Elder Peter M. Johnson
General Authority Seventy
Human si Peter M. Johnson, ang anak sa usa ka superbisor sa pasilidad ug drayber sa taxi, midawat og scholarship sa basketball sa Brigham Young University–Hawaii, iyang nakaplagan ang iyang kaugalingon nga nagbarug atubangan sa usa ka magtutudlo sa institute.
“Mopasakop ka dayon sa Simbahan, o madugay pa og gamay,” nanagna ang magtutudlo.
Sakto ang magtutudlo. Paglabay sa sobra usa ka tuig, si Peter “nagpuasa ug nag-ampo ug nakadawat og tubag.” Nabunyagan siya niadtong Agosto 16, 1986.
Si Peter Matthew Johnson, ang ikaupat sa lima ka anak, natawo ngadto kang McKinley Johnson ug Geneva Paris Long niadtong Nobyembre 29, 1966, sa Queens, New York, USA.
Nagdiborsyo ang iyang mga ginikanan sa dihang 11 anyos siya, ug ang iyang inahan mibalhin ngadto sa Hawaii. Paglabay sa usa ka tuig, mipasakop si Peter sa Nation of Islam ug nahimo nga usa ka Muslim. Kini nga asosasyon nakahatag og giya ug suporta ug miandam kaniya sa pagdawat sa ebanghelyo ni Jesukristo.
Sa edad nga 15, si Peter mibalhin ngadto sa Hawaii aron mopuyo uban sa iyang inahan. Didto, iyang nadiskubrihan ang sports—ilabi na ang basketball—ug misugod sa dalan padulong sa pagkaangkon og edukasyon sa unibersidad, pagka-miyembro sa Ang Simbahan ni Jesukristo sa mga Santos sa Ulahing mga Adlaw, misyonaryo nga pagserbisyo sa Alabama Birmingham Mission, ug pagkaminyo sa templo ngadto kang Stephanie Lyn Chadwick niadtong 1990. Ang magtiayon, kinsa nagkahimamat samtang nagdula og basketball sa Southern Utah University, adunay upat ka anak.
“Ania ako aron moserbisyo sa Ginoo,” miingon si Elder Johnson sa iyang tawag ngadto sa Seventy. “Bisan unsa pa ang nasyonalidad o kultura o asa ko gikan, ang akong buluhaton mao ang pagserbisyo sa Ginoo sa tibuok nakong kasingkasing, hunahuna, ug kusog ug sa pagrepresentar sa Ginoo ngadto sa Iyang katawhan. Ang Manluluwas nahigugma kanatong tanan. Kita mga anak sa Dios.”
Si Elder Johnson nakadawat og bachelor’s ug master’s degree sa accounting gikan sa Southern Utah University ug PhD sa accounting gikan sa Arizona State University. Nakatrabaho siya isip associate professor sa BYU–Hawaii, assistant professor sa Brigham Young University, ug associate professor sa University of Alabama. Nakaserbisyo siya isip Area Seventy, presidente sa stake, financial clerk sa stake, ug ward mission leader.