Lawatu Baleti Ira na Luvedra na iTubutubu era LGBT, Lewenilotu era Vakamau Vakamataqali Vata

Sa rawa vei ira na itubutubu era sa vakadeitaka ni ra sa vakasalewalewa, vakasaganegane, vakasalewagane, se veisau mera tagane se yalewa mera kerea ena gauna oqo mera masu vakalougatataki na luvedra dramidrami mai vua e dua na lewe kilikili ni Matabete i Melikiseteki, vakakina na luvedra mera papitaisotaki ni ra sa yabaki walu ka sa sega ni gadrevi kina na nodratou veivakadonui na Mataveiliutaki Taumada, ena nona sa mai kacivaka oqo o Peresitedi Dallin H. Oaks, iMatai ni Daunivakasala ena Mataveiliutaki Taumada ena gauna ni soqoni ni veiliutaki ena koniferedi raraba.

Me kena ikuri, e dina ga ni vakamau vakamataqali vata e sa okati tiko “me dua na cala bibi,” na Lotu sa sega tale ni vakatoka oqo me “vukitani” ena veivakadodonutaki ni Lotu. “Na veimoceri vakatawasavasava ni tagane kei na yalewa se veimoceri vakamataqali vata erau na sotavi ena ivakarau vata ga,” e kaya o Peresitedi Oaks.

Na veisau ni lawatu oqo “e sega ni tukuna ni sa gole na vunau ni Lotu baleta na vakamau se ivakaro ni Kalou me baleta na tiko savasava se vakarau savasava,” a vola vakaoqo na Mataveiliutaki Taumada ena nodratou itukutuku raraba. “Na vunau ni ituvatuva ni bula tawamudu kei na kena bibi na tiko savasava ena sega ni veisau.”

E kaya o Peresitedi Oaks ni lawatu e dodonu me vukei ira na veimatavuvale era vakacacani kina, ka “kena ikuri, ni nodra sasagataka tiko na noda lewenilotu mera vakaraitaka ni ra sa kila vinaka, yalololoma ka veilomani e dodonu me sa toroya cake na nodra veidokai kei na veikilai vinaka ena kedra maliwa na tamata kecega ni veika vinaka.”