Nag-inusara ug Mapasalamaton sa Pasko
Paghulagway pinaagi ni Daria Kirpach
Alang nako samtang nagtubo, ang Pasko mao ang labing mahinungdanon nga panahon sa tuig—dili lamang tungod sa mga gasa apan usab tungod kay ang Pasko usa ka panahon sa pagpakigbahin uban niadtong kinsa mahinungdanon kaayo sa akong kinabuhi, ang akong pamilya.
Ang pamilya bililhon kaayo ngari kanako, ug sulod sa katuigan, ang mga tradisyon sa Pasko kanunay nga usa ka talagsaong han-ay sa mga kalingawan sa pamilya nga naghambin gihapon sa daghang bililhong mga handumanan kanako.
Apan niining milabay nga Pasko lahi. Ako adunay usa ka bag-ong trabaho nga kinahanglan ko nga mobiyahe sa Pasko. Hangtud niining puntoha sa akong kinabuhi, duha lamang ka Pasko uban sa akong pamilya ang wala nako maapili—kining duha samtang ako anaa sa misyon. Sa wala pa gani ko mobiya sa akong biyahe sa negosyo, naguol ug gimingaw na ko. Tibuok Adlaw sa Pasko nga ako naghunahuna, “Pagkausik!” Walay trabaho nga tingali bililhon pa niini!
Mihukom ko nga motan-aw og salida sa TV diha sa akong kwarto sa hotel. Sa salida, usa ka tawo mipahayag kon unsa ka importante ang pagpasalamat. Kini dili mao ang importante nga bahin sa salida, ni kini makapatandog kaayo nga talan-awon, apan kini nakapatandog kanako og dako.
Nianang higayuna nakaamgo ko nga ako wala gayud moluhod sa Adlaw sa Pasko sa pagpasalamat sa Langitnong Amahan alang sa gasa sa Iyang Anak, si Jesukristo. Sa tanang katuigan gisaulog nako ang Pasko, ako nakatutok lamang sa akong pamilya, mga regalo, ug mga dula. Bisan pa sa labing maayong paningkamot sa akong mga ginikanan ug apohan sa pagtudlo kanako, wala gayud ako makapasalamat kon unsa kaimportante ang Manluluwas sa Pasko. Isip pamilya, basahon namo ang istorya sa Iyang pagkatawo diha sa mga kasulatan, apan wala gayud ako mihatag og daghan nga mga hunahuna sa kamahinungdanon sa Iyang pagkatawo sa Pasko.
Mga luha mipuno sa akong mga mata samtang nag-ampo ko sa akong Langitnong Amahan. Gipasalamatan nako Siya sa sakripisyo nga Iyang gihimo sa pagpadala sa Iyang Bugtong Anak sa yuta ug sa talagsaong kinabuhi sa Iyang Anak sa sakripisyo ug pagkamabination. Ang kamatuoran nga ako nag-inusara ug layo sa akong pamilya sa Pasko sa gihapon nakapaguol kanako, apan kini nagtugot sa Langitnong Amahan sa pagtudlo nako og leksyon nga dili gayud unta nako makat-unan samtang gilibutan sa akong pamilya: ang Manluluwas mao ang rason nga ako adunay pamilya!
Mapasalamaton ako nga ang pag-inusara sa Pasko naghatag kanako og gamayng panabut sa mahigugmaon ug walay kinutuban nga gasa sa Langitnong Amahan sa Iyang Anak.