Veiqaravi Vakalotu era sa tabaki tu ena mekasini Ensign kei na Liaona isema ki na vosa ni koniferedi raraba baleta na veiqararavi, kei na vidio me wasei, qaqanivosa, kei na ivolanikalou me wasei yani.

iNuinui kei na nodra vakabulai na vakaleqai ena veivakacacani. E dua na mataveilawa vou ni Lotu, abuse.ChurchofJesusChrist.org na ivurevure eso kei na iyaya vakarautaki baleti ira na vakaleqai ena veivakacacani vata kei ira era gadreva mera vukea na kena tarovi na veivakacacani. A vakaraitaka talega na Mataveiliutaki Taumada e dua na nodratou ivola ena ika 26 ni Maji, 2019, mera vakayaloqaqataki na iliuliu ni Lotu mera dodoliga yani ena loloma mera vukei o ira era vakararawataki ena veivakacacani. Ena ivola oqo e tiko kina e dua na ivola ivurevure e vakavoutaki kina na idusidusi me ra veivakasalataki kina na bisopi kei na mataveiliutaki ni iteki vei ira era vakalolomataki ena veivakacacani ni veiyacovi kei na ivakarau ni veivakatarogi vei ira na lewe ni Lotu. Sa mai tavoca talega kina na Lotu e dua na vidio, “Protect the Child,” ka vakavoutaka talega na Ulutaga ni Kosipeli baleta na veivakacacani.

iVakaraitaki kei na app. vou. Na ivakaraitaki ni iTuvatuva ni Vuli ena veivakavoui vou ni app. ni Gospel Library ena tuvai iko mo vakarautaka e dua na gauna ni kena vulici e dua na itukutuku e tiko ena app. Na Ordinances Ready e dua na gacagaca vou ni FamiliySearch e vakarawarawataka na kunei ni yaca me baleta na valetabu, ka levu kina na nomu gauna mo qarava na nomu matavuvale ka marautaka na veivakalougatataki ni valetabu. Sa tiko ena FamilySearch e voleka ni tolu na daseni na itaviqaravi vou e vale, me vakataka na “Taubale ena Vanua era Taubale Kina,” me vukei ira na lewenilotu itabagone ena tuva kawa. Era sa vakarautaki tu na itaviqaravi oqo ena 10 na veimataqali vosa.

E sega ni gadrevi na ivakaraitaki lelevu. Ena veiganiti beka na soqo ni marau ena itovo vakavanua kei na itukutuku makawa, sa sega kina ni tokona na Lotu na ivakaraitaki lelevu me vakataka na veivakamarautaki lelevu. Ena tomani tikoga e tolu na veivakamarautaki lelevu: na Nauvoo Pageant e Illinois, Amerika, ena veitokoni ni itikotiko liu ni Lotu; na Mesa Pageant mai Arizona, Amerika, ena veiliutaki ni iwasewase: kei na British Pageant, ena veiliutaki ni iwasewase, mera na vakayacori ena veiya va na yabaki. Sa mai muduka talega na Lotu na kena vakayacori na soqo ni itabagone na veivakamarautaki vakavanua a dau vakayacori ni vakarau vakatabui na valetabu ka sa na vakayacori na lotu ni itabagone vata kei ira na iliuliu ni Lotu era veisiko tiko mai.