Mark L. Pace
Kinatibuk-ang Presidente sa Sunday School
Diha sa interbyu nga gitakda alang sa tawag nga moserbisyo isip ang bag-ong Kinatibuk-ang Presidente sa Sunday School sa Simbahan, si Brother Mark L. Pace mihalad og mainampoong pasalig.
“Langitnong Amahan, bisan unsay Imong ipabuhat kanako, malipay ko nga mobuhat niini,” nag-ampo siya. “Hibaloi lang nga hingpit akong mopasalig.”
Miingon si Brother Pace nga ang iyang nag-unang tinguha sa iyang bag-ong calling mao ang pagpanalangin, pagsuporta, ug pag-awhag sa mga miyembro sa Simbahan. “Gusto namong mohatag sa tanan nga anaa kanamo,” miingon siya kabahin sa bag-ong Kinatibuk-ang Kapangulohan sa Sunday School.
Si Mark Leonard Pace natawo niadtong Enero 1, 1957, sa Buenos Aires, Argentina, ngadto nilang Lorin Nelson ug Marylynn Haymore Pace. Nianang panahona, ang amahan ni Brother Pace nagdumala sa Argentine Mission.
Nahimamat ni Brother Pace ang umaabut niyang asawa, si Anne Marie Langeland, samtang ang duha klasmeyt sa grade 2 sa Siyudad sa Salt Lake, Utah, USA. Sa kadugayan, samtang nag-eskwela sa lain-laing high school diha sa siyudad, nagkasuod sila og balik atol sa hiniusang kalihokan sa seminary. Nagsinulatay sila sa usag usa sa misunod nga pipila ka tuig samtang si Anne Marie miuban sa iyang pamilya ngadto sa Norway, diin ang iyang amahan nangulo sa Norway Oslo Mission, ug samtang si Brother Pace nagserbisyo sa Spain Madrid Mission. Naminyo sila sa Salt Lake Temple pagka-Nobyembre 21, 1978, ug mga ginikanan sa pito ka anak.
Si Brother Pace migradwar og bachelor’s degree sa economics gikan sa University of Utah niadtong 1980 ug adunay master of business administration degree gikan sa Harvard Business School niadtong 1982. Human sa mubong pangempleyo sa Price Waterhouse sa Siyudad sa New York, misulod siya sa Boyer Company sa Siyudad sa Salt Lake, mitrabaho diha sa commercial real estate development gikan sa 1984 hangtud 2012. Human sa tulo ka tuig nga buluhaton isip presidente sa Spain Barcelona Mission, misulod siya sa Gardner Company niadtong 2015, mitrabaho sa real estate development.
Sa panahon sa iyang bag-ong calling, si Brother Pace nagserbisyo isip Area Seventy. Ang iyang nangaging mga calling sa Simbahan naglakip sa magtatambag sa kapangulohan sa stake, high councilor, bishop, magtatambag sa bishopric, presidente sa korum sa mga elder, presidente sa Young Men sa ward, ug Scoutmaster.