5 ka Paagi nga Malingaw sa Pasko Kon Ikaw Layo sa Panimalay

By Alexandra Palmer

Mga Magasin sa Simbahan

Ania ang lima ka paagi sa pagbuntog sa kasubo atol sa panahon sa Pasko.

Ang tagsulat nagpuyo sa Utah, USA.

Usa sa walay paglubad nga kanta sa Pasko sa Amerika mao ang kanta ni Elvis nga “Blue Christmas.” Wala ko makagusto niini. Bisan og ang mga pulong, “Masulub-on ang akong Pasko kon wala ka. Masulub-on kaayo ko nga maghunahuna kanimo” mahimong importante kaayo alang sa mga young adult. Bisan alang sa mga misyon, trabaho, eskwela, o tungod kay kita o ang atong pamilya nagpuyo sa gawas sa nasud, kadaghanan kanato kinahanglan nga mogahin sa Pasko nga layo sa atong pamilya ug mga higala.

Ang Pasko usa ka talagsaon nga holiday aron saulugon ang pagkatawo sa Manluluwas, apan daghan sa mga tradisyon sa Pasko nagtutok sa paggahin og panahon ngadto sa uban: kita magpundok aron mangaon og dungan; kita mohatag og mga regalo ngadto sa uban; kita manganta o mobasa og dungan sa istorya sa Pagkatawo.

Mao nga sa unsang paagi nimo himoon ang Pasko nga makahuluganon kon ikaw nag-inusara? Ania ang lima ka ideya. Bisan kon ikaw usa ka misyonaryo ikaw makahimo niini nga mga kalihokan, bisan og imong ipahaum kini o buhaton kini sa adlaw sa pagpangandam.

Ipadayon ang imong mga tradisyon.

Tungod lang kay wala nimo ikauban ang imong pamilya wala magpasabut nga dili nimo mapadayon ang mga tradisyon sa pamilya. Paghimo og lamian nga mga biskwit o lamian nga tamales [pagkaon sa Mexicano]. O, paghimo og imong kaugalingong mga tradisyon. Kon ikaw magpili unsa nga mga tradisyon ang buhaton, tutuki kadtong mopahinumdom kanimo ni Kristo: samtang ikaw motutok sa Manluluwas, dili lang nimo bation ang diwa sa Pasko apan usab ang Balaan nga Espiritu, kansang impluwensya makahatag og dugang kalinaw ug kahupayan.

Tutuki ang imong mga kagikan.

Kadaghanan sa akong katigulangan gikan sa Norway, ug daghan sa akong mga handumanan sa Pasko nasentro libut sa mga tradisyon ug pagkaon sa taga-Norway. Kon wala ang akong pamilya, ako makahimo lamang sa pipila niini nga mga tradisyon, apan sa gihapon makahunahuna ko mahitungod sa akong mga kabilin. Ang panahon sa Pasko mao ang sakto nga panahon sa paghimo sa buhat sa family history, bisan ang pagpangita sa mga ngalan nga dad-on sa templo, pagsiksik kon sa unsang paagi ang inyong mga katigulangan migahin sa ilang mga holiday, o bisan sa pagsulat sa imong journal. Bisan unsay imong pilion nga buhaton, ang paghinumdom sa imong mga kabilin motabang nimo nga mobati nga konektado sa imong pamilya—kadtong buhi ug kadtong namatay na—ug makahatag nimo og mas importanting katuyoan.

Makig-uban sa uban.

Nagkinahanglan kini og kaisug, ilabi na kon ikaw maulawon, apan dili kinahanglan nga ikaw mogahin sa imong Pasko nga ikaw lang gayud. Ug dili kinahanglan nga ikaw mobuhat og butang nga mobati ka nga dili komportable: pakig-uban sa ubang mga young adult alang sa panihapon, pagpanaygon, o magkuyog lang. Tingali adunay ubang mga tawo sama nimo nga naggahin sa ilang Pasko nga layo sa panimalay, mao nga pangitaa kadtong mga tawo nga mahigalaong maimbitar.

Tagamtama ang panahon o magbutang og dekorasyon sa sulod.

Depende kon asa ka magpuyo, ang Pasko anaa sa tunga-tunga sa pinakabugnaw o pinakainit nga panahon, maong pahimusli kini! Pagbalsa o pag-hike, pag-ice skating o pagbiseklita. O, kon dili ka ganahan sa gawas, pabilin lang sa sulod ug magbutang og mga dekorasyon. Adunay daghang sayon nga mga dekorasyon sa Pasko nga imong mahimo nga aron ang imong lugar alegre tan-awon.

Serbisyuhi ang uban.

Pipila ka butang nga mabati nimo ang diwa sa Pasko nga mas sayon kay sa pagserbisyo. Ang Simbahan mihatag og daghang kapanguhaan nga makatabang nimo sa pagserbisyo sa uban, bisan pinaagi sa #Dan-agiAngKalibutan nga kampanya o JustServe.org. Si Sister Jean B. Bingham, Kinatibuk-ang Presidente sa Relief Society, mipahinumdom kanato nga “ang yano nga mga buhat sa serbisyo mahimong adunay lawom nga mga epekto sa uban—ingon man sa atong kaugalingon. Unsa ang gibuhat sa Manluluwas? Bisan og ang Iyang balaang mga gasa sa Pag-ula ug Pagkabanhaw … ‘walay lain nga adunay labaw ka mahinungdanong impluwensya [diha] sa tanan kinsa nakapuyo na ug kinsa magpuyo pa dinhi sa yuta.’ Apan Siya usab mipahiyom ni, nakigsulti uban ni, nakiglakaw kauban ni, naminaw ngadto ni, mihatag og oras alang ni, miawhag, mitudlo, mipakaon, ug mipasaylo. Managsama Niyang giserbisyohan ang pamilya ug mga higala, mga silingan ug dili mga kaila, ug gidapit Niya ang mga kaila ug mga minahal sa pagpahimulos sa buhong nga mga panalangin sa Iyang ebanghelyo.”¹

Tingali wala ikaw sa inyo sa Pasko, apan sa gihapon imong mahimo ang holiday nga espesyal. Si Presidente Thomas S. Monson (1927–2018) miingon, “Kon anaa kanato ang diwa sa Pasko, ato Siyang hinumduman kansang pagkatawo atong gisaulog niining panahon sa tuig: ‘Kay alang kaninyo natawo karon sa lungsod ni David ang Manluluwas, nga mao ang Kristo nga Ginoo’ (Lucas 2:11).”²