Bag-o nga mga Polisiya, mga Pamaagi, mga Kapanguhaan

Kabatan-onan

Ang mga bata ug kabatan-onan mouswag gikan sa usa ka klase o korum ngadto sa sunod isip mga grupo sa kaedad inigka-Enero imbis nga pagkahuman sa ilang mga birthday.

Pamahayag mahitungod sa mga templo. Ang Unang Kapangulohan mipagawas og pamahayag niadtong Enero 2, 2019, nga nag-ingon sa usa ka bahin: “Sa paglabay niining daghang mga siglo, ang mga detalye kalabut sa buhat sa templo giusab matag karon ug unya, lakip sa pinulongan, mga pamaagi sa pagtukod, komunikasyon, ug pagtipig sa rekord. Ang mga propeta nagtudlo nga magpadayon ang ingon nga mga pag-usab sumala sa direksyon sa Ginoo ngadto sa Iyang mga sulugoon.”

Pag-uswag sa mga bata ug kabatan-onan. Ang mga bata karon mokompleto sa Primary ug ang kabatan-onan mobalhin gikan sa usa ka klase o korum ngadto sa sunod isip mga grupo sa kaedad pagka-Enero imbis nga sa ilang indibidwal nga birthday. Nagpasabut usab kini nga ang mga batan-on makadawat og limitado og gamit nga temple recommend alang sa unang higayon sa Enero sa tuig nga mag-12 anyos sila, ug ang mga batan-ong lalaki mahimong ordinahan ngadto sa Aaronic nga Pagkapari sa Enero sa tuig nga mag-12 anyos sila.

Dugang nga mga oportunidad sa pagserbisyo. Ang LDS Charities mipahibalo sa pakigpares niini sa JustServe.org aron mapasiugdahan ang #YouCanDoSomething nga inisyatibo, nagdapit sa mga tawo nga moserbisyo sa lokal nga dapit ug modonar ngadto sa maayong mga kawsa sa tibuok kalibutan aron makatabang sa pag-usab sa kalibutan. Aron sa pagsugod, bisitaha ang “How to Help” nga pahina sa LDSCharities.org.

Bag-ong mga kapanguhaan sa pagpangalagad. Ang website nga This Is Ministering [Mao Kini ang Pagpangalagad] (ministering.ChurchofJesusChrist.org) gi-update uban sa dugang nga mga artikulo ug mga video. Ang mga kapanguhaan diha sa website makatabang sa mga magbabasa nga mopadangat og kalooy, mougmad og mas makahuluganon nga mga relasyon, mopalambo sa ilang mga kahanas sa pagpaminaw, ug uban pa. Ang bag-ong mga sulod naglakip sa mga artikulo sa Mga Baruganan sa Pagpangalagad nga gimantala sa Ensign ug Liahona nga mga magasin, mga link padulong sa mga pakigpulong sa kinatibuk-ang komperensya mahitungod sa pagpangalagad, ug ikapaambit nga mga video, mga kinutlo, ug mga kasulatan.

Paglaum ug pagkaayo alang sa mga biktima sa pang-abuso. Usa ka bag-ong website sa Simbahan, abuse.ChurchofJesusChrist.org, nagtanyag og mga kapanguhaan ug praktikal nga mga himan alang sa mga biktima sa pang-abuso ug alang niadtong kinsa gusto nga motabang sa pagpugong sa pagpang-abuso. Ang Unang Kapangulohan mipagawas usab og usa ka sulat niadtong Marso 26, 2019, nga nag-awhag sa mga lider sa Simbahan nga mopadangat og gugma aron sa pagtabang niadtong nag-antus sa pagpang-abuso. Lakip sa sulat mao ang usa ka kapanguhaan nga dokumento nga nag-update sa mga lagda kon unsaon sa mga bishop ug mga kapangulohan sa stake sa pagtambag sa mga biktima sa sekswal nga pagpang-abuso ug kon unsaon nila sa pagpahigayon og mga interbyu sa mga miyembro sa Simbahan. Ang Simbahan mipagawas usab og video, “Protect the Child,” ug mi-update sa artikulo sa Mga Hilisgutan sa Ebanghelyo kalabut sa pagpang-abuso.

Bag-o nga mga feature ug apps. Ang Study Plans nga bahin sa labing ulahi nga update sa Gospel Library app magtugot kaninyo sa paghimo og eskedyul alang sa pagtuon sa bisan unsang sulod nga makita diha sa app. Ang Ordinances Ready maoy usa ka bag-ong himan sa FamilySearch nga mopayano sa pagpangita og mga ngalan alang sa templo, naghatag kaninyo og mas dakong panahon sa pagserbisyo sa inyong pamilya ug pagtagamtam sa mga panalangin sa templo. Ug ang FamilySearch adunay dul-an sa tulo ka dosena nga bag-ong mga kalihokan sulod sa panimalay, sama sa “Walk Where They Walked [Paglakaw Diha sa Ilang Gilaktan],” aron sa pagtabang nga mapaapil ang mas batan-on nga mga miyembro diha sa family history. Ang mga kalihokan anaa sa 10 ka pinulongan.

Ang dagko nga mga produksyon hunungon. Samtang ang lokal nga mga pagsaulog sa kultura ug kasaysayan tingali haum, ang Simbahan karon mohunong na sa dagko nga mga produksyon sama sa mga pageant. Tulo ka mga pageant magpadayon: ang Nauvoo Pageant sa Illinois, USA, nga suportahan sa punoang buhatan sa Simbahan; ang Mesa Pageant sa Arizona, USA, ubos sa pagpangulo sa area; ug ang British Pageant, ubos sa pagpangulo sa area, nga himoon matag upat ka tuig. Gihunong usab sa Simbahan ang pagsaulog sa kabatan-onan sa kultura sa wala pa ang mga pagpahinungod sa templo ug palabihon ang mga debosyonal sa kabatan-onan uban sa mobisita nga mga lider sa Simbahan.