Elder Jorge M. Alvarado

General Authority Seventy

Si Miguel ug Iris Alvarado mipasakop sa Simbahan sa Puerto Rico niadtong 1977 sa dihang ang ilang anak nga si Jorge sayis anyos pa. Ang bata nga si Jorge gibunyagan paglabay sa duha ka tuig ug wala pa gayud makapalta og mga tulumanon sa Igpapahulay.

“Apan ang kaugalingon nakong pagkakabig nahitabo sa dihang nag-16 ko,” miingon ang bag-ong natawag nga General Authority Seventy.

Sa high school, misugod siya sa pagserbisyo isip presidente sa iyang klase sa seminary sa iyang yutang natawhan nga Ponce. Ang mga estudyante nagtuon sa Basahon ni Mormon nianang tuiga. Ang iyang bag-ong responsibilidad nakaaghat og pagtimbang-timbang sa kaugalingon.

“Kinahanglang mangutana ko sa akong kaugalingon, ‘Nasayud ba gayud ako nga ang Basahon ni Mormon tinuod?’ Unsaon nako pagkahimong presidente sa akong klase sa seminary kon wala gani ko masayud kon tinuod ba kana nga basahon?”

Gikuha niya ang iyang kopya sa Basahon ni Mormon ug sa labing unang higayon misugod sa pagbasa niini nga kinasingkasing.

“Miluhod ko ug nag-ampo ko, ug akong nasayran dayon nga kini tinuod,” miingon siya.

Ang Basahon ni Mormon nagpabilin nga labing importante nga impluwensya sa kinabuhi ni Elder Alvarado.

Samtang nagserbisyo isip full-time nga misyonaryo didto sa Florida Tampa Mission, iyang gipaambit ang Basahon ni Mormon sa tanan nga iyang gitudloan. Sa kadugayan, gitun-an niya ang basahon uban sa iyang asawa ug sa ilang tulo ka anak. Isip presidente sa Puerto Rico San Juan Mission, gihagit niya ang iyang mga misyonaryo sa paghigugma ug sa pagpaambit sa Basahon ni Mormon.

Karon, isip usa ka General Authority Seventy, si Elder Alvarado nagpabilin nga matinguhaon sa pagdapit sa uban nga madiskubrihan ang makapausab sa kinabuhi nga mga kamatuoran sa Basahon ni Mormon.

Si Jorge Miguel Alvarado Pazo natawo niadtong Nobyembre 21, 1970. Niadtong Disyembre 19, 1992, naminyo siya kang Cari Lu Rios sa Washington D.C. Temple.

Human makaeskwela og business management sa University of Puerto Rico, mitrabaho siya sa lain-laing mga kapasidad sa pagdumala og negosyo sa Puerto Rico ug sa Estados Unidos. Bag-uhay lang, mitrabaho siya sa punoang buhatan sa Simbahan sa Siyudad sa Salt Lake isip international manager alang sa Self-Reliance Services.

Si Elder Alvarado nakaserbisyo isip Area Seventy, presidente sa stake, high councilor, presidente sa branch, ug ward mission leader.