Elder John A. McCune
General Authority Seventy
Sa sayong bahin sa iyang pangnegosyo nga trabaho, si Elder John A. McCune nakig-istorya sa iyang boss diin dali nga naklaro nga ang lalaki wala kaayoy nahibaloan mahitungod sa Ang Simbahan ni Jesukristo sa mga Santos sa Ulahing mga Adlaw. Ang iyang boss nangutana ni Elder McCune nganong ang mga Santos sa Ulahing mga Adlaw dili mosayaw o dili mokaon og cookies.
“Klaro kaayo nga mokaon ko og cookies,” nagpahiyum nga misulti si Elder McCune sa iyang boss, gihapuhap ang iyang tiyan. “Morag nasaypan mi nimo sa laing tawo.”
Samtang nag-istoryahanay sila, gipatin-aw ni Elder McCune ang sayop nga mga panghunahuna mahitungod sa Simbahan. Kana nga diskusyon misangput ngadto sa laing pag-istoryahanay mahitungod sa ebanghelyo ni Jesukristo ug mimatuod kang Elder McCune sa kaimportante nga kanunayng andam sa pagpaambit sa ebanghelyo.
“Mga disipulo kita sa Manluluwas nga si Jesukristo, bisan asa kita, sa bisan unsang kahimtang, sa bisan unsang oportunidad,” miingon si Elder McCune. “Aduna kitay mga trabaho ug mga propesyon, apan anaa kini aron sa pagsuporta sa atong mga pamilya ug sa pagbutang kanato sa mga sitwasyon nga makapaambit sa ebanghelyo. Mao kana ang atong nag-unang responsibilidad isip mga disipulo ni Jesukristo.”
Si John Allen McCune natawo sa Santa Cruz, California, USA, niadtong Hunyo 20, 1963, ngadto nilang Clifford ug Joan Schulthies McCune. Nagdako siya sa kinatibuk-an diha sa Nyssa, Oregon, USA.
Human makaserbisyo og full-time nga misyon sa Fukuoka, Japan, si Elder McCune naminyo kang Debbra Ellen Kingsbury sa Salt Lake temple niadtong 1984. Mga ginikanan sila sa upat ka anak ug nagpuyo sa Midway, Utah, USA.
Si Elder McCune nakadawat og bachelor of science degree sa finance gikan sa Brigham Young University ug wala madugay ang master of business administration degree sa finance gikan sa University of California, Los Angeles (UCLA). Mitrabaho siya isip ang senior vice president ug tigdumalang direktor sa Capital Investment Advisors gikan 1997 hangtud 2012. Dayon miserbisyo siya isip presidente sa Utah Provo Mission sa wala pa mahimong donor liaison alang sa dagkong mga gasa sa LDS Philanthropies.
Si Elder McCune nagserbisyo isip Area Seventy panahon sa iyang bag-ong tawag. Nakaserbisyo usab siya isip presidente sa stake, bishop, magtatambag sa bishopric ug sa kapangulohan sa branch, ug presidente sa korum sa mga elder.