Ang mga Apostoles Nangalagad sa Tibuok Kalibutan
Sa labing unang higayon sa kasaysayan sa gipahiuli nga Simbahan, ang tanan nga mga sakop sa Unang Kapangulohan ug sa Korum sa Napulog Duha ka mga Apostoles nagpundok sa usa ka dapit sa gawas sa Estados Unidos, sa dihang mibiyahe silang tanan ngadto sa Italy alang sa pagpahinungod sa Rome Italy Temple niadtong Marso 2019. (Tan-awa ang istorya sa pahina xx.)
Sa ubang mga buluhaton sa pagpangalagad sulod sa milabay nga unom ka bulan:
Human mibisita sa North ug South Carolina, USA, si Presidente Dallin H. Oaks ug Elder David A. Bednar namulong ngadto sa nangaluya nga mga biktima sa bagyo diha sa usa ka gabii nga debosyonal sa Tallahassee, Florida, USA. Si Presidente Oaks mipahinumdom sa mga tigpaminaw nga ang mga kalisdanan ug mga kasakit kabahin sa mortal nga kinabuhi, apan “Kon kita matinud-anon ug mainampoon, ang Ginoo motabang kanato sa paglahutay niini.”
Sa Chicago, Illinois, USA, si Elder Oaks mitambag sa batan-on nga minyo nga mga miyembro sa Simbahan nga, “Ang pagkakabig ngadto sa Ginoo mag-una sa pagkakabig ngadto sa Simbahan. Ug ang pagkakabig ngadto sa Ginoo moabut pinaagi sa pag-ampo ug pagtuon ug pagserbisyo.” Ug didto sa Arizona uban ni Presidente Russell M. Nelson, si Presidente Oaks mipahinumdom sa kabatan-onan ug mga young adult nga, “Ang atong usa ka labing maayong kalidad sa pag-ila sa atong kaugalingon mao nga kita anak nga lalaki o anak nga babaye sa Dios.”
Ang mga sakop sa Korum sa Napulog Duha ka mga Apostoles mituman usab og dugang nga mga buluhaton sa tibuok kalibutan:
Sa England, si Elder Jeffrey R. Holland mao ang bugtong nga mamumulong sa programa sa Pasko sa Pembroke College Chapel sa Oxford University, diin mitudlo siya nga ang malipayong kahulugan sa Pasko nakasentro dili lamang sa pagkatawo ni Kristo apan usab sa Iyang kinabuhi, kamatayon, ug sa “Iyang madaugon nga maulaong sakripisyo.”
Sa São Paulo ug Salvador, Brazil, si Elder Dieter F. Uchtdorf nangalagad ngadto sa dagkong mga grupo diha sa mga miting apan usab ngadto sa ginagmayng mga grupo ug mga indibidwal, lakip ang paghupay sa pamilya sa bag-o lang namatay nga full-time nga misyonaryo, pagtambong sa mga miting sa sakramento ug Sunday School sa duha ka ward, pag-uban sa pipila ka managkompanyon nga mga misyonaryo samtang mibisita sila og part-member nga mga pamilya, ug pagkaila kaniya sa usa ka bag-ong kinabig samtang nagsakay diha sa subway sa São Paulo. Miingon siya nga ang Brazil maoy usa ka “dapit diin ang hunahuna nga kitang tanan mga anak sa Langitnong Amahan makita gayud ug gisunod.”
Sa United Arab Emirates, si Elder David A. Bednar mipahigayon og espesyal nga miting uban sa kabatan-onan ug mga young adult sa Abu Dhabi Stake. Gisuroy niya ang usa ka sentro sa pagkat-on alang sa mga milalin [refugee] nga taga-Africa diha sa Egypt ug usa ka sentro alang sa mga tawo nga napapahawa sa kaugalingong yuta diha sa Iraqi Kurdistan. “Kitang tanan mga anak sa Dios,” miingon si Elder Bednar human makigkita sa mga refugee. Sa Israel, nangulo siya sa usa ka komperensya sa Jerusalem District ug sa usa ka debosyonal diha sa Brigham Young University Jerusalem Center. Atol sa RootsTech nga komperensya sa family history sa Siyudad sa Salt Lake, Utah, USA, si Elder Bednar mipresentar og $2 ka milyon nga donasyon sa Simbahan ngadto sa International African American Museum Center for Family History.
