Polisiya alang sa mga Anak sa LGBT nga mga Ginikanan, mga Miyembro nga anaa sa Sama og Sekso nga mga Kaminyoon

Ang mga ginikanan kinsa miila sa ilang kaugalingon isip lesbian [tomboy], gay [bayot], bisexual, o transgender mahimo na karon nga mohangyo nga ang ilang mga anak mapanalanginan isip mga masuso pinaagi sa usa ka takus nga naghupot og Melchizedek nga Pagkapari, ug ang ilang mga anak mahimo usab nga mabunyagan human sila mag-otso anyos nga wala magkinahanglan og pagtugot sa Unang Kapangulohan, mipahibalo si Presidente Dallin H. Oaks, Unang Magtatambag sa Unang Kapangulohan, atol sa sesyon sa pagpangulo sa kinatibuk-ang komperensya.

Agig dugang, bisan og ang sama og sekso nga kaminyoon gikonsiderar gihapon nga “usa ka seryusong kalapasan”, ang Simbahan dili na motratar niini isip “apostasiya” alang sa mga katuyoan sa pagdisiplina sa Simbahan. “Ang imoral nga mga binuhatan sa heterosexual o homosexual nga pakigrelasyon itratar sa samang paagi,” miingon si Presidente Oaks.

Kini nga mga kausaban sa polisiya “wala magrepresentar og kausaban sa doktrina sa Simbahan kalabut sa kaminyoon o sa mga sugo sa Dios kabahin sa kaputli o moralidad,” ang Unang Kapangulohan misulat sa usa ka opisyal nga pamahayag. “Ang doktrina sa plano sa kaluwasan ug ang kaimportante sa kaputli dili mausab.”

Si Presidente Oaks miingon nga ang mga polisiya makatabang sa naapektohan nga mga pamilya, ug, “agig dugang, ang mga paningkamot sa atong mga miyembro nga mopakita og dugang nga pagsabut, kapuangod ug gugma mopalambo og dugang nga respeto ug pagsinabtanay sa tanang mga tawo nga dunay maayong katuyoan.”