Elder Ricardo P. Giménez

General Authority Seventy

Ang mga miyembro sa Simbahan sa Antofagasta, Chile, dugay nga makalimot sa kinatibuk-ang komperensya sa Abril 2019 tungod sa pagpahibalo sa umaabut nga templo didto ug sa pagtawag sa usa ka lumad nga anak, si Elder Ricardo P. Giménez, isip usa ka General Authority Seventy.

Samtang namalandong siya sa mga responsibilidad sa iyang bag-ong calling, si Elder Giménez nakakuha og pagtuo ug kaisug sa panultihon nga “Kinsa ang tawagon sa Ginoo, ang Ginoo mopasarang” (Thomas S. Monson, “Duty Calls,” Ensign, Mayo 1996, 44).

“Gitudlo ko kana nga panultihon sa makadaghang higayon sa milabayng panahon, ug karon naningkamot ko nga mogamit niana sa akong kaugalingon,” miingon siya. “Ang Langitnong Amahan mitawag kaninyo. Siya nakaila kaninyo. Mao nga lakaw ug buhata ang unsay Iyang gusto, ug ang tanan mamaayo ra.”

Si Ricardo Patricio Giménez Salazar natawo niadtong Nobyembre 28, 1971, ang magulang sa duha ka anak nga natawo kang Ricardo Benjamín Giménez Gimeno ug Myrto Lucisca Amalia Salazar Signorini. Mipasakop siya sa Simbahan sa edad nga 11 ug mibalhin uban sa iyang inahan ug igsoong babaye ngadto sa Santiago, Chile, human nagdiborsyo ang iyang mga ginikanan.

Niadtong 1995, iyang nahimamat si Catherine Ivonne Carrazana Zúñiga sa Santiago sa dihang misugod kini sa pagtambong sa iyang ward samtang nagpuyo kini didto uban sa usa ka uyoan. Nasilyo sila sa Santiago Chile Temple niadtong Septyembre 12, 1997, ug karon mga ginikanan sa duha ka anak.

Si Elder Giménez nakadawat og undergraduate degree sa accounting ug auditing sa University of Santiago niadtong 1997 ug master of business administration degree sa University of Chile niadtong 2003. Misugod siya sa iyang propesyonal nga panarbaho sa industriya sa minahan, sa katapusan mibalhin ngadto sa impormasyon sa teknolohiya isip finance director sa Computer Sciences Corporation sa Latin America. Mibalik siya sa minahan niadtong 2012, una diha sa Sierra Gorda Mining ug dayon sa Robinson Nevada Mining Company.

Sa panahon sa iyang tawag, si Elder Giménez nagserbisyo isip magtatambag sa kapangulohan sa stake. Nakaserbisyo usab siya isip Area Seventy sa South America South Area, presidente sa stake, high councilor, bishop, magtatambag sa bishopric ug sa kapangulohan sa Young Men sa ward, ug full-time nga misyonaryo sa Chile Concepción Mission.