Ana Iteraniba te Aono
Kakukurein Taai aika a na Roko ibukiia Au Utu
Karekean te kataneiai n te mwakuri ao n te maiu n tamnei rinanon te Pathway Programme.
Arau bon Eute Kareketaake. Bon 24 au ririki ao au kouru bwa I kan riki bwa te tia mwakuri ae mwaatai ibukin kamweeraoaia aomata. I rinanon te moan ibuobuoki n tangira ao n tararua ibukin kamweeraoaia aomata n te kaangaanga are I rinanona inanon maiu ao man te tai anne iai au kantaninga nakon te nakoa anne.
Ngke ti uarereke Ngai ma tariu ao ti a kamwanangaaki nakon te United States bwa ti na maeka iroun aitinau ao n nako n reirei. Ti kakaitau n reken te tai ae tamaroa ibukin te reirei, ma e aki tararuaira raoi aitinau. N te tai teuana ae riki ao e nako ni motirawa aitinau ao ni kitanai ma tariu ni katikuira n tii ngaira n te auti. Iai ae e na bae n tuoira ni katoa bong, bwa ti bon rangi n ataei ao ti maaku n tiku i bon iroura.
E nakobuaka au tai bwa e aki kona n reke matu n te tairiki ao ngkana I a matu n te kiraati e titiraki te tia reirei bwa bukin tera ngkai I rangi ni kua. Akea au iango ae ara kaangaanga anne e bon aki butimwaeaki ao n tounako n aron aia waaki nakon au kaeka. Ngai ma tariu ti intawiunaki irouia taan mwakuri ibukin kamweeraoia aomata ao I namakina nanoia ibukin aia mwakuri ao nanoia ae koaua ni kan buokiira. I tangiria ni kan riki n ai aroia ao ni buokiia ataei n ai arora n te aro n tangira naba are a tia ni karaoia. Te nano n tangira anne e aki kona n nako mairou.
Au kaangaanga n te US bon tiaki te tai ae korakora ibukin te reirei n aron ae e na bon riai, ma te Atua e mwakuri ni kawai aika a kamiimi ao te bwai are I rinanona e kairai bwa N na kakaea te bwai are I nano iai inanon maiu. N anne I reitinako ni kekeiaki n riki bwa te tia mwakuri ibukin kamweeraoaia aomata, te kawai nakon te kouru aei e aki bebete; n taai tabetai e reke te namakin ae kaangaanga. I a tia n reiakinna, e ngae n anne, bwa Tamara are i Karawa e atai nanora are ti tangiri ao iai ana babaire ibukira ni kabane.
Inanon 2017 I mare ma kainnabau ae bane ana tai ni mitinare ibukin ana Ekaretia Iesu Kristo ibukiia Aika Itiaki ni Boong aika Kaitira. Imwiin te bwai are I a tia n rinanona ae tabu are e kamatoaa nakoiu te tamnei bwa e koaua te euangkerio, I a bwabetitoaki.
Kunean te euangkerio bon te mwaneka ae bubura nakon kakoroan nanon au kouru ibukin te reirei. Te Ekaretia e ataa kakawakin te reirei n aron naba ae I karaoia ao e a tia ni katauraoa te boutoka ae mwaiti n aron te “Pathway” programme, are e a kona ni karekea te anga ibukiia aomata ni kabane inanon kaangaanga nako ibukin karekean te reirei. E bon aki bebete te kawai, ma I a tia n reiakinaki bwa ngkana e a tia te Atua n anga te tua nakoia Natina, E na katauraoi kawai n taainako ni kauoua n te mwakuri ao n te maiu n tamnei.
Te Pathway programme bon te mwakuri ae e na katoka au kaangaanga nakon nanou are I tangiria ni karekean au reirei ao e a tia n anganai ma kainnabau baika a mwaiti nakon ae tii te tibwanga ni karababai ara reirei. Ti a tia n reiakina taekan te maiu n toronibwai ao te reitaki ni utu ae kakukurei, ibuakon tabeua konabwai aika a kakawaki inanon te maiu.
N ai aron naba katauraoan te Pathway programme, e a tia te Uea ni kaoniira ma Mwaakana ao Tamneina.
Ti namakina rikiraken ara onimaki. I namakina te ninikoria ae kamiimi ae roko irou ngke e a boo au tai n tei imataia taan ira te reirei n te Pathway ao n taetae. Ngai ma kainnabau ti namakina rikiraken korakorara ao ara konabwai ni bairea raoi ara tai ao ni mwakuri korakora bwa ti aonga ni katiai mwioko ake ti anganaki.
Kaainakin te pathway bon te baire ae matoatoa ni karaoakina. Akea ara laptop ao akea angara n toma ma te Wi-Fi inanon mweengara. N aki tabe ma baike akea iroura ti a tia namakina bain te Atua inanon mwanangara, n anganiira kakai aika a uarereke ao aika a bubura inanon kawaira n aron reken taabo tabeua ni karaoa ara mwakuri, ke membwa ake a nooriira inanon kawaira ae abwabwaki nakon te tabo n tangoboki ao n nikiriira n te kaa.
I tangiria bwa e na kakukurei ara boong aika a na roko ibukiia au utu. I ataia bwa ni kamwaitan riki te reirei e na angan au utu aia tai n tokanikai ao ni maiu n toronibwai. I ataia bwa Tamara are i Karawa, Iesu Kristo ao te Tamnei ae Raoiroi a tia ni memena irarikira inanon mwanangara ao n tia ni katokii rawawatara ma ni kabebetei.