Ang Makatawhanon nga mga Paningkamot Nakatabang sa Liboan
Ang usa ka nurse sa Indonesia nagbarug tupad sa usa ka bag-ong inahan. Ang mga nurse niining sentro sa paanakan nakakompleto sa kurso nga Helping Babies Breathe nga gipadagan sa LDS Charities.
Usa ka batan-ong lalaki sa Ghana mipahiyom human masukdan og wheelchair uban sa tabang sa usa ka technician sa LDS Charities.
Ang makatawhanon [humanitarian] nga organisasyon sa Simbahan, ang LDS Charities, miapil sa 2,885 ka proyekto sa 141 ka nasud sa miaging tuig, nakigtambayayong sa 1,900 ka makatawhanon nga kaabag nga mga organisasyon. Sukad sa 1985, ang LDS Charities nakahatag og sobra sa $2.2 bilyon nga hinabang—lakip ang kwarta, mga manggad [commodities], ug dili kwarta nga donasyon sa 197 ka nasud ug teritoryo, sumala sa 2018 nga tinuig nga report sa LDS Charities nga gipagawas niadtong Pebrero 19, 2019.
Ang makatawhanon nga mga paningkamot sa Simbahan nadasig sa kapuangod ug gugma alang sa tanang anak sa Dios ug mihatag og gibug-aton sa tulo ka naggiya nga baruganan—pag-atiman niadtong labing nanginahanglan, pagdasig nga makabarug sa kaugalingong pagpaningkamot, ug pagpasiugda og pagboluntaryo ug pagserbisyo. Kini nga mga baruganan, gibase sa pagtuo diha ni Jesukristo, makapasarang sa mga indibidwal ug mga pamilya bisan unsa pa ang kaliwat, relihiyon, o nasyonalidad.
Ang Simbahan mitabang sa emerhensiya nga pagtubag (lakip ang boluntaryo nga mga paningkamot), mga serbisyo alang sa adunay kakulian sa panan-aw, pag-atiman sa inahan ug bag-ong natawo, limpyo nga tubig ug sanitasyon, mga pagbakuna, pagsangkap og mga wheelchair ug mga tabang sa paglakaw, pagtabang sa mga tawo nga makasangkap og pagkaon alang sa ilang kaugalingon nga gigamit ang lokal nga mga solusyon ug kapanguhaan, ug dinalian ug malungtaron nga tabang alang sa mga milalin [refugee]. Ang Simbahan miapil usab sa mga proyekto sa lokal nga komunidad sa 43 ka estado ug mga probinsya sa U.S. ug Canada aron sa pagtabang sa walay kapuy-an, pagpahimutang sa mga milalin, ug ubang panginahanglan.
“Mibati kita og dakong pasalamat ug kasuod sa matag tawo kinsa nakatampo sa kalampusan sa makatawhanong buhat niadtong 2018,” miingon si Sister Sharon Eubank, presidente sa LDS Charities ug Unang Magtatambag sa Kinatibuk-ang Kapangulohan sa Relief Society. Miingon siya nga ang report nagrepresentar sa kamabination sa liboan ka mga tawo.