Misyonaryo nga Balita

Pagkontak sa panimalay. Ang mga misyonaryo gitugutan na karon sa pagpakig-istorya sa ilang mga pamilya matag semana atol sa adlaw sa pagpangandam [preparation day] pinaagi sa mga mensahe sa text, online nga pagmensahe, mga tawag sa telepono, ug mga pag-video chat, agig dugang sa mga sulat ug mga email.

Himan sa pagplano alang sa umaabut nga mga misyonaryo. Usa ka bag-o nga online nga himan sa pagplano alang sa misyon gikan sa Missionary Department sa Simbahan makatabang sa umaabut nga mga misyonaryo nga mas matimbangon ug mahunahunaon samtang mohukom sila kon kanus-a sila labing andam nga moserbisyo sa Ginoo isip misyonaryo.

Mga misyon sa pagpangalagad [service missions]. Sugod sa Enero 2019, ang batan-on nga mga Church-service missionary gitawag nga “mga misyonaryo nga mangalagad [service missionary].” Ang tanang batan-on nga mga hingkud kinsa mo-apply alang sa misyonaryo nga pagserbisyo mobuhat niini sa samang paagi, pinaagi sa usa ka online portal, ug ang tanan nga mga tawag sa misyon—bisan kon alang sa misyon nga mag-proselyte o misyon sa pagpangalagad—magagikan sa propeta. Ang takus nga mga batan-ong hingkud kinsa tungod sa lain-laing mga rason dili mahimong moserbisyo og misyon nga mag-proselyte mahimong tawagon ngadto sa misyon sa pagpangalagad.

Ang mga sister missionary mahimong magsul-ob og karsones. Ang mga sister missionary karon adunay opsyon nga magsul-ob og karsones sa normal nga inadlaw nga mga kalihokan, bisan og ang mga sister kinahanglan nga mopadayon sa pagsul-ob og sinina o sayal kon motambong sa templo ug panahon sa mga tulumanon sa pagsimba sa Dominggo, mga komperensya sa pagpangulo ug sa zone, mga tulumanon sa bunyag , ug sa mga debosyonal sa missionary training center. Ang pagsul-ob og mga slack makatabang sa pagpanalipod sa mga sister gikan sa makatakud nga mga sakit nga dala sa lamok, makahatag og kainit sa mga sister sa bugnaw nga mga klima, ug makapasayon alang sa mga sister sa pagsakay og bisikleta.

Mga misyon gimugna, mga utlanan giusab. Upat ka bag-ong misyon ang gimugna, ug napulog duha ka misyon ang itipon sa uban nga mga misyon. Ang ingon nga mga kausaban mahitabo matag karon ug unya aron mapahiangay sa gidaghanon sa mga misyonaryo nga nagserbisyo. Ang bag-ong mga misyon mao ang Democratic Republic of the Congo Kinshasa East, Guatemala Antigua, Peru Limatambo, ug Philippines Antipolo. Ang mga ginikanan sa mga misyonaryo nga nagserbisyo sa naapektohan nga mga misyon—gimugna man o giwala—makadawat og dugang nga impormasyon gikan sa ilang mga presidente sa misyon.

Ang gidaghanon sa mga sentro sa pagbansay sa mga misyonaryo [MTC] gipahiangay. Aron mas maayo ang kinatibuk-ang paggamit sa mga sentro sa pagbansay sa mga misyonaryo sa tibuok kalibutan, sirad-an ang mga sentro sa Argentina, Spain, Chile, ug sa Dominican Republic. Tungod sa pagpanira, ang Simbahan mopadagan og 11 ka mga sentro sa pagbansay sa mga misyonaryo, nahimutang sa Brazil; Colombia; England; Ghana; Guatemala; Mexico; New Zealand; Peru; Philippines; Provo, Utah, USA; ug South Africa.

Mga video alang sa kasiguroan [safety]. Ang bag-ong 12-ka bahin nga serye sa video The Safety Zone gidesinyo aron madugangan ang kasiguroan sa 65,000 ka full-time nga mga misyonaryo nga nagserbisyo karon ingon man usab niadtong moserbisyo pa. Ang unang video gidesinyo nga tan-awon sa umaabut nga mga misyonaryo uban sa ilang mga ginikanan human madawat ang tawag sa pagmisyon ug sa dili pa mosulod sa sentro sa pagbansay sa mga misyonaryo. Sa MTC, ang mga misyonaryo motan-aw og balik sa unang video ingon man sa laing 11. Ang matag karon ug unya nga mga pahinumdom kalabut sa kasiguroan ihatag usab ngadto sa mga misyonaryo sa tibuok nilang misyon.