Jan E. Newman
Ikaduhang Magtatambag sa Kinatibuk-ang Kapangulohan sa Sunday School
Isip batan-ong misyonaryo nga nagserbisyo sa Strasbourg, France, si Jan E. Newman adunay espesyal nga espirituhanong kasinatian nga nakapalig-on sa iyang pagpamatuod ug nagtugot kaniya nga mobati sa gugma sa Langitnong Amahan. Kini nga kasinatian miabut samtang nagbasa siya sa mga pulong ni propeta Alma diha sa Basahon ni Mormon mahitungod sa pagtanom og binhi sa ebanghelyo diha sa atong mga kasingkasing (tan-awa sa Alma 32:28; 33:22–23).
“Akong nabasa nga kon mohatag ka og luna alang niana nga binhi sa imong kasingkasing, kini motubo, ug tinud-anay gayud nimong mabati kining nagtubo nga mga tinguha,” miingon si Brother Newman. “Nakahinumdom ko nga nagbasa niana ug ang Espiritu kusog kaayo nga mipamatuod kanako nga kini tinuod. Akong gibati kadtong nagtubo nga mga tinguha. Dili gayud nako kadto makalimtan samtang buhi pa ko.”
Kini ug uban pa nga mga kasinatian nakatabang sa paglig-on sa pagpamatuod ni Brother Newman mahitungod sa ebanghelyo ug miandam kaniya sa tibuok kinabuhi nga pagserbisyo isip bana, amahan, ug disipulo ni Jesukristo.
Si Jan Eric Newman natawo niadtong Abril 16, 1960, sa Jerome, Idaho, USA, ngadto nilang George Raymond ug Dora Walker Newman. Nagdako siya sa Overton, Nevada, USA. Ang iyang amahan usa ka kinabig, ug ang iyang inahan gikan sa daghan nang henerasyon nga Santos sa Ulahing mga Adlaw.
Nakapalambo siya og pagpamatuod sa batan-on pa ug nakaserbisyo og full-time nga misyon sa France ug Belgium. Pagkahuman sa iyang misyon, si Brother Newman nakaangkon og bachelor’s degree sa French gikan sa Brigham Young University. Giganahan kaayo siya sa iyang kurso nga gikonsiderar niya nga mahimong magtutudlo sa French apan hinoon mipili nga manarbaho sa industriya sa software. Mitrabaho siya isip serial entrepreneur [tawo nga kanunayng nagtukod og mga negosyo] sulod sa sobra 30 ka tuig, nakamugna og pipila ka malampusong kompaniya sa software. Bag-o lang, siya usa ka partner sa SageCreek Partners, usa ka kompaniya sa technology consulting sa Alpine, Utah.
Si Brother Newman naminyo kang Lucia Price sa Oakland California Temple niadtong Agosto 18, 1984. Mga ginikanan sila sa unom ka anak ug nagpuyo sa Elk Ridge, Utah.
Si Brother Newman nakaserbisyo isip presidente sa stake, bishop, presidente sa Young Men sa ward, Scoutmaster, ug temple worker. Gikan sa 2006 hangtud 2009 miserbisyo siya isip presidente sa Nebraska Omaha Mission.