Elder Benjamin M. Z. Tai
General Authority Seventy
Ang lolo ni Elder Benjamin M. Z. Tai sa habig sa amahan nadakpan, nabilanggo, ug gipatay sa kasundalohan sa mga Hapon nga misulong sa Hong Kong panahon sa Ikaduhang Gubat sa Kalibutan.
Paglabay sa mga dekada, nahimamat ni Elder Tai ang umaabut niyang asawa, si Naomi Toma, gikan sa Japan, samtang nagserbisyo isip presidente sa korum sa mga elder sa iyang student ward sa Brigham Young University. Si Naomi nagserbisyo isip presidente sa Relief Society.
Sa dihang gisultihan ni Benjamin ang iyang amahan, si emeritus General Authority Elder Kwok Yuen Tai, nga nakig-date siya ug naglaum nga maminyo kang Naomi, ang iyang amahan wala mopahayag og kayugot. Gani, ang mga ginikanan ni Naomi, si Rikuo ug Fumiko Toma, miadto sa Hong Kong aron mobisita sa mga ginikanan ni Benjamin. Gihisgutan sa mga ginikanan ni Naomi nga nahimong posible ang ilang kaminyoon tungod sa ebanghelyo ni Jesukristo. Ang magtiayon naminyo didto sa Salt Lake Temple niadtong Disyembre 23, 1995. Mga ginikanan sila sa unom ka anak.
“Gikan kami sa managlahi nga mga kultura, apan adunay mga baruganan sa komon nga pagtuo ug sakripisyo,” miingon si Elder Tai. Si Elder Tai nasayud nga kadto nga mga baruganan sa pagtuo ug sakripisyo mosumpay kaniya karon sa mga Santos sa Ulahing mga Adlaw sa tibuok kalibutan.
Si Benjamin Ming Zhe Tai natawo niadtong Mayo 20, 1972, sa Hong Kong ngadto nila ni Kwok Yuen ug Hui Hua Tai. Ang panarbaho sa iyang amahan midala sa pamilya libut sa kalibutan sa wala pa sila milalin ngadto sa Southern California, USA, diin didto gigahin ni Elder Tai ang iyang pagkatin-edyer. Sa ilang panimalay, ang iyang mga ginikanan miplastar og lukun nga papel [scroll] nga gisulatan niini nga mga pulong sa Chinese calligraphy: “Alang kanako ug sa akong balay, kami magaalagad sa Ginoo” (Josue 24:15). Nagsilbi kining motto sa pamilyang Tai.
Human nakaserbisyo sa Australia Melbourne Mission, nakaangkon si Elder Tai og bachelor’s degree sa exercise science gikan sa BYU niadtong 1996 ug master’s degree sa business administration gikan sa University of California, Los Angeles (UCLA), niadtong 2003. Nakatrabaho siya sa Japan ug Hong Kong sa investment banking ug real estate development.
Nakaserbisyo si Elder Tai isip usa ka Area Seventy, presidente sa district, magtatambag sa kapangulohan sa district, executive secretary sa district, presidente sa korum sa mga elder, presidente sa branch, ug magtutudlo sa Sunday School.