Sa Ukraine, Armenia, France, Hungary, Switzerland, Romania, ug Czechia, si Elder Quentin L. Cook namulong kalabut sa tema sa pagsunod sa gipahiuli nga ebanghelyo ni Jesukristo matag adlaw ug sa pagpaambit niini pinaagi sa ehemplo ug sa pagtabang sa uban. Sa Siyudad sa New York, USA, si Elder Cook namulong mahitungod sa mga pagkaparehas tali sa Ang Simbahan ni Jesukristo sa mga Santos sa Ulahing mga Adlaw ug sa mga komunidad nga Judeo. “Kita ug ang atong Judeo nga mga higala managsama nga nagpakabana alang sa gisakit nga mga katawhan ug niadtong kinsa nag-atubang og espesyal nga mga hagit,” miingon siya.
Sa Siyudad sa Mexico, Mérida, ug Cancún, Mexico, si Elder Cook nangalagad ngadto sa mga lider sa Simbahan, mga miyembro, mga misyonaryo ug mga lider sa relihiyon, gobyerno, ug negosyo. Ang usa ka debosyonal alang sa kabatan-onan nga gitambongan sa 800 ka batan-on gikan sa walo ka mga stake sa Siyudad sa Mexico gisibya ngadto sa 38,000 ka batan-on sa tibuok Mexico. Ug namulong usab si Elder Cook sa usa ka forum diha sa auditorium sa Mexican Senate, diin nanawagan siya sa mga tawo nga dunay pagtuo nga mobarug nga lig-on ug nagkahiusa sa pagpanalipod sa relihiyusong kagawasan.
Sa Puerto Rico ug sa Dominican Republic, nakita ni Elder D. Todd Christofferson nga bisan pa sa kadaut gumikan sa mga bagyo, nakabarug ra og balik ang mga miyembro. Miingon siya nga ang dapit “madasigon,” nasayud nga sa dili madugay mahimo nang tulo ang mga templo diha sa Caribbean (sa Haiti, Puerto Rico, ug sa Dominican Republic). Namulong usab siya sa usa ka komperensya sa pamatasan sa negosyo ug sa usa ka komperensya sa relihiyusong kagawasan. Sa usa ka news summit sa Washington, D.C., USA, si Elder Christofferson namulong mahitungod sa kaimportante sa kamatuoran ug kaligdong. Ug samtang adunay buluhaton didto sa Guatemala ug El Salvador, agig dugang sa ubang mga miting, si Elder Christofferson miapil sa mga sibya nga makita sa tibuok Central America, mihatag og gibug-aton sa kaimportante sa pagtuon sa ebanghelyo diha sa panimalay.
Sa South Africa ug Zimbabwe, si Elder Neil L. Andersen mitambag sa mga miyembro sa paghinumdom sa Manluluwas ug sa paghangup sa konsepto sa pagkat-on nga nakasentro sa panimalay ug gisuportahan sa Simbahan. Sa England, Wales, France, ug Austria, gihisgutan niya ang kalig-on nga moabut kon ang mga pamilya sa Simbahan mokanat og daghang henerasyon ug miingon nga ang mga miyembro sa Europe padayon nga adunay mahinungdanong nahimo sa kalamboan ug kalig-on sa Simbahan. Sila, miingon siya, mga tigpanalipud sa pagtuo.
Ang Simbahan seryuso nga miatubang sa paghikog sa mga tin-edyer, gipasabut og maayo ni Elder Ronald A. Rasband samtang namulong siya sa mga magtutudlo sa seminary ug institute sa Siyudad sa Salt Lake, Utah. Ang mga magtutudlo sa seminary ug institute makatabang niadtong anaa sa peligro pinaagi sa paggamit sa daghang kapanguhaan nga gihatag sa Simbahan alang sa pagpugong sa paghikog ug pinaagi sa pagpahinumdom sa mga estudyante nga ang balaanong tabang ug pagpangalagad makaplagan pinaagi sa Manluluwas.
Sa Rwanda, si Elder Gary E. Stevenson mibisita sa usa ka genocide memorial [handumanan alang sa mga gipamatay], diin miingon siya nga bisan pa sa nangaging mga kagubot, ang katawhan sa Rwanda karon napuno sa “pagkamabination, kalumo, pakig-uli, ug pagpasaylo” nga nagpakita sa labing maayo sa kinatibuk-ang katawhan. Mipresentar siya og donasyon ngadto sa memorial sa ngalan sa Simbahan. Si Elder Stevenson mibisita usab sa Uganda, Ethiopia, Tanzania, ug Madagascar, mipahigayon og mga komperensya sa pagpangulo sa pagkapari, namulong ngadto sa mga miyembro ug mga misyonaryo, miapil sa usa ka debosyonal alang sa kabatan-onan ug mga young single adult, mibisita sa mga opisyal sa gobyerno, ug mitubag sa mga pangutana sa media.
Si Elder Dale G. Renlund mibisita og hilit nga mga dapit samtang adunay buluhaton sa Argentina ug Chile, sama sa Antofagasta sa disyerto nga rehiyon sa amihanang Chile; usa ka komperensya alang sa Argentina Comodoro Rivadavia Mission; sa El Calafate Branch sa Argentina, diin ang gamayng chapel napuno sa mga tawo nga sobra pa sa 30–40 nga gilauman nga motambong; ug sa usa ka panagpundok sa Ushuaia, Argentina, diin ang 600 nga nanambong mirepresentar sa kadaghanan sa aktibong mga miyembro sa tibuok rehiyon sa Tierra del Fuego. Sa mga dapit nga sama sa Rio Gallegos, Argentina, si Elder Renlund namulong mahitungod sa mga panalangin sa kurikulum nga nakasentro sa panimalay ug gisuportahan sa Simbahan ug sa unsang paagi ang mga pamilya mapanalanginan pinaagi sa pagbalaan sa adlawng Igpapahulay.
Sa Paraguay, Uruguay, Chile, ug Argentina, si Elder Gerrit W. Gong mipaambit og mga baruganan gikan sa mga kasulatan ug gikan sa mga pagtulun-an ni Presidente Nelson—lakip ang mga tema sa pagpangalagad, pagpabilin diha sa dalan sa pakigsaad, personal nga pagpadayag, saktong paggamit sa ngalan sa Simbahan, ug sa paggamit sa ebanghelyo aron makakaplag og mga tubag ug makabuntog sa mga hagit ug mga babag.
Sa missionary training center sa Guatemala, si Elder Ulisses Soares mipaambit og mga leksyon nga iyang nakat-unan gikan sa pagkakabig sa iyang mga ginikanan. Gigamit niya kadto nga mga leksyon sa pag-awhag sa mga misyonaryo nga magpabiling matinud-anon ug malig-on. Mibisita usab siya sa Costa Rica ug Panama ug miingon nga ang mga miyembro sa Central America “gusto nga moserbisyo sa Ginoo. Gusto nilang mobuhat sa unsay gusto Niya nga ipabuhat kanila.” Sa ulahi nga pagbisita nga naglakip sa Dominican Republic ug Trinidad and Tobago, miingon siya nga sa Caribbean, “ang mga tawo nagtagamtam sa ebanghelyo ni Jesukristo diha sa ilang kinabuhi.” Gipahinungod usab niya ang isla nga nasud sa Curaçao alang sa pagsangyaw sa ebanghelyo. “Ang Simbahan adunay maayo kaayo nga kaugmaon sa Curaçao,” midugang siya. “Ang mga tawo matinud-anon ug andam nga modawat sa ebanghelyo.”