Ang Pagpahinungod Nagtimaan og “Talagsaon nga Umaabut”

“Ang Simbahan makaangkon og talagsaon nga umaabut, walay sama,” miingon si Presidente Russell M. Nelson sa pagpahinungod sa Rome Italy Temple niadtong Marso 2019. “Nagtukod pa lang kita og pundasyon alang sa umaabut.”

Sa pagpahinungod, ang tanan nga mga sakop sa Unang Kapangulohan ug Korum sa Napulog Duha ka mga Apostoles, sa unang higayon, nagkapundok sa usa ka dapit sa gawas sa Estados Unidos. “Isip mga Apostoles ni Ginoong Jesukristo sa modernong panahon,” miingon si Presidente Nelson, “ang mensahe nga among gipaambit karon mao gihapon nga mensahe nga gipaambit sa mga Apostoles kaniadto sa dugay nang panahon—nga ang Dios buhi ug nga si Jesus mao ang Kristo.”

Agig dugang sa pagpahinungod sa templo, si Presidente Nelson namulong sa kabatan-onan diha sa distrito sa templo ug nakighimamat ni Pope Francis, ang labing unang higayon nga ang usa ka Presidente sa Simbahan adunay pormal nga pakigkita sa pangulo sa Roman Catholic Church.

Basaha ang mga komentaryo mahitungod sa Rome Italy Temple ug tan-awa ang mga litrato gikan sa Roma diha sa ChurchofJesusChrist.org/prophets-and-apostles.