Elder Rubén V. Alliaud
General Authority Seventy
Si Rubén Alliaud nag-edad og 14 sa dihang mibiya siya sa iyang panimalay sa Argentina aron mogahin og usa ka tuig uban sa iyang uyoan sa Estados Unidos. Ang iyang amahan, si Rubén Reynaldo Alliaud, namatay sa sayong bahin niana, ug si Rubén misugod sa pagpakita og “masupakon nga espiritu.”
Ang iyang nabalaka nga inahan, si María, mipadala niya ngadto sa Houston, Texas, aron mopuyo uban sa igsoon ni Maria, si Manuel Bustos, ug sa iyang pamilya. Mihangyo siya og usa ka kondisyon sa pamilya sa iyang igsoon: “Ayaw ipaambit ang inyong tinuohan isip Santos sa Ulahing mga Adlaw ngadto sa akong anak.”
Hinoon, ang espiritu sa ebanghelyo nakadani sa nanlimbasug nga tin-edyer. Nakaobserbar siya kon sa unsang paagi ang Simbahan mihiusa sa pamilyang Bustos pinaagi sa pag-ampo ug pagserbisyo, ug dili niya kapugngan nga makamatikod sa daghang kopya sa Basahon ni Mormon sa estante sa iyang kwarto.
Nakuryoso, mikuha siya og usa ka kopya ug nadiskubrihan ang saad ni Moroni nga mahimo niyang masayran pinaagi sa pag-ampo nga ang Basahon ni Mormon tinuod.
“Kana nga saad nakatandog kanako,” miingon ang bag-ong natawag nga General Authority Seventy. “Gusto nakong mobasa sa libro.”
Seryuso niyang gidawat ang saad ni Moroni, nakadawat og nagmatuod nga tubag, ug misulti sa iyang nakalitan nga uyoan nga gusto niyang magpabunyag. Si Tiyo Manuel diha-diha dayon mipapauli ni Rubén ngadto sa Argentina aron mangayo sa pagtugot sa iyang inahan. Nabunyagan siya wala madugay. Sukad niadto, ang gipahiuli nga ebanghelyo milig-on sa kinabuhi ni Elder Alliaud.
Si Rubén Vicente Alliaud natawo niadtong Enero 8, 1966, sa Buenos Aires. Naminyo siya kang Fabiana Bennett Lamas sa Buenos Aires Argentina Temple niadtong Disyembre 17, 1992. Sila adunay unom ka anak.
Si Elder Alliaud nakaangkon og law degree gikan sa University of Belgrano, sa Buenos Aires, ug misinati og nagkadaiya nga panarbaho kalabut sa balaod, nagpakabatid sa balaod kalabut sa krimen. Sukad sa 1998 mitrabaho siya isip managing partner sa Alliaud & Asociados.
Nakaserbisyo siya isip Area Seventy, presidente sa Argentina Córdoba Mission, presidente sa stake, high councilor, bishop, presidente sa korum sa mga elder, ug misyonaryo sa Uruguay Montevideo Mission. Sa panahon sa iyang tawag, nagserbisyo siya isip magtutudlo sa institute, unang magtatambag sa kapangulohan sa Missionary Training Center sa Argentina, ug direktor sa public affairs.