Walo ka Bag-ong Templo, Makasaysayanon nga mga Pagpabag-o Gipahibalo
Ang mga templo nga panahon pa sa mga pioneer, lakip na ang Salt Lake Temple, ayuhon, ug dugang walo ka bag-ong mga templo tukuron.
Si Presidente Russell M. Nelson mitapos sa kinatibuk-ang komperensya sa Abril 2019 pinaagi sa pagpahibalo og walo ka bag-o nga templo ug sa pagpabag-o sa upat ka templo nga natukod panahon pa sa mga pioneer, lakip ang dugang nga mga detalye mahitungod sa pagpabag-o sa Salt Lake Temple.
Ang bag-ong mga templo tukuron sa Pago Pago, American Samoa; Siyudad sa Okinawa, Okinawa; Neiafu, Tonga; Tooele Valley, Utah, USA; Moses Lake, Washington, USA; San Pedro Sula, Honduras; Antofagasta, Chile; ug Budapest, Hungary.
Ang mga plano alang sa dako nga pagpabag-o sa Salt Lake Temple maglakip sa pag-usab sa Temple Square ug ang kasikbit nga plaza duol sa Church Office Building sa Siyudad sa Salt Lake, Utah, USA. Ang mga templo sa St. George, Manti, ug Logan, Utah, USA, pagaayuhon usab sa dili madugay. “Kini nga buhat magkinahanglan nga ang matag templo sirad-an sa mubo nga panahon,” miingon si Presidente Nelson. “Ang mga miyembro sa Simbahan mahimong makapadayon sa pagtagamtam sa pagsimba ug serbisyo sa templo sa laing duol nga mga templo. Kon ang matag proyekto makompleto na, ang matag makasaysayanong templo ipahinungod og balik.”
Sukad nahimong Presidente sa Simbahan niadtong Enero 2018, si Presidente Nelson mipahibalo na og 27 ka bag-ong mga templo. Sukad sa miaging kinatibuk-ang komperensya sa Oktubre 2018, ang mga templo gipahinungod diha sa Rome, Italy; Barranquilla, Colombia; ug Concepción, Chile.