Ang Pagpangalagad ni Presidente Nelson Nagpadayon

Si Presidente Russell M. Nelson ug Elder Enrique R. Falabella sa Seventy gihangup sa debosyonal sa Lima, Peru.

Wala madugay human sa kinatibuk-ang komperensya sa Oktubre 2018, si Presidente Russell M. Nelson mibiyahe ngadto sa Peru, Bolivia, Paraguay, Uruguay, ug Chile, diin mibisita siya sa mga miyembro ug mga misyonaryo ug mipahigayon og mga debosyonal, lakip ang usa ka debosyonal sa kabatan-onan sa Chile nga gitambongan sa 1,500 ug gisibya usab sa tibuok nasud. Namulong siya ngadto sa mga miyembro sa Kinatsila, mipahinungod sa Concepción Chile Temple, ug nakighimamat sa mga lider sa lokal nga gobyerno.

Liboan ka mga babaye ang mitubag diha sa social media sa pagdapit ni Presidente Nelson nga mo-report sa ilang mga kasinatian sa upat ka hagit nga iyang gihatag panahon sa kinatibuk-ang komperensya sa Oktubre 2018: (1) magpuasa sa social media ug negatibo nga media sulod sa 10 ka adlaw, (2) makabasa na sa Basahon ni Mormon sa katapusan sa 2018, (3) kanunay nga motambong sa templo, ug (4) hingpit nga moapil sa Relief Society. “Gusto nakong mopasalamat ninyong tanan tungod sa pagtubag sa akong mga pagdapit,” miingon si Presidente Nelson, mipahayag og paglaum nga “ang matag usa niini nga mga pagdapit nakapaduol ninyo ngadto sa Manluluwas.”

Si Presidente Nelson nangulo sa tulumanon sa lubong sa iyang anak, si Wendy Nelson Maxfield, kinsa namatay human sa maisugon nga pakigbugno sa kanser. “Ang atong mga luha sa kasubo mahimong mga luha sa pagpaabot samtang makaangkon kita og mahangturong panglantaw,” miingon siya. Namulong siya mahitungod sa iyang anak sa usa ka espesyal nga komperensya sa mga miyembro sa Chico California Stake, nga naglakip sa duha ka unit sa Paradise nga nadaut sa sunog. “Inyong makat-onan nga ang tanan adunay mga hagit,” miingon siya. “Kon gusto ninyong mas maayo ang bation, kalimti ang inyong kaugalingon ug pagserbisyo sa laing tawo.”

Sa Arizona, USA, si Presidente Nelson midapit sa 65,000 ka miyembro nga nagkapundok sulod sa usa ka sports stadium “nga motabang sa pagpundok sa Israel sa duha ka habig sa tabil.” Si Presidente Nelson misulat usab og usa ka dinapit nga lindog [guest column] nga gimantala sa pamantalaang Arizona Republic nga nag-awhag sa mga tawo “sa pagtan-aw ngadto [sa Ginoo] ug sa paghimo Kaniya nga sentro sa inyong kinabuhi.” Miapil siya sa usa ka interbyu nga gisibya sa mga estasyon sa telebisyon sa estado; adunay pipila ka mga pakighimamat sa mga lider sa sibiko, edukasyon, ug relihiyon; ug mipahigayon og usa ka sesyon sa pagpangutana ug pagtubag uban sa mga young single adult.

Sukad siya naorden niadtong Enero 14, 2018, si Presidente Nelson nakabisita na og 5 ka kontinente, 16 ka nasud ug teritoryo, ug 24 ka siyudad, nga mibiyahe og mga 55,000 ka milya (88,515 km).