Elder James R. Rasband
General Authority Seventy
Sa dihang si Elder James R. Rasband gitawag ngadto sa kapangulohan sa stake pipila ka tuig na ang milabay, gibati niya nga dili siya andam. “Nasayup lang siguro ni,” naghunahuna siya.
Mibati siya og susama nga pagkadili angay isip 19 anyos nga misulod sa Provo Missionary Training Center agig pagpangandam alang sa full-time nga misyon ngadto sa Seoul, South Korea. “Unsaon man ni nako pagbuhat?” naghunahuna siya.
Niining duha ka sitwasyon, ang tubag mao ra gihapon: “Padayon niana. Ang kalipay moabut.” O, sa mga pulong sa iyang inahan, “Ang Ginoo walay suplay sa perpekto nga mga tawo. Trabaho lang gyud.”
Mibati si Elder Rasband og gamay niana nga pagduha-duha karon samtang iyang atubangon ang iyang bag-ong tawag isip General Authority Seventy, apan nasayud siya sa tubag: “Ang atong Langitnong Amahan nagkinahanglan lang nato nga motrabaho ug mopaambit sa makaayo ug makalipay nga mensahe sa Iyang Anak ug sa maulaong sakripisyo sa Iyang Anak.”
Si James Richard Rasband natawo sa Seattle, Washington, USA, ngadto ni James E. ug Ester Rasband niadtong Marso 20, 1963. Nagdako siya sa Pebble Beach, California, USA, sa balay nga mga 180 metros gikan sa daplin sa dagat.
Nahimamat ni Elder Rasband si Mary Diane Williams samtang freshman sa Brigham Young University. Nagsinulatay sila sa usag usa samtang mieskwela siya sulod sa lima ka bulan didto sa Israel ug dayon sa tibuok niyang pagserbisyo sa Korea Seoul Mission. Naminyo sila sa Los Angeles California Temple niadtong Agosto 11, 1984. Mga ginikanan sila sa upat ka anak.
Human makapauli gikan sa iyang misyon, nahuman niya ang iyang bachelor’s degree sa English ug Near Eastern studies sa BYU niadtong 1986 ug dayon nakaangkon og juris doctor degree gikan sa Harvard Law School niadtong 1989. Human motrabaho isip abogado sulod sa lima ka tuig sa Seattle, mibalik siya sa BYU niadtong 1995 aron moapil sa faculty sa J. Reuben Clark Law School. Miserbisyo siya isip dean sa abogasiya gikan sa 2009 hangtud 2016, sa dihang nahimo siyang academic vice president sa BYU.
Si Elder Rasband nakaserbisyo isip Area Seventy, presidente sa stake, magtatambag sa kapangulohan sa stake, high councilor, bishop, ug presidente sa Young Men sa ward